ވެރިކަން ކުރާ ޕާޓީ ޕީއެންސީއަށް މެމްބަރުން އިތުރުކުރަން ވަގު ފޯމު ހުށަހެޅިކަމަށް ބުނާ މައްސަލަ، އިދިކޮޅު އެމްޑީޕީން އެންޓި ކޮރަޕްޝަން ކޮމިޝަން (އޭސީސީ) އަށާއި ޕްރޮސިކިއުޓާ ޖެނެރަލްގެ އޮފީސް (ޕީޖީ)އަށް މިއަދު ހުށަހަޅައިފިއެވެ.
މި މައްސަލައަކީ ޕީއެންސީން މި ފަހުން ހިންގި 'މެންބަޝިޕް ޑްރައިވް'ގައި ވަގު ފޯމު ފުރައިގެން އެ ޕާޓީއަށް މީހުން ވެއްދި މައްސަލައެކެވެ. 'މެމްބަޝިޕް ޑްރައިވް' ހަރަކާތުގައި 75،000 އަށްވުރެ ގިނަ މެމްބަރުން އެ ޕާޓީއަށް ވައްދާފައިވެއެވެ. އޭގެ ތެރޭގައި އިދިކޮޅު އެމްޑީޕީގެ ގައުމީ މަޖިލީހާއި، އާއްމު މެންބަރުން ވެސް ހިމެނެއެވެ.
މި މައްސަލަ ބޮޑުވެފައިވާއިރު ބައެއް ފަރާތްތަކުން ވަނީ އެ މައްސަލަ މިހާރު ފުލުހަށް ވެސް ހުށަހަޅައިފައެވެ.
އެކަމާ ގުޅިގެން އެކްސްގައި ކުރި ޕޯސްޓެއްގައި އެމްޑީޕީން ބުނީ، ރައްޔިތުންގެ ޒާތީ މައުލޫމާތުން ވައްކަންކޮށް، ވަގު ފޯމު ފުރައިގެން ޕީއެންސީއަށް މީހުން ވެއްދި މައްސަލައިގައި ހިމެނޭ ޖިނާއީ ކުށްތައް ތަހުގީގު ކުރުމަށް ފުލުހުންނާއި އޭސީސީއަށް އެ ޕާޓީން ހުށަހަޅާފައިވާ ކަމަށެވެ. އަދި އެ މައްސަލަތައް ތަހުގީގު ކުރުމަށް އެ ދެ އިދާރާގެ މައްޗަށް އަމުރުކޮށްދިނުމަށް ޕީޖީގައި ވެސް އެދިފައި ވާނެ ކަމަށް އެމްޑީޕީން ބުންޏެވެ.
މީގެ އިތުރުން ޕީއެންސީން ހުށަހެޅި އެއްވެސް ފޯމެއް ޕްރޮސެސް ނުކުރުމަށާއި، ޕްރޮސެސް ކުރި ފޯމުތައް ކެންސަލްކޮށް، އެ ފޯމުތަކުގެ ސައްހަކަން އަލުން ކަށަވަރުކުރުމަށް އެދި އިލެކްޝަންސް ކޮމިޝަން (އީސީ)އަށް ވެސް ސިޓީއެއް ފޮނުވާފައި ވާނެ ކަމަށް އެމްޑީޕީން ބުންޏެވެ.
އިދިކޮޅު ފަރާތްތަކުން ތުހުމަތު ކުރަނީ، ޕީއެންސީއަށް މެމްބަރުން އިތުރުކޮށްފައި ވަނީ، ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު)ގެ ޑާޓާބޭސް ބޭނުންކޮށްގެން ކަމަށެވެ. މިކަމަށް ބާރުދޭ ފޮޓޯތަކެއް ވަނީ ސޯޝަލް މީޑިއާގައި ފެންމަތިވެފައެވެ.
މި ފޮޓޯތަކުން ފެންނަނީ ޑީއެންއާރުގެ މުވައްޒަފުން އައިޑީކާޑު ފޮޓޯ ބޭނުންކޮށްގެން ފޯމުތަކެއް ފުރާ މަންޒަރެވެ. އަދި މި މަސައްކަތް ކުރިއަށްދާގޮތް ބަލަން ހޯމް މިނިސްޓަރު އަލީ އިހުސާނު ހުންނަ ފޮޓޯއެއް ވެސް ވަނީ ލީކުވެފައެވެ. މިއާއެކު އިދިކޮޅުން ދަނީ އިހުސާނު މަގާމުން އެކަހެރިކުރުމަށް ވެސް ގޮވަމުންނެވެ.
އެގޮތުން މިނިސްޓަރު އިހުސާނުގެ އިތުބާރު ނެތް މައްސަލަ މަޖިލީހަށް ވައްދަން ވެސް އެމްޑީޕީގެ ޕީޖީން އިއްޔެ ވަނީ ފާސްކޮށްފައެވެ.
މީގެ އިތުރުން، މި ފަހުންވަނީ ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު (ފިއްޓޭ)އާއި ރައްޔިތުންގެ މަޖިލީހުގެ މަނަދޫ ދާއިރާގެ ކުރީގެ މެންބަރު މުހައްމަދު ތޯރިގަށް ވެސް ނޭނގި ވަނީ ޕީއެންސީއަށް ވައްދައިފައެވެ.
މި މައްސަލައިގައި އެމްޑީޕީގެ އިސްވެރިން ވަނީ އިލެކްޝަންސް ކޮމިޝަނަށް ގޮސް، އެ ތަނުގެ އިސްވެރިންނާ ބައްދަލުކޮށްފައެވެ