ޕީއެންސީއަށް މެންބަރުން އިތުރުކުރަން ހިންގި 'މެމްބަޝިޕް ޑްރައިވް'ގައި ޕާޓީއަށް ހުށަހެޅުނު އެތައް ހާސް ފޯމެއް އެ ޕާޓީގެ ފަރާތުން އީސީއަށް ހުށަހަޅާފައިވަނިކޮށް، މަދުން ނަމަވެސް ސައްހަ ނޫން ފޯމްތަކެއް ހުށަހެޅިފައިވާކަން އެ ޕާޓީއަށް ފާހަގަކުރެވިފައިވާ ކަމަށް ޕީއެންސީން މިއަދު ބުނެފިއެވެ.
އެ މައްސަލައާ ގުޅިގެން މިއަދު ނެރުނު ބަޔާނުގައި ޕީއެންސީން ބުނީ، 'މެމްބަޝިޕް ޑްރައިވް'އަކީ ރާއްޖޭގައި މިހާތަނަށް އެއްފަހަރާ އެންމެ ގިނަ އަދަދަކަށް ސިޔާސީ ޕާޓީއަކަށް މެންބަރުން ވަނުމަށް ފޯމް ހުށަހެޅި އެއް ހަރަކާތް ކަމަށެވެ.
ނަމަވެސް، ޕާޓީގެ އިދާރީ މުވައްޒަފުން ނުހަނު ބުރަކޮށް މަސައްކަތްކޮށް، ޕާޓީގެ އިލެކްޝަންސް ޕޯޓަލް މެދުވެރިކޮށް އެ ފޯމުތައް އަޕްލޯޑް ކުރަމުން ދިޔަ ނަމަވެސް، ޕާޓީއަށް ލިބޭ ފޯމުތަކުގެ ސައްހަކަން ކަށަވަރުކުރުމުގެ ގާބިލުކަން ޕާޓީގައި ނެތް ކަމަށް އެ ޕާޓީން ބުންޏެވެ. ނަތީޖާއަކީ ފޯމެއްގެ ސައްހަކަމާމެދު ސުވާލެއް އުފެދޭ ހިސާބަކީ އިލެކްޝަންސް ކޮމިޝަން (އީސީ)އަށް ފޯމު ހުށަހަޅާ ހިސާބުން ކަމަށް ޕީއެންސީން ބުންޏެވެ.
ގިނަ ޕާޓީ އެކުލެވޭ ވާދަވެރި ސިޔާސީ މާހައުލެއް ރާއްޖޭގައި ވުޖޫދުކުރި ހިސާބުން ފެށިގެން މިއަދާ ހަމައަށް ވެސް ރާއްޖޭގައި ވަސީލަތްތައް ހުރިގޮތުން އެ ކަމަކީ އެ ޕާޓީއަށް އެކަނި އޮތް ގޮންޖެހުމެއް ނޫންކަން ވެސް ޕީއެންސީން ވަނީ ފާހަގަކޮށްފައެވެ.
އެ މައްސަލައާ ގުޅިގެން އީސީއަށާއި ފުލުހުންނަށް ވެސް ޝަކުވާތަކެއް ހުށަހަޅާފައިވާތީ، އެ ދެ މުއައްސަސާއިން ވެސް އެ މައްސަލަތައް ބަލަމުންދާކަން އެ ޕާޓީއަށް އަންގާފައިވާ ކަމަށް ޕީއެންސީން ބުންޏެވެ. އެ ޕާޓީން ވެސް އެފަދަ ފޯމުތައް ހުށަހަޅާފައިވާ ގޮތް ބަލަމުން އަންނަ ކަމަށް ޕިއެންސީން ބުންޏެވެ.
"...އަދި ކޮންގްރެސް ޕާޓީގެ ފަރާތުން އެ ދެ މުއައްސަސާއަށް އެކަން ބެލުމުގައި ފުރިހަމައަށް އެއްބާރުލުން ދެމުންގެންދާކަން ރައްޔިތުންނަށް ކަށަވަރުކޮށް އަރުވަން،" ޕީއެންސީން ބުންޏެވެ.
ޕީއެންސީން ބުނީ، ސައްހަ ނޫން ފޯމްތަކެއްގެ މުގާބިލުގައި އެ ޕާޓީއަށް މެންބަރުން އިތުރުކޮށް ރައްޔިތުންގެ ހައްގުތަކެއް ގެއްލޭފަދަ ގޮތަކަށް އެއްވެސް ކަމެއް ކުރުމަކީ އެ ޕާޓީގެ ރައީސް އަދި ލީޑަޝިޕުން އެއްވެސް ވަރަކަށް ބަލައިގަންނަ ނުވަތަ ހިތްވަރުދޭނެ ކަމެއް ނޫން ކަމަށެވެ.
އެހެންކަމުން އުފެދިފައިވާ މައްސަލައަށް އަވަސް ހައްލެއް ގެނައުމަށާއި، ޕާޓީގެ މެންބަރުންނާއި ރައްޔިތުންގެ ހައްގުތައް ކަށަވަރުކޮށްދިނުމަކީ ޒިންމާދާރު ސިޔާސީ ޕާޓީއެއްގެ ހައިސިއްޔަތުން އެ ޕާޓީން ކުރަންޖެހޭ ކަމެއް ކަމަށް ދެކޭ ކަމަށް އެ ޕާޓީން ބުންޏެވެ. އަދި، ސައްހަ ނޫން ފޯމެއް މެދުވެރިކޮށް ކޮންގްރެސް ޕާޓީއަށް ވެއްދުމުގެ އެއްވެސް މައްސަލައެއް ކުރިމަތިވެފައިވާނަމަ އެ ޕާޓީއަށް މެއިލްކުރުމަށް ވަނީ އެދިފައެވެ.
"އެފަދަ ޚުސޫމާތުތަކަށް އަވަސް ހައްލެއް ގެނެސްދިނުމަށް ކުރެވެންހުރި ހުރިހާ ކަމެއް ކޮށްދޭނެކަމުގެ ކަށަވަރުކަން މި ޕާޓީގެ ފަރާތުން ދިވެހި އެންމެހާ ލޮބުވެތި ރައްޔިތުންނަށް އަރުވަން،" ޕީއެންސީން ބުންޏެވެ.
ޕީއެންސީއަށް މެންބަރުން ވައްދަނީ ވަގު ފޯމް ފުރައިގެން ކަމަށް ބުނެ، މި ފަހުން ވަނީ މައްސަލަ ބޮޑުވެފައެވެ. އެގޮތުން، އިއްޔެ ވަނީ އެމްޑީޕީއަށް ނިސްބަތްވާ، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) އޭނާއަށް ނޭނގި ޕީއެންސީއަށް ވެއްދި މައްސަލަ ވެސް ފެންމަތިވެފައެވެ. ޒިޔާދުގެ އިތުރުން ވެސް އެމްޑީޕީގެ ގައުމީ މަޖިލީހާއި، އާންމު ބައެއް މެންބަރުން ނޭނގި ޕީއެންސީއަށް ވައްދާފައިވާ ކަމަށް އެމްޑީޕީން ބުނެފައިވެއެވެ.
ނަމަވެސް، މެންބަރުކަމުގެ ގޮނޑި ނުގެއްލޭނެ ކަމަށާއި، އެ ކަމުގައި ޒިންމާވާ ފަރާތްތަކާމެދު ފިޔަވަޅު އަޅާނެކަމަށް އީސީން އިއްޔެ ވަނީ ބުނެފައެވެ.