ގަވައިދާ ޚިލާފަށް ރާއްޖޭގެ ކަނޑުގެ ސަރަހައްދުގައި ހަރަކާތްތެރިވަމުންދިޔަ މަސްބޯޓެއް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އަތުލައިގަނެފިއެވެ.
އެމްއެންޑީއެފުން ބުނީ އަތުލައިގަނެފައި ވަނީ ސްރީލަންކާއަށް ނިސްބަތްވާ މަސްބޯޓެއް ކަމަށެވެ.
އަދި އެ ބޯޓު އަތުލައިގަތީ ދިވެހިރާއްޖޭގެ މަސްވެރިކަމުގެ ގާނޫނާ ޚިލާފަށް ރާއްޖޭގެ ކަނޑުގެ ސަރަހައްދުގައި ހަރަކާތްތެރިވަމުން ދިޔުމުން ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ، އެ ބޯޓު އަތުލައިގަތް އިރު، އެ ބޯޓުގައި ހަ މީހުން ތިބި ކަމަށެވެ. އަދި އެމްއެންޑީއެފް ކޯސްޓް ގާޑުގެ ބެލުމުގެ ދަށުގައި އޮތުމަށްފަހު މިހާރު އެ ބޯޓު ފުލުހުންނާ ހަވާލުކޮށްފައިވާ ކަމަށް ވެސް ވަނީ ބުނެފައެވެ.
މީގެ ކުރިން ވެސް ރާއްޖޭގެ ކަނޑުގެ ސަރަހައްދުގައި އުޅޭ ކަނޑުފޭރޭ ބޯޓުތަކާއި، ގަވައިދާ ޚިލާފަށް އުޅޭ އެ ނޫން ވެސް މަސް ބޯޓު ފަހަރުތައް އަތުލައިގަނެފައިވެއެވެ.