ޗާންދަނީ މަގުގައި ހުންނަ އެމްޑީޕީ 'ދަނޑިކޮށި ޖަގަހަ' އަށް ކަޅުތެޔޮ ޖެހި މައްސަލަ ފުލުހުން ބަލަން ފަށައިފިއެވެ.
އެ މައްސަލައާ ގުޅިގެން މީޑިއާތަކާ ހިއްސާކުރި މެސެޖެއްގައި ފުލުހުން ބުނީ ރޭ 00:59 ހާއިރު ޗާންދަނީ މަގުގައި ހުންނަ އެމްޑީޕީ 'ދަނޑިކޮށި ޖަގަހަ' އަށް ކަޅުތެޔޮ ޖެހި މައްސަލަ ފުލުހުންނަށް ރިޕޯޓުކޮށްފައިވާ ކަމަށެވެ.
އަދި އެ މައްސަލަ ފުލުހުން މިހާރު ތަހުގީގުކުރަމުންދާ ކަމަށް ވެސް ފުލުހުން ވަނީ މައުލޫމާތުދީފައެވެ.
ފާހަގަކޮށްލެވޭ ގޮތުގައި އެމްޑީޕީގެ ޖަގަހައަށް ކަޅުތެޔޮ ޖަހާފައި އެވަނީ، ވަގަށް އެ ޕާޓީގެ މެންބަރުން ސަރުކާރު ހިންގާ މައި ޕާޓީ ޕީއެންސީއަށް ވައްދަން ވަގު ފޯމުތަކެއް ފުރައި އިލެކްޝަންސް ކޮމިޝަނަށް ހުށަހަޅާފައިވާ ކަމަށް ބުނެފައި ވަނިކޮށެވެ. އަދި އެ ފޯމުތަކުގައި ހެކިންގެ ގޮތުގައި ސޮއިކޮށްފައި ތިބި މީހުންގެ ފޮޓޯ، އެމްޑީޕީގެ ހަރުގޭގެ ގޭޓުގައި ހަރުކޮށްފައި ވެސް ވަނިކޮށެވެ.
ސަރުކާރު ހިންގާ ޕީއެންސީން މި ފަހުން ހިންގި މެންބަޝިޕް ޑްރައިވްގެ ތެރެއިން، 82،000 އަށްވުރެ މެމްބަރުން އެ ޕާޓީއަށް ވައްދާފައިވާ ކަމަށް މީގެ ކުރިން އެ ޕާޓީގެ ޕީޖީ ލީޑަރު އިބްރާހީމް ފަލާހު ވިދާޅުވެފައިވެއެވެ. އޭގެ ތެރޭގައި ވަގަށް އެ ޕާޓީއަށް ވައްދާފައިވާ މީހުން ވެސް ހިމެނެއެވެ. އޭގެ ތެރެއިން ބައެއް ފަރާތްތަކުން އެ މައްސަލަ އޮތީ ފުލުހަށް ވެސް ހުށަހަޅައިފައެވެ.
މި ފަހުންވަނީ ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު (ފިއްޓޭ)އާއި ރައްޔިތުންގެ މަޖިލީހުގެ މަނަދޫ ދާއިރާގެ ކުރީގެ މެންބަރު މުހައްމަދު ތޯރިގަށް ވެސް ނޭނގި ވަނީ ޕީއެންސީއަށް ވައްދައިފައެވެ.
މި މައްސަލައިގައި އެމްޑީޕީގެ އިސްވެރިން ވަނީ އިލެކްޝަންސް ކޮމިޝަނަށް ގޮސް، އެ ތަނުގެ އިސްވެރިންނާ ބައްދަލުކޮށްފައެވެ. އެ ކޮމިޝަނުންވަނީ އެ ފޯމު ބާތިލުކޮށް، ޒިންމާވާ ފަރާތްތަކަށް ފިޔަވަޅު އަޅާނެ ކަމަށް ބުނެފައެވެ.
މި މައްސަލައިގައި ޕީއެންސީން ވަނީ ސައްހަ ނޫން ފޯމުތަކެއް އެ ޕާޓީގެ ފަރާތުން ހުށަހެޅި ކަމަށް އެއްބަސްވެފައެވެ. އަދި އެ ޕާޓީއަށް ލިބޭ ފޯމުތަކުގެ ސައްހަކަން ކަށަވަރު ކުރުމުގެ ގާބިލުކަން ޕާޓީގެ ކިބައިގައި ނެތް ކަމަށް ބުނެފައިވެއެވެ.
އަދި މައްސަލަ ބެލުމަށް އިލެކްޝަންސް ކޮމިޝަނަށް އެއްބާރުލުންދޭނެ ކަމަށް ޕީއެންސީން ބުނެއެވެ.