އިދިކޮޅު އެމްޑީޕީގެ މެންބަރުންނަކީ ދީން ގަބޫލުނުކުރާ ބަޔެއް ކަމަށް ވިލިމާލެ ދާއިރާގެ، ވެރިކަން ކުރާ ޕީއެންސީއަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ މެންބަރު މުޙައްމަދު އިސްމާއިލް ވިދާޅުވި މައްސަލަ މަޖިލީހުގެ އިމްތިޔާޒާއި ސުލޫކު ކޮމިޓީއާއި ފުލުހުން ބެލުމަށް އެމްޑީޕީން މިއަދު ގޮވާލައިފިއެވެ.
ދައުލަތުގެ މީޑިއާއިން ކީރިތި ގުރުއާނުގެ އާޔަތްތަކަށް ބަދަލު ގެނެސްގެން ދައްކަމުން އަންނަ ކަމަށް ބުނެ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު މިއަދު ވަނީ މަޖިލީހަށް ކުއްލި މައްސަލައެއް ހުށަހަޅުއްވައިފައެވެ.
އެ މައްސަލައާ ގުޅޭ ގޮތުން ވާހަކަދައްކަވަމުން މުޙައްމަދު އިސްމާއީލް ވަނީ، އެމްޑީޕީގެ މެންބަރުންނަށް އިޝާރާތް ކުރައްވައި، އެއީ ކީރިތި ގުރުއާނާއި އިސްލާމް ދީން ގަބޫލުނުކުރާ ބައެއް ކަމަށް ވިދާޅުވެފައެވެ.
"މި ބޭފުޅުންނަކީ ކީރިތި ގުރުއާން ކީއްކުރަން އިސްލާމް ދީން ގަބޫލުކުރާ ބައެއް ވޭސް ނޫން، މި ރައްޔިތުންގެ މަޖިލީހުގައި އަޅުގަނޑު މި ދަންނަވަނީ. އެމްޑީޕީއަށް ނިސްބަތްވާ ގިނަ މެންބަރުން..." އޭނާ ވިދާޅުވިއެވެ.
މުޙައްމަދު އިސްމާއީލްގެ ވާހަކަ މެދުކަނޑާލެއްވީ މައުރޫފް ނިޒާމީ ނުކުތާއެއް ނަންގަވައި އެ ވާހަކަ ކުށްވެރިކުރެވުމުންނެވެ. އަދި މަޖިލީހުގެ ރައީސް އަބްދުއްރަހީމް އަބްދުﷲ ނިޒާމީ ނުކުތާ ބަލައިގަނެ، އެއްވެސް މެންބަރަކަށް އިޝާރާތް ކުރައްވައި އެއީ އިސްލާމް ދީން ގަބޫލުނުކުރާ މީހެއް ކަމަށް ވިދާޅުނުވުމަށް އެދިވަޑައިގަތެވެ.
އެމްޑީޕީގެ ރައީސް އަބްދުﷲ ޝާހިދު: އޭނާ ވަނީ މުހައްމަދު އިސްމާއީލް ދެއްކެވި ވާހަކަ މަޖިލީހުގެ ސުލޫކީ ކޮމިޓީން ބަލަން ގޮވާލައްވައިފައި -- ސަން ފޮޓޯއެއަށްފަހު މުޙައްމަދު އިސްމާއީލް ވާހަކަ ފެއްޓެވީ މައާފަށް އެދިވަޑައިގަންނަވަމުންނެވެ. ނަމަވެސް ނިމިދިޔަ އެމްޑީޕީ ސަރުކާރުގައި އެ ޕާޓީން ދީނާ ދެކޮޅަށް ވާހަކައްދައްކައި ތަފާތު ދީން ފަތުރަން މަސައްކަތް ކުރި ކަމަށާއި ކުއްލި މައްސަލަ ހުށަހެޅީ ވެސް ފިތުނަ ފަސާދަ އުފައްދައި ރައްޔިތުން ބައިބައި ކުރުމަށް ކަމަށް ތުހުމަތު ކުރެއްވިއެވެ.
އެ ވާހަކައާ ގުޅިގެން އެމްޑީޕީގެ ރައީސް އަބްދުﷲ ޝާހިދު އެކްސްގައި ކުރެއްވި ޓުވީޓެއްގައި ވަނީ އެ ވާހަކަ ކުށްވެރިކުރައްވައިފައެވެ. އަދި މުސްލިމަކު ކަނޑައެޅިގެން ކުފުރުގެ އަމަލެއް ނުކުރާހާ ހިނދަކު އެމީހަކީ މުރުތައްދުވެފައިވާ މީހެއްގެ ގޮތުގައި ސިފަކުރުމަކީ ޖިނާއީ ކުށެއް ކަމަށް ގާނޫނުލްއުގޫބާތުގެ 124 ވަނަ މާއްދާގައި ބަޔާންކޮށްފައިވާކަން އޭނާ ފާހަގަކުރެއްވިއެވެ.
ހަމައެއާއެކު، ދީނީ އެއްބައިވަންތަކަން ނަގައިލުމަށް މަސައްކަތް ކުރުމާއި އެ ބާވަތުގެ ވާހަކަދެއްކުމަކީ މަނާ ކަމެއްކަން ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގައި ބަޔާންކޮށްފައިވާ ކަމަށް ޝާހިދު ވިދާޅުވިއެވެ.
"ދިވެހިރައްޔިތުންގެ ތެރެއިން ގިނަ އަދަދެއްގެ ބަޔަކު ނިސްބަތްވާ ޕާޓީއެއްގެ މެންބަރުންނަކީ، މުސްލިމުން ނޫންކަމަށް ބުނުމަކީ ރައްޔިތުންގެ ތާއީދު ގެއްލި ސިޔާސީގޮތުން ބަލިވާން ފެށުމުން، އެކަން ފޫބެއްދުމަށް ޓަކައި ރައްޔިތުން ބައިބައި ކުރުމަށް ދީނީގޮތުން ފިތުނަ އުފެއްދުމަށް ފެށި ކަމެއްކަން ފާހަގަކުރެވެއެވެ." އޭނާ ވިދާޅުވިއެވެ.
އެހެންވެ، އެ މައްސަލަ ބަލައި ފިޔަވަޅު އެޅުމަށް މަޖިލީހުގެ ސުލޫކީ ކޮމިޓީއަށް ޝާހިދު ގޮވައިލެއްވިއެވެ.
މީގެ އިތުރުން އެމްޑީޕީން ނެރުނު ބަޔާނެއްގައި ވަނީ އިސްލާމް ދީން ފިޔަވައި އެހެން ދީނަކަށް ފުރުސަތު ނުދިނުމަކީ އެ ޕާޓީގެ މަގުސަދެއް ކަމަށް ޕާޓީގެ އަސާސީ ގަވައިދުގައި ބަޔާންކޮށްފައި ވާނެ ކަމަށެވެ. އަދި ގާނޫނުލްއުގޫބާތުގައި ޖިނާއީ ކުށެއް ކަމަށް ބެލެވޭ ކަމެއް ކޮށްފައިވާތީ، އެކަމުގައި ހިމެނޭ ކުށުގެ އަމަލު ތަހުުގީގު ކުރުމަށް އެ ޕާޓީން ގޮވާލިއެވެ.