'ވަގު ފޯމު'ތަކުގެ މައްސަލަ ބޮޑުވެފައި އޮއްވައި، ވެރިކަން ކުރާ ޕީއެންސީން 68،000 އަށްވުރެ ގިނަ މެންބަރުން ހަމަކޮށް، ރާއްޖޭގައި މިހާރު އޮތް އެންމެ ބޮޑު ސިޔާސީ ޕާޓީއަށް މިއަދު ވެއްޖެއެވެ.
އިލެކްޝަންސް ކޮމިޝަން (އީސީން) ވަނީ ސިޔާސީ ޕާޓީތަކުގެ ދަފުތަރު މިދިޔަ ޑިސެންބަރު 31ގެ ނިޔަލަށް އަދާހަމަކޮށްފައެވެ. މިދިޔަ ސެޕްޓެންބަރުގައި ވެސް އީސީން ސިޔާސީ ޕާޓީތަކުގެ ދަފުތަރު އަދާހަމަކޮށްފައިވެއެވެ. އޭރު ޕީއެންސީގައި ތިބީ 28،000 އެއްހައި މެންބަރުންނެވެ.
އެހެންކަމުން ކުޑަ ދުވަސްކޮޅެއްގެ ތެރޭގައި އެ ޕާޓީއަށް އެވަނީ ގާތްގަނޑަކަށް 40،000 މެންބަރުން އިތުރުކޮށްފައެވެ. މި އަދަދުތަކާ އެކު، ރާއްޖޭގެ ތާރީޚުގައި ވެސް އެންމެ ގިނަ އަދަދެއްގެ މެންބަރުން ނިސްބަތްވާ ސިޔާސީ ޕާޓީއަކީ ޕީއެންސީއެވެ.
އީސީގެ ހިސާބުތަކުން ދައްކާ ގޮތުގައި، 50،000އަށްވުރެ ގިނަ މެންބަރުންނާ އެކު މީގެ ކުރިން ރާއްޖޭގެ އެންމެ ބޮޑު ސިޔާސީ ޕާޓީ، އެމްޑީޕީގައި މިހާރު ތިބި މެންބަރުންގެ އަދަދުވަނީ 43،000އަށް ދަށްވެފައެވެ.
މިދިޔަ އަހަރުގެ ނިޔަލަށް ސިޔާސީ ޕާޓީތަކުގައި ތިބި މެންބަރުންގެ އަދަދު:
- ޖުމްހޫރީ ޕާޓީ: 13،826 - މީގެ ކުރިން ތިބީ 17،300 މެންބަރުން
- އެމްޑީއޭ: 9،210 - މީގެ ކުރިން ތިބީ 8،200 މެންބަރުން
- އެމްއެންޕީ: 6،050 - މީގެ ކުރިން ތިބީ 7،519 މެންބަރުން
- ޑިމޮކްރެޓްސް: 3،667 - މީގެ ކުރިން ތިބީ 4،300 މެންބަރުން
- އެމްޓީޑީ: 2،359 - މީގެ ކުރިން ތިބީ 3،100 މެންބަރުން
- ޕީއެންއެފް: 2،822
އީސީގެ ހިސާބުތަކުން ދައްކާ ގޮތުގައި އެމްއާރުއެމްގައި ތިބީ 1،867 މެންބަރުންނެވެ. އެ ޕާޓީ އުވައިލުމުގެ އެންމެ ފަހުގެ މަރުހަލާ ކުރިއަށްދާ ކަމަށް އީސީން ވަނީ ބުނެފައެވެ.
ސިޔާސީ ޕާޓީއެއްގައި މަދުވެގެން ތިބެންޖެހޭ މެންބަރުންގެ ގާނޫނީ އަދަދަކީ 3،000އެވެ. އެ އަދަދަށް މެންބަރުން ހަމަނުވާ ޕާޓީތަކަށް ނޯޓިސް ދިނުމަށް ފަހު ވެސް އަދަދު ހަމަނުވެއްޖެ ނަމަ، އީސީން އެ ޕާޓީއެއް އުވައިލާނެއެވެ.
ރާއްޖޭގައި ގިނަ ސިޔާސީ ޕާޓީ އެކުލެވޭ ނިޒާމެއް ފެށުނީއްސުރެ، އެ ނިޒާމު ކުރިއެރުވުމުގެ ގޮތުން ދައުލަތުގެ ބަޖެޓުން ކޮންމެ އަހަރަކު ވެސް ޕާޓީތަކަށް ފައިސާ ދޫކުރެއެވެ. އެ ފައިސާ ދޫކުރަނީ 10،000 މެންބަރުން ހަމަވާ ޕާޓީތަކުގެ މެދުގައި، މެންބަރުންގެ ނިސްބަތަށް އެކަނި ބަލައިގެންނެވެ.
ސިޔާސީ ޕާޓީތަކަށް ވަގަށް މީހުން ވައްދާ މައްސަލަ މި ފަހުން ވެސް ފެންމަތިވިއިރު، އެއީ ޕާޓީތަކަށް ލިބޭ ފައިސާގެ އަދަދު އިތުރުކުރުމަށް ކުރާ ކަމެއް ކަމަށް ވަނީ ތުހުމަތުކޮށްފައެވެ. އެ މައްސަލައިގައި ސަރުކާރު ހިންގާ ޕީއެންސީއަށް ތުހުމަތުކުރެވޭއިރު، އެހެން ބައެއް ޕާޓީތަކުންނާއި ބައެއް ޖަމިއްޔާތަކުން ވެސް ވަނީ އެ ކަން ކުށްވެރިކޮށް، ފިޔަވަޅު އެޅުމަށް ސަރުކާރަށް ގޮވާލައިފައެވެ.
ޕީއެންސީން ގިނަ އަދަދެއްގެ 'ވަގު ފޯމު' ފުރިކަމަށް ތުހުމަތުކޮށް، އިދިކޮޅު ފަރާތްތަކުން ވަނީ އެ މައްސަލަ ތަހުގީގު ކޮށްދޭން އެދި ފުލުހަށް ވެސް ހުށަހަޅާފައެވެ.
އެ މައްސަލަ ބޮޑުވެފައި އޮއްވައި އައިޑީކާޑުތަކާއި ރައްޔިތުންގެ ލިޔެކިޔުން ބަލަހައްޓާ ޑީއެންއާރުގެ އޮފީސް އިމާރާތް ތެރޭގައި ޕީއެންސީއަށް ފޯމުފުރި މައްސަލައެއް ވެސް ފެންމަތިވިއެވެ. އެކަންކުރާ ފޮޓޯތަކެއް ވެސް ވަނީ މީސްމީޑިއާގައި ލީކުވެފައެވެ.
ޕީއެންސީން ވެސް ވަނީ ބައެއް ސައްހަކަން ކަށަވަރުނުކުރެވޭ ފޯމުތަކެއް ފުރުނު ކަމަށް އިއުތިރާފުވެފައެވެ. އެކަމަކު، އެއީ ގަސްތުގައި ކުރި ކަމެއް ނޫން ކަމަށާއި އެއީ ފޯމުގެ ސައްހަކަން ކަށަވަރުކުރެވޭނެ ގޮތެއް ނެތުމުން ހިނގި ކަމެއް ކަމަށް ޕީއެންސީން ވަނީ ބުނެފައެވެ.
އެ މައްސަލައިގައި އިދިކޮޅު އެމްޑީޕީން ވަނީ ޕީއެންސީން މި ފަހުން ހުށަހެޅި ހުރިހާ ފޯމެއް ބާތިލުކުރަން ވެސް އީސީއަށް ގޮވާލައިފައެވެ. އީސީން ވަނީ އެ މައްސަލަ ބޮޑުވެ، އީ-ފާސް މެދުވެރިކޮށް އެކަނި ޕާޓީތަކަށް މީހުންނަށް ވަދެވޭ ގޮތަށް އުސޫލު ބަދަލުކުރަން ނިންމައިފައެވެ.