އާޓިފިޝަލް ބީޗުގައި މިރޭ މާރާމާރީ ހިންގި މައްސަލައެއްގައި ތިން ބިދޭސީއަކު ފުލުހުންގެ ބެލުމުގެ ދަށަށް މިރޭ ގެނެސްފިއެވެ.
ފުލުހުން ބުނީ، އާޓިފިޝަލް ބީޗުގައި ބިދޭސީންތަކެއްގެ މެދުގައި މާރާމާރީއެއް ހިންގި މައްސަލައެއް މިރޭ 20:30 ހާއިރު ރިޕޯޓުކޮށްފައިވާ ކަަމަށެވެ.
މި މާރާމާރީގެ މަންޒަރު ރެކޯޑު ކުރި ދިވެއްސަކާ މެދުގައި ވެސް އެ ބިދޭސީން މާރާމާރީ ހިންގާފައިވާ ކަަމަށް ފުލުހުން މައުލޫމާތު ދިނެވެ.
މި މައްސަލައިގައި ވަނީ އިންޑިއާއަށް ނިސްބަތްވާ ތިން ބިދޭސީ ފިރިހެނުން ފުލުހުންގެ ބެލުމުގެ ދަށަށް ގެންގޮސްފައިވެއެވެ.
ފުލުހުން އަންނަނީ މައްސަލަ އިތުރަށް ތަހުގީގު ކުރަމުންނެވެ.
މިކަމާ ގުޅުން ހުރި ވީޑިއޯއެއް ސޯޝަލްމީޑިއާގައި ދައުރުވެފައިވާއިރު، އެވަގުތު އާޓިފިޝަލް ބީޗުގައި ގިނަ ބަޔަކު ހަރަކާތްތެރިވާ މަންޒަރު ފެނެއެވެ. އަދި، ފުލުހުން އެ ސަރަހައްދުގައި ހަރަކާތްތެރިވާ މަންޒަރު ފެންނައިރު، މީހަކު ފުލުސް ކާރަށް އަރުވާ ތަން ވެސް ފެނެއެވެ.
މި ފަހުން ވެސް އާޓިފިޝަލް ބީޗުގައި ބިދޭސީންގެ މާރާމާރީއެއް ހިންގައިފައިވެއެވެ.