މި ސަރުކާރުގެ ފުރަތަމަ އަހަރުގެ މަޝްރޫއުތައް ކުރިއަށްނުގެންދެވުނީ ނިމިދިޔަ މަޖިލީހުގެ ދައުރުގައި ފާސްކުރި ބަޖެޓުގައި އެ ފުރުސަތު ލިބިދީފައި ނެތުމުން ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވުމާ ގުޅިގެން، ކުރީގެ ފިނޭންސް މިނިސްޓަރު އިބްރާހީމް އަމީރު ރައްދުދެއްވައިފިއެވެ.
އއ. އަތޮޅާއި ކ. އަތޮޅުގެ ބައެއް ރަށްތަކަށް މިއަދު ރައީސް ފެއްޓެވި ދަތުރުފުޅުގައި ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ވަނީ، މި އަހަރަށް ފާސްކުރި ބަޖެޓުގައި މަޝްރޫއުތަކަށް ކުދިކުދި އަދަދުތައް ބަޖެޓުކޮށްފައި ހުރިކަމަށާއި އެ އަދަދުތަކުން މަޝްރޫއުތައް ނުހިންގޭ ކަމުގެ ކަންބޮޑުވުން ފާޅުކުރައްވައިފައެވެ.
އެ ވާހަކަފުޅާ ގުޅުވައި އަމީރު އެކްސްގައި ކުރެއްވި ޕޯސްޓެއްގައި ވިދާޅުވީ، މިދިޔަ އަހަރު ވެރިކަން ކުރާ އެމްޑީޕީގެ އަޣުލަބިއްޔަތު އޮތް މަޖިލީހަށް ސަރުކާރުން ބަޖެޓު ހުށަހެޅީ އަލަށް ހޮވުނު ސަރުކާރުގެ ޓްރާންޒިޝަން ކޮމިޓީގެ މަޝްވަރާއާއެކު ކަމަށެވެ.
އޭނާ ވިދާޅުވީ އެ ކޮމިޓީން ފޮނުވި ލިސްޓުގައި ހިމެނޭ ކަންތައްތައް އެ ބަޖެޓުގައި ހިމަނައިފައި ވާނެ ކަމަށެވެ.
"އެހެން ނޫނަސް ބަޖެޓު އޮތް ގޮތުން ކަންތައް ނުވިޔޭ، ވިދާޅުވާއިރު މި ހާލަތަށް އައީވެސް ސީދާ ބަޖެޓްގައި ނުވެސް ހިމެނޭ އާ ކަންތައްތަކެއް ކުރުމުގެ ސަބަބުން. ބަޖެޓް ޕްލޭނާ އެއްގޮތަށް ގެންދިޔަ ނަމަ އިގުތިސާދީ ހަރަކާތްތައް ނުހުއްޓި ކުރިޔަށް ދާނެ،" އަމީރު ވިދާޅުވިއެވެ.
ރައީސް ޑރ. މުޙައްމަދު މުއިއްޒާއި ފިނޭންސް މިނިސްޓަރު މޫސާ ޒަމީރު: މި ސަރުކާރުން ވަނީ މަޝްރޫއުތައް މަޑުޖެހިފައި ވަނީ މި އަހަރަށް ފާސްކުރި ބަޖެޓުގެ ސަބަބުން ކަމަށް ބުނެފައި -- ފޮޓޯ/ ރައީސް އޮފީސް
މި ސަރުކާރުން ބަޖެޓުން ބޭރުން ކޮށްފައިވާ ކަންތައްތަކުގެ ތެރޭގައި އޭނާ ފާހަގަކުރެއްވީ ފުށިދިއްގުރި ފަޅު ހިއްކުމަށް ކުރި ޚަރަދާއި ތުރުކީން ޑްރޯންތައް ގަންނަން 37 މިލިއަން ޑޮލަރު ހޭދަ ކުރުމެވެ. އަދި މި އަހަރުގެ މިހާތަނަށް, މިދިޔަ އަހަރާ އަޅައިބަލާއިރު މުސާރައަށް 1.425 ބިލިއަން ރުފިޔާ އިތުރަށް ޚަރަދުކޮށްފައިވާ ކަމަށް ވެސް އަމީރު ވިދާޅުވިއެވެ.
އެހެންވެ، މަޝްރޫއުތައް ނުހިނގަނީ ބަޖެޓުގެ ސަބަބުން ކަމަށް ވިދާޅުވުން މި ސަރުކާރުން ހުއްޓާލަން ވެއްޖެ ކަމަށް އޭނާ ވިދާޅުވިއެވެ.
"ތިބޭފުޅުންނަށް މިއަހަރު ނުވި ކަމެއް ކުރިޔަށް އޮތް ހަތަރު އަހަރުވެސް ނުވާނެ. ސަރުކާރު ބަދަލުވެ އާ ބޭފުޅަކު ބަޖެޓް ހުށަހެޅީމަ ޕްރޮޖެކްޓްތައް ކުއްލިޔަކަށް ހިނގަން ނުފަށާނެ. ކަންތައްތައް ކުރާނެ ވިސްނުމެއް ވެސް، ޤާބިލްކަމެއްވެސް އަދި އެ އިޚްލާސްތެރިކަމެއްވެސް ނެތް،" އަމީރު ލިޔުއްވާފައިވެއެވެ.
ރައީސްގެ އިތުރުން، އެ މަނިކުފާނުގެ ކެބިނެޓުގައި ހިމެނިވަޑައިގަންނަވާ ވަޒީރުން ވެސް ވަނީ މަޝްރޫއުތައް މަޑުޖެހިފައި ވަނީ އެމްޑީޕީ ސަރުކާރުގައި ފާސްކުރި ބަޖެޓުގައި އެކަށީގެންވާ ވަރަށް ފައިސާ ހަމަޖައްސައިފައި ނުވާތީ ކަމަށް ތަކުރާރުކޮށް ވިދާޅުވެފައެވެ.
މިއަދު ރައީސް ވިދާޅުވީ މި އަހަރު މިގޮތަށް ދިޔަ ނަމަވެސް، ކުރިއަށް އޮތް 2025 ވަނަ އަހަރާއި 2026 ވަނަ އަހަރުގެ ތެރޭގައި އެ މަނިކުފާނު ވެވަޑައިގެންފައިވާ ވައުދުތައް ފުއްދެން ފަށާނެ ކަމަށެވެ. އެގޮތުން ވަކި ތަރުތީބެއްގެ ތެރެއިން މުޅި ރާއްޖޭގައި މަޝްރޫއުތައް ކުރިއަށްދާނެ ކަމަށް އެ މަނިކުފާނު ވިދާޅުވިއެވެ.
އަންނަ އަހަރަށް ލަފާކޮށް މި ސަރުކާރުން ހުށަހެޅި 56.6 ބިލިއަން ރުފިޔާގެ ބަޖެޓު، ވެރިކަން ކުރާ ޕީއެންސީގެ އަޣުލަބިއްޔަތު އޮންނަ ރައްޔިތުންގެ މަޖިލީހުން ވަނީ ފާސްކޮށްފައެވެ. ނަމަވެސް ބަޖެޓު ފާސްކޮށްފައިވަނީ މަޝްރޫއުތަކުގެ ތަފުސީލު ނުހިމަނައެވެ.