ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު)ގެ ތެރޭގައި ސަރުކާރު ހިންގާ ޕީއެންސީން ފޯމުފުރިކަމަށް ސަރުކާރުން އެއްބަސްވުމުން، އިދާރާތަކުން އެ މައްސަލަ ބަލައި، ޕީއެންސީން މިދިޔަ މުއްދަތުގައި ހުށަހެޅި ފޯމުތައް ބާތިލް ކުރަންޖެހޭ ކަމަށް އެމްޑީޕީގެ ޗެއާޕާސަން، ފައްޔާޒު އިސްމާއީލް މިއަދު ވިދާޅުވެއްޖެއެވެ.
ޑީއެންއާރުގައި ހުރި ރައްޔިތުންގެ ޒާތީ މައުލޫމާތު ބޭނުންކޮށްގެން، ޕާޓީއަށް މެމްބަރުން އިތުރުކުރަން ވަގު ފޯމުތަކެއް ފުރިކަމުގެ ތުހުމަތު ޕީއެންސީއަށް އަމާޒުވަމުންދާ މި ދަނޑިވަޅުގައި، ޑީއެންއާރުގެ މަސައްކަތްތަކާ ގުޅޭ ގޮތުން މައުލޫމާތު ދިނުމަށް މިއަދު ވަނީ ނޫސްވެރިންގެ ބައްދަލުވުމެއް ބާއްވާފައެވެ. މި ބައްދަލުވުމުގައި މައުލޫމާތު ދެއްވީ ހޯމްލޭންޑް މިނިސްޓްރީގެ ޑެޕިއުޓީ މިނިސްޓަރު އަހުމަދު އާލީ އާއި، ސްޓޭޓް މިނިސްޓަރު އަބްދުލް މަޖީދު އިބްރާހީމެވެ.
މަޖީދުވަނީ ޑީއެންއާރުގައި ޕީއެންސީގެ ފޯމުފުރި ކަމަށް އެއްބަސްވެ ވަޑައިގެންފައެވެ.
އެ މައްސަލައިގައި ނޫސްވެރިން ސުވާލުކޮށްކޮށް ތިއްބައި، މަޖީދު ވަނީ ޑީއެންއާރުގެ މަސައްކަތްތައް ބެލުމަށް އޮފީހުގެ އެތެރެއަށް ވަނުމަށް ދައުވަތު ދެއްވުމަށްފަހު ބައްދަލުވުން ނިންމަވާލައްވައިފައެވެ. އެއާއެކު އޭނާ ނޫސްވެރިންނަށް ފިއްލެވިއިރު، އޭގެ ކުޑަ ވަގުތުކޮޅެއް ފަހުން އާލީ ވެސް ވަނީ ނޫސްވެރިން ސުވާލުކުރަން ތިއްބައި އެ ތަން ދޫކުރައްވައި ވަޑައިގެންފައެެވެ.
މި ކަމާ ގުޅިގެން ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ، ނޫސްވެރިންނަށް ޖަވާބުނުދީ މިނިސްޓްރީގެ އިސްވެރިން ފިއްލެވި ނަމަވެސް، ކަމުގެ ހަގީގަތް ހަމާވެފައިވާ ކަމަށެވެ. ފައްޔާޒު ތުހުމަތު ކުރެއްވީ، ޕީއެންސީއަށް ވަގު ފޯމު ފުރީ، ރައްޔިތުންގެ ޒާތީ މައުލޫމާތު ރައްކާކޮށްފައިވާ ދައުލަތުގެ މުއައްސަސާއެއްގެ ތެރޭގައި، ދައުލަތުގެ މުދާ ބޭނުންކޮށްގެން، އެ ތަނުގެ މުވައްޒަފުން ކަމަށެވެ.
މި މައްސަލައިގައި ޑީއެންއާރުގެ ވެރިން، މި ކުށަށް އިއުތިރާފުވެފައިވާތީ އިދާރާތަކުން މި މައްސަލަ ބަލަންޖެހޭ ކަމަށާއި، އަދި އިލެކްޝަންސް ކޮމިޝަން (އީސީ)އަށް މިދިޔަ މުއްދަތުގައި އެ ޕާޓީން ހަވާލުކުރި ފޯމުތައް ބާތިލް ކުރަންޖެހޭ ކަމަށް އޭނާ ވިދާޅުވިއެވެ.
"ރައްޔިތުންގެ ޒާތީ މައުލޫމާތު ރައްކާކުރެވިފައިވާ އިދާރާގެ ތެރޭގައި ޕީއެންސީއިން އެ މައުލޫމާތު ވަގަށް ނަގައިގެން، ވަގު ފޯމު ފުރާ މަންޒަރު ހިމެނޭ ފޮޓޯތަކެއް ލީކުވެ، އެ ކަން ކުރި ކަމަށް ޑީއެންއާރުގެ ވެރިން އިއުތިރާފުވެފައިވާއިރު ދައުލަތުގެ ބަޖެޓުން ވައްކަން ކުރުމަށް ރާވައިގެން އެ ޕާޓީ އަދި ސަރުކާރުގެ ސިޔާސީ ބޭފުޅުން މަސައްކަތް ކުރެއްވުމަކީ މި ސަރުކާރުގެ މުޑުދާރު ލަދުވެތި ހާލަތު ހާމަކޮށްދޭ ހެއްކެއް،" ފައްޔާޒު ވިދާޅުވިއެވެ.
ސިޔާސީ ޕާޓީތަކަށް ވަގަށް މީހުން ވައްދާ މައްސަލަ މި ފަހުން ވެސް ފެންމަތިވިއިރު، އެއީ ޕާޓީތަކަށް ލިބޭ ފައިސާގެ އަދަދު އިތުރު ކުރުމަށް ކުރާ ކަމެކެވެ. އެ މައްސަލައިގައި ސަރުކާރު ހިންގާ ޕީއެންސީއަށް ތުހުމަތު ކުރެވޭއިރު، އެހެން ބައެއް ޕާޓީތަކުންނާއި ބައެއް ޖަމިއްޔާތަކުން ވެސް ވަނީ އެ ކަން ކުށްވެރިކޮށް، ފިޔަވަޅު އެޅުމަށް ސަރުކާރަށް ގޮވާލައިފައެވެ.
ޕާޓީތަކަށް ފައިސާ ދޫކުރުމުގެ ކުރިން، ޕާޓީތަކުގެ ދަފުތަރު އިއުލާންކޮށް، ޝަކުވާ ހުށަހެޅުމުގެ ފުރުސަތު އީސީން ހުޅުވައިލާނެއެވެ. އެއީ މެމްބަރުންގެ އަދަދަށް ބަލައިގެން ފައިސާދޭއިރު، ކޮންމެ ޕާޓީއަކަށް ވެސް ދެވެނީ ރަނގަޅު އަދަދުތޯ ބެލުމަށެވެ.