ނޫސްވެރިކަމާއި އިންޓަނެޓްގެ ވަސީލަތްތައް ރެގިއުލޭޓްކުރަން ބިލެއް ތައްޔާރުކުރައްވަމުން ގެންދަވާ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ޕީއެންސީގެ މެންބަރު އަހުމަދު ނާޒިމް ވިދާޅުވި ނަމަވެސް، އެއީ ސަރުކާރާ ގުޅުން އޮތް ކަމެއް ނޫން ކަމަށް ތަރުޖަމާނު ހީނާ ވަލީދު މިއަދު ވިދާޅުވެއްޖެއެވެ.
ސަން އޮންލައިންގެ "އެޑިޓަރުގެ ސުވާލު" ޕްރޮގްރާމްގައި ވާހަކަ ދައްކަވަމުން ނާޒިމް ވަނީ، ނޫސްވެރިކަމާއި އިންޓަނެޓްގެ ވަސީލަތްތައް މިހާރު އޮންނަ ނިޒާމުގެ ތެރެއިން ސެލްފް ރެގިއުލޭޓްނުކުރެވޭ ކަމަށެވެ. އެހެންވެ، އެކަމާ ގުޅުން ހުރި ބިލެއްގެ މަސައްކަތް ކުރައްވާތާ ދެ މަހެއްހައި ދުވަސްވެއްޖެ ކަމަށް އޭނާ ވިދާޅުވިއެވެ.
އެ ވާހަކަފުޅާ ގުޅުވައި ހީނާ އެކްސްގައި ކުރެއްވި ޕޯސްޓެއްގައި ވިދާޅުވީ، ނޫސްވެރިކަމާއި އިންޓަނެޓް ރެގިއުލޭޓް ކުރާ ބިލެއް ތައާރަފު ކުރާން ސަރުކާރުން އެެއްވެސް މަސައްކަތެއް ނުކުރާ ކަމަށާއި އެއީ ސަރުކާރުން ހުށަހަޅަން ނިންމައިފައިވާ ބިލުތަކުގެ ތެރޭގައި ހިމެނޭ ބިލެއް ނޫން ކަމަށެވެ.
"ކުރިއަށްއޮތް ތަނުގައިވެސް އެފަދަ ބިލެއް ތައާރަފު ކުރުމުގެ ވިސްނުމެއްނެތް. ކުރިންވެސް ހާމަކުރައްވާފައިވާ ގޮތަށް މީޑިއާތައް ޑީ ރެގިއުލޭޓް ކުރުމާއެކު ސެލްފް ރެގިއުލޭޓަރީ ނިޒާމަކަށް ފުރުސަތު ދިނުން އެއީ ސަރުކާރުގެ ސިޔާސަތު،" އޭނާ ވިދާޅުވިއެވެ.
ހީނާ ވިދާޅުވީ މި ސަރުކާރުން އެންމެ ފުރަތަމަ ދުވަހުން ފެށިގެން ވެސް އެންމެ އިސްކަންދޭ ސިޔާސަތަކީ މީޑިއާގެ މިނިވަންކަން އެންމެ ފުޅާ ދާއިރާއެއްގައި ގާއިމުކޮށް ދެމެހެއްޓުން ކަމަށެވެ.
ނާޒިމް ވިދާޅުވެފައި ވަނީ، މެލޭޝިއާ ފަދަ ގައުމުތަކުގައި އޮންނަ ފަދަ މަލްޓި މީޑިއާ ކައުންސިލެއް އުފެއްދުމަކީ ރާއްޖެއަށް ވެސް ރަނގަޅު މޮޑެލްއެއް ކަމަށް ފެންނަ ކަމަށެވެ. އަދި ނޫސްވެރިކަމުގެ އިތުރުން، އިންޓަނެޓް ވެސް ރެގިއުލޭޓްކުރަން ޖެހޭ ކަމަށް އޭނާ ވިދާޅުވިއެވެ.
ނާޒިމް ވިދާޅުވީ، އޭނާ ތައްޔާރުކުރައްވާ ބިލުގެ މައިގަނޑު އެއް ބޭނުމަކީ އިންޓަނެޓާއި ސޯޝަލް މީޑިއާ އަދި ނޫސްވެރިކަން އެއް ފުރާޅެއްގެ ދަށުން ރެގިއުލޭޓްކުރުން ކަމަށެވެ.
އަންނަ ހަފުތާގެ ބުރާސްފަތި ދުވަހު މަޖިލީސް ހުޅުވުމާ އެކު މި ދައުރުގެ ތެރޭގައި އެ ބިލު ހުށަހަޅައި، ޚިޔާލަށް ފުރުސަތު ހުޅުވައިލެވޭނެ ކަމަށް އޭނާ ވިދާޅުވިއެވެ.
މި ސަރުކާރުގައި، ތުޅާދޫ ދާއިރާއަށް އަމިއްލަ ގޮތުން އިންތިޚާބުވި މެންބަރު އަބްދުﷲ ހަންނާން އަބޫބަކުރު، 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި މަޖިލީހަށް ބިލެއް ހުށަހެޅުމުން އެ ބިލާ ގުޅޭ ގޮތުން މީޑިއާތަކުން ކަންބޮޑުވުން ފާޅުކުރިއެވެ.
އެ ބިލު ހުށަހެޅުމާ އެކު ނޫސްވެރިން ވަނީ އެއީ 'މީޑިއާތައް ކޮންޓްރޯލްކުރާ' ބިލެއް ކަމަށް ބުނެ، އެ ބިލު ބޭރުކުރަން ގޮވާލައި ނުރުހުން ފާޅުކޮށްފައެވެ. ޕްރެޝަރު ބޮޑުވެ، އެންމެ ފަހުން ހަންނާން ވަނީ ބިލު އަނބުރާ ގެންގޮސްފައެވެ.
އެ ބިލާ ގުޅޭ ގޮތުން ނޫސްވެރިންގެ ކަންބޮޑުވުންތައް އޭރު ބަންޑާރަ ނައިބު އަޙުމަދު އުޝާމާ ހިއްސާކުރުމުން އޭނާ ވަނީ، ނޫސްވެރިންގެ ކަންބޮޑުވުންތައް ހައްލުކޮށްދެއްވާނެ ކަމުގެ ޔަގީންކަން ދެއްވައިފައެވެ. އަދި އެމްއެމްސީއާއި ބްރޯޑްކޮމް އުވާލައި، މީޑިއާ ރެގިއުލޭޓު ނުކުރާ ގޮތް ހެދުމަކީ އޭނާގެ ވިސްނުންފުޅެއްކަން އުޝާމް ފާހަގަކުރެއްވި ކަމަށް، އެ ބައްދަލުވުމުގައި ބައިވެރިވި ނޫސްވެރިން ބުންޏެވެ.