ކުރީގެ ރައީސް އަބްދުﷲ ޔާމީން އަބްދުލްގައްޔޫމް އަލަށް އުފެއްދެވި, ޕީޕަލްސް ނެޝަނަލް ފްރަންޓް (ޕީއެންއެފް)ގައި ތިބި މެންބަރުންގެ އަދަދު 2،800 އަށް ވެއްޓުނީ އެ ޕާޓީގައި ތިބި ގިނަ މެންބަރުންތަކެއް ޕީއެންސީއަށް ވެއްދުމުން ކަމަށް އެ ޕާޓީން މިއަދު ބުނެފިއެވެ.
އިލެކްޝަންސް ކޮމިޝަން (އީސީ)ން ޕާޓީތަކުގެ ދަފުތަރު ޑިސެމްބަރު 31 އާ ހަމައަށް އަދާހަމަކުރީއިރު ޕީއެންއެފްގައި ތިބީ 2،822 މެންބަރުންނެވެ.
ސިޔާސީ ޕާޓީތަކުގެ ގާނޫނު ބުނާ ގޮތުން ސިޔާސީ ޕާޓީއެއްގައި މަދުވެގެން 3،000 މެންބަރުން ހަމަވާން ޖެހެއެވެ. ހަމަ ނުވާނަމަ، އެ އަދަދަށް މެންބަރުން ހަމަކުރަން ފުރުސަތު ދިނުމަށް ފަހު، އީސީން އެ ޕާޓީއެއް އުވާލާނެއެވެ.
މި ކަމާ ގުޅިގެން 'ސަން'އާ ވާހަކަދައްކަވަމުން ޕީއެންއެފްގެ ސެކެޓަރީ ޖެނެރަލް އަދި ކުރީގެ ޓެކްނޮލޮޖީ މިނިސްޓަރު މުހައްމަދު މަލީހް ޖަމާލް ވިދާޅުވީ، ޕާޓީގެ ދަފުތަރުން މެންބަރުން މަދުވީ އޭނާގެ އަނބިކަނބަލުންނާއި ޕާޓީގެ ރައީސް، ޔާމީންގެ ދަރިކަލުން ޒޭން އަބްދުﷲ ޔާމީންގެ އަނބިކަނބަލުން ވެސް ހިމެނޭހެން ބައެއް މެންބަރުން އެ މެންބަރުންނަށް ނޭނގި ޕީއެންސީއަށް ވައްދާފައި އޮތުމުން ކަމަށެވެ.
އޭނާ ވިދާޅުވީ، މިދިޔަ މުއްދަތު ތެރޭގައި ޕީއެންސީއަށް ފުރި ހުރިހާ ފޯމެއް އޮޑިޓްކުރުމަށް ފަހު، ސައްހަކަން ކަށަވަރުނުވާ ފޯމުތައް ބާތިލުކުރަން ޖެހޭ ކަމަށެވެ.
އީސީގެ ދަފުތަރު ދައްކާ ގޮތުން ކުރީގެ ނައިބު ރައީސް އަހުމަދު އަދީބުގެ އެމްޓީޑީގައި ވެސް 3،000 މެންބަރުން ހަމައެއް ނުވެއެވެ. އެ ޕާޓީގައި މިހާރު ތިބީ 2،359 މެންބަރުންނެވެ. އެންމެ މަދުން މެންބަރުން ތިބީ ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމްގައެވެ. އެ ޕާޓީގައި ތިބީ 1،867 މެންބަރުންނެވެ. އެ ޕާޓީ އުވާލުމުގެ މަސައްކަތް އީސީން އަންނަނީ ކުރަމުންނެވެ.
އީސީގެ ދަފުތަރު ދައްކާ ގޮތުން އެންމެ މެންބަރުން ގިނައީ ޕީއެންސީގައެވެ. އެ ޕާޓީގައި 68،968 މެންބަރުން އެބަތިއްބެވެ. ދެވަނައަށް އެންމެ ބޮޑު އެމްޑީޕީގައި ތިބީ 43،755 މެންބަރުންނެވެ.
'ވަގު ފޯމުތަކުގެ' މައްސަލަ ބޮޑުވެ އީސީން ވަނީ ސިޔާސީ ޕާޓީތަކަށް ދެން މެންބަރުން ވެއްދޭނީ އީފާސް މެދުވެރިކޮށް އެކަނި ކަމަށް ނިންމައިފައެވެ. އެ ނިންމުމަށް އަމަލުކުރެވެންދެން ސިޔާސީ ޕާޓީތަކަށް މީހުން ވެއްދުން މެދުކަނޑާލަން ވެސް އީސީން އޮތީ ނިންމާފައެވެ.
ޕީއެންސީއަށް ގިނަ އަދަދެއްގެ ސައްހަ ނޫން ފޯމު ފުރި މައްސަލައެއް މި ފަހުން ވަނީ ފެންމަތިވެފައެވެ.
އިދިކޮޅު އެމްޑީޕީން ވަނީ އެ ޕާޓީން އެކަނި ވެސް 3،000 އަށްވުރެ ގިނަ މެންބަރުން އެ މެންބަރުންނަށް ނޭނގި ޕީއެންސީއަށް ވައްދާފައިވާ ކަމަށް ބުނެފައެވެ. އެ ޕާޓީއަށް ނިސްބަތްވާ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދަށް ނޭނގި އޭނާ ޕީއެންސީއަށް ވެއްދި މައްސަލައެއް ވެސް މި ފަހުން ވަނީ ފެންމަތިވެފައެވެ.
އީސީން ވަނީ މެންބަރު ޒިޔާދު ޕީއެންސީއަށް ވައްދާފައިވަނީ އޭނާއަށް އެނގުމަކައިނުލާ ކަމަށް ނިންމައި، އޭނާ އަލުން އެމްޑީޕީގެ ދަފުތަރުގައި ހިމަނާފައެވެ.
އެ މައްސަލަ ބޮޑުވެފައި އޮއްވައި އައިޑީކާޑުގެ ޚިދުމަތްދޭ ޑީއެންއާރު އޮފީސް ތެރޭގައި ޕީއެންސީއަށް މެންބަރުންގެ ވެއްދުމުގެ މަސައްކަތްކުރާ ފޮޓޯތަކެއް ވެސް މީސްމީޑިއާގައި ވަނީ ލީކުކޮށްލާފައެވެ. އެ މައްސަލަ އިދިކޮޅު އެމްޑީޕީން ވަނީ ފުލުހަށް ވެސް ހުށަހަޅާފައެވެ.
ޕީއެންސީން ވެސް ވަނީ ސައްހަކަން ކަށަވަރުނުވާ ފޯމުތަކެއް ފުލުހަށް ހުށަހެޅުނު ކަމަށް އެއްބަސްވެފައެވެ. އެކަމަކު، އެހެން އެކަން ދިމާވީ ފޯމުތަކުގެ ސައްހަކަން ކަށަވަރުކުރެވޭނެ ގޮތެއް ޕާޓީގައި ނެތުމުން ކަމަށް ޕީއެންސީން ވަނީ ބުނެފައެވެ.