ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު)ގެ ޑާޓާބޭސް ބޭނުންކޮށްގެން ޕީއެންސީއަށް މެމްބަރުން އިތުރުކުރަން ވަގު ފޯމު ހުށަހެޅިކަމަށް ބުނާ މައްސަލައިގައި ހޯމް މިނިސްޓަރު އަލީ އިހުސާނުގެ އިތުބާރު ނެތް މައްސަލަ މަޖިލީހަށް ހުށަހަޅަން އެމްޑީޕީން ނިންމައިފިއެވެ.
މި ނިންމުން އެ ޕާޓީން ނިންމާފައި ވަނީ މިއަދު ބޭއްވި ޕީޖީ ބައްދަލުވުމެއްގައެވެ.
ޑީއެންއާރުގެ މުވައްޒަފުންތަކެއް އެ އިދާރާގެ ޑޭޓާބޭސްއިން ރައްޔިތުންގެ ޒާތީ މައުލޫމާތު ނަގައި، އެ މައުލޫމާތާއި އައިޑީކާޑު ފޮޓޯ ބޭނުންކޮށްގެން ފޯމުތަކެއް ފުރާ މަންޒަރު ފެންނަ ފޮޓޯތަކެއް ސޯޝަލް މީޑިއާގައި ވަނީ ލީކުވެފައެވެ. އެ މަސައްކަތް ކުރިއަށްދާގޮތް ބައްލަވަން މިނިސްޓަރު އިހުސާނު ހުންނަވަނިކޮށް ފޮޓޯއެއް ވެސް ވަނި ލީކުވެފައެވެ.
އެއާއެކު، ރައްޔިތުންގެ ޒާތީ މައުލޫމާތު ބޭނުންކޮށްގެން ޕީއެންސީއަށް ވަގު ފޯމު ހުށަހެޅީ މިނިސްޓަރުގެ ބެލުމުގެ ދަށުންކަމަށް އިދިކޮޅުން ދަނީ ތުހުމަތު ކުރަމުންނެވެ.
ވަޒީރުންގެ އިތުބާރު ނެތް މައްސަލަ ހުށަހަޅަން 10 މެމްބަރުންގެ ސޮއި ބޭނުންވެއެވެ. އިތުބާރު ނެތްކަމަށް ފާސްވަނީ އެ ކަން އެހެން ފެންނަ ކަމަށް ޖުމްލަ މެންބަރުންގެ އަޣުލަބިއްޔަތުންނެވެ.
އެމްޑީޕީން މި މައްސަލަ މަޖިލީހަށް ވައްދަން ނިންމި އިރު، 20ވަނަ މަޖިލީހުގައި އެ ޕާޓީ ތަމްސީލުކުރައްވަނީ 12 މެމްބަރުންނެވެ.
އެމްޑީޕީއަށް ނިސްބަތްވާ، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ)އަށް ނޭނގި އޭނާ ވެރިކަން ކުރާ ޕީއެންސީއަށް ވެއްދި މައްސަލަ ވެސް މިދިޔަ ހޯމަ ދުވަހު ވަނީ ފެންމަތިވެފައެވެ. މި މި ކަމާ ގުޅިގެން "ސަން"އާ ވާހަކަދައްކަވަމުން އީސީގެ މެންބަރު ހަސަން ޒަކަރިއްޔާ ވިދާޅުވީ، ފިއްޓޭގެ ޕާޓީ ބަދަލުކޮށް ޕީއެންސީގެ ދަފުތަރުގައި އޮތީ އޭނާގެ އެއްވެސް އިޚުތިޔާރެއް ނެތި، އޭނާއަށް ނޭނގިކަމަށް ވެސް އެ ކޮމިޝަނަށް އެނގިފައިވާ ކަމަށެވެ.
އެއާއެކު އެ ކޮމިޝަންގެ ކުއްލި ބައްދަލުވުމެއް ބާއްވައި، ފިއްޓޭ އަލުން އެމްޑީޕީގެ ދަފުތަރަށް ބަދަލުކުރަން ނިންމައި، އެ ކަން ކޮށްްފައިވާކަމަށް ވެސް ވިދާޅުވިއެވެ.
މީގެ އިތުރުން ގޮނޑިއާމެދު އުފެދުނު ސުވާލާ ގުޅިގެން ޒަކަރިއްޔާ ވިދާޅުވީ، ފިއްޓޭގެ ގޮނޑި ގެއްލެންޖެހޭ އެއްވެސް ސަބަބެއް އެ ކޮމިޝަނަށް ނުފެންނަ ކަމަށާއި، ގޮނޑި ނުގެއްލޭނެ ކަމަށެވެ.
އެއީ ޕާޓީ ބަދަލުވެފައި އޮތުމަކީ ފިއްޓޭ ބޭނުންވެގެން އަމިއްލައަށް ކުރި ކަމަކަށް ނުވާތީ ކަމަށް އޭނާ ވިދާޅުވިއެވެ.