ވަގު ފޯމު ފުރައިގެން ޕާޓީއަށް މީހުން ވައްދަނީ އިދިކޮޅު އެމްޑީޕީން ކަމަށް ޕީއެންސީގެ ޕާލިމެންޓްރީ ގުރޫޕުގެ ލީޑަރު, އިނގުރައިދޫ ދާއިރާގެ މެންބަރު އިބްރާހީމް ފަލާހު މިއަދު ތުހުމަތުކުރައްވައިފިއެވެ.
ފަލާހު މިފަދައިން ތުހުމަތުކުރެއްވީ މަޖިލީހުގެ ދައުރުން ބޭރުން މިއަދު ބޭއްވި ފުރަތަމަ ޖަލްސާގައި އިލްކްޝަންސް ކޮމިޝަން (އީސީ)ގެ ހުސްވެފައިވާ ދެ މެންބަރުންގެ މަގާމަށް ބޭފުޅުން އައްޔަންކުރަން މިނިވަން މުއައްސަސާތަކާ ބެހޭ ކޮމިޓީން ނިންމި ރިޕޯޓަށް ވާހަކަދައްކަވަމުންނެވެ.
ފަލާހު ވިދާޅުވީ، އެ ޕާޓީއަށް 75،000 މެންބަރުން ހަމަވުމާ ގާތަށް ދަނީ ބުރަ މަސައްކަތްތަކެއް ކޮށްގެން ކަމަށެވެ.
ނުސީދާކޮށް އެމްޑީޕީއަށް ރައްދުދެއްވައި އޭނާ ވިދާޅުވީ، ކުރު މުއްދަތެއްގެ ތެރޭގައި އެހާ ބޮޑު އަދަދެއް ޕީއެންސީއަށް ވައްދަމުން އަންނާތީ ބައެއް ސިޔާސީ ޕާޓީތަކުން އެކަން ހަޖަމު ނުވެގެން އެކަން 'ގަޑުބަޑު' ކުރުމަށް އެ ޕާޓީތަކުން ބައެއް ބޭފުޅުން އަމިއްލަ ޕީއެންސީއަށް ވައްދެފައި އެބަހުރި ކަމަށެވެ.
މަޖިލީހުގެ ރައީސް އަބްދުއްރަހީމް އަބްދުﷲ --- ފޮޓޯ/ މަޖިލިސް
މިއަދު މިއީ ދިވެހިރާއްޖޭގެ ރައްޔިތުންނަށް މިކަން އެނގެން ޖެހޭ ދުވަހެއް. އަމިއްލަފުޅަށް މި ރައްޔިތުންގެ މަޖިލީހުގެ ބައެއް މެންބަރުން ޕީއެންސީއަށް ވަދެފައި އެބަހުރި ވަގަށް ފޯމު ކޮށްޕާލައިގެން. މީޑިއާއަށް މި މައްސަލަ ދީފައި ވަރަށް ނުބައި ކަންތައްތައް ކޮށްފައި،ޕީއެންސީގެ ޕާލިމެންޓްރީ ގުރޫޕުގެ ލީޑަރު އިބްރާހީމް ފަލާހު
އޭނާ ވިދާޅުވެފައިވަނީ އެމްޑީޕީއަށް ނިސްބަތްވާ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ވަގަށް ޕީއެންސީއަށް ވައްދާފައިވާ މައްސަލައެއް ފެންމަތިވެފައި ވަނިކޮށެވެ،
ފަލާހު ކުރެއްވި ތުހުމަތާ އެއްކޮށް، އެމްޑީޕީގެ މެންބަރުން ވަނީ ނިޒާމީ މައްސަލަތައް ނަންގަވައިގެން އެ ވާހަކަތައް ދޮގުކުރައްވައި އެ ކަމަށް ރައްދު ދެއްވާފައެވެ.
އެގޮތުން، ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވި ގޮތުގައި، މެންބަރު ޒިޔާދު ޕީއެންސީއަށް ވައްދާފައިވަނީ އޮޅުވާލައިގެންނެވެ. އެކަމާ ގުޅުވައި މަޖިލީހުގެ ރައީސް އަބްދުއްރަހީމް އަބްދުﷲ ވަނީ އެއީ ނިޒާމީ މައްސަލައެއް ނޫން ކަމަށް ނިންމަވައި، ޕީއެންސީއަށް ވަގަށް މެންބަރުން ވައްދާފައިވާ މައްސަލައަކީ ސާބިތު ނުހިފޭ ވާހައެއް ކަމަށް ވިދާޅުވެފައެވެ.
ކެންދޫ ދާއިރާގެ މެންބަރު މައުރޫފް ޒާކިރު: އޭނާ ވަނީ ފަލާހުގެ ތުހުމަތުތައް ދޮގު ކުރައްވާފައި --- ފޮޓޯ/ މަޖިލިސް
މައުރޫފުގެ ވާހަކައަށް ފަހު އަލުން ވާހަކަ ކުރިއަށް ގެންދަވަމުން ފަލާހު ވިދާޅުވީ، މެންބަރަކު އަމިއްލަފުޅަށް ޕީއެންސީއަށް ވަތް ކަމަށް ވިދާޅުވީ، އެ މެންބަރެއްގެ އަގު ވައްޓާލުމަށް ނޫން ކަމަށާއި މެންބަރު ޒިޔާދަކީ ކުރިން ވެސް އޭނާއަށް ނޭނގި އޮޅުވާލައިގެން ސީޔާސީ ޕާޓީތަކަށް ވައްދާފައި އޮތް ކަމަށް މައުލޫމާތު ލިބޭ ބޭފުޅެއް ކަމަށެވެ.
"އެހެންވީމާ އެއް މެންބަރެއް މި ވައްދަނީ ހުރިހާ ޕާޓީއަކަށް ވެސް އޮޅުވާލައިގެން. އަޅުގަނޑު ދަންނަވާލަން ބޭނުންވަނީ ޕާޓީގެ ރައީސް، ރައީސް ޑރ. މުޙައްމަދު މުއިއްޒަކީ ޚާއްސަ ގޮތެއްގައި އެ މަނިކުފާނު އަޅުގަނޑުމެންނާ ކަންކަން ހަވާލު ކުރައްވާފައި، ކަންކަމުގެ ލަފާފުޅާ އިރުޝާދު އެ ކަންކަން ކުރިއަށް ގެންދަން ދެއްވާއިރުގައި ވަރަށް އިޚްލާސްތެރިކަމާއި ތެދުވެރިކަމާއި އަމާނާތްތެރިކަމާ...." ފަލާހުގެ ވާހަކަ ފުރިހަމަ ނުވަނީސް ނިޒާމީ މައްސަލައަކަށް ހުޅުމާލޭ ދެކުނު ދާއިރާގެ މެންބަރު އަހުމަދު ޝަމްހީދަށް އަބްދުއްރަހީމް ފުރުސަތު އެރުއްވިއެވެ.
ޝަމްހީދު ވަނީ ޒިޔާދުގެ ފޯމު އީސީއަށް ވައްދާފައިވަނީ އޭނާ ނޫން ކަމަށް އީސީން ވެސް ނިންމާފައިވާ ކަމަށް ވިދާޅުވެފައެވެ. ނަމަވެސް، އަބްދުއްރަޙީމް ވިދާޅުވީ، އެފަދަ ނިންމުމެއް އީސީން މަޖިލީހަށް އަންގާފައިނުވާ ކަމަށާއި އެއީ ނިޒާމީ ނުކުތާއެއް ނޫން ކަމަށެވެ.
ހުޅުމާލޭ ދެކުނު ދާއިރާގެ މެންބަރު އަހުމަދު ޝަމްހީދު ---- ފޮޓޯ/ މަޖިލިސް
އިތުރަށް ވާހަކަދައްކަވަމުން ފަލާހު ވިދާޅުވީ، ޒިޔާދު އެހެން މީހެއް މެދުވެރިކޮށް ވެސް ފޯމު ފުރައިގެން ވައްދަފާނެ ކަމަށާއި ވަގަށް ކަންކަން ކުރާ ގޮތް ވަރަށް ރަނގަޅަށް އެމްޑީޕީއަށް އެނގޭނެ ކަމަށެވެ.
"އަޅުގަނޑަށް އެމްޑީޕީއަށް ވަދެވިދާނެ. އެމްޑީޕީ މިސާލަކަށް މިތާ އިންނަ ރައްޔިިތުންގެ މަޖިލީހުގެ މެންބަރެއް ލައްވާ ފޯމު ފުރާ، އޭނާ ލައްވާ ވެސް ފޯމު އެމްޑީޕީއަށް ލެވިދާނެ. އެއްގޮތަކަށް ވެސް މި ޒަމާނަކީ މި ބޭފުޅުން މިކިޔާ ގޮތަކަށް ނޫން" ފަލާހު ވިދާޅުވިއެވެ.
ޕީއެންސީގެ ޕީޖީ ލިޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާހު -- ސަން ފޮޓޯ/ މޫސާ ނަދީމް
ޕީއެންސީއަށް މީހުން ވެއްދިއިރު، އެ މީހުންނަށް ނޭނގި އެ ޕާޓީއަށް ވައްދާފައި ނޯންނާނެ ކަމަށާއި 75،000 މެންބަރުންގެ ބޮޑު މެންބާޝިޕެއް ކުރިއަށް ގެންދާއިރު، ވަގަށް ޕާޓީއަކަށް މީހަކު ވެއްދީ އަލަށްތޯ ފަލާހު ވަނީ ސުވާލު އުފައްދަފާއެވެ.
އެ މައްސަލައާ ގުޅިގެން ހޯމް މިނިސްޓަރު އަލީ އިހުސާންގެ އިތުބާރު ނެތްކަމުގެ މައްސަލަ އެމްޑީޕީން މަޖިލީހަށް ހުށަހަޅަން މަސައްކަތްކުރާތީ ވެސް ފަލާހު ވަނީ ހިންހަމަނުޖެހުން ފާޅު ކުރައްވާފައެވެ.
"މީގެ ކުރިން އަޅުގަނޑުމެން ވެސް އެބަހުރި ސިޔާސީ ޕާޓީތަކަށް ވައްދާފައި. މިއީ މާ ވަރުގަދަ ކަމަކަށް ހަދައި ދުނިޔޭގައި އަލަށްވީ ކަމަކަށް ހަދައި މިވާހަކައެއް ނެތް ދައްކާފައި، އިއްޒަތްތެރި ރައީސް. އެހެންވީމަ އަޅުގަނޑުމެން މެންބާޝިޕް ޑްރައިވް ހިންގިއިރަކު ޕީއެންސީއަކުން ނޯންނާނެ 75000 މެންބަރުން ވަންނައިރުގައި އޮވެދާނެ މި ބޭފުޅުން ވެސް [އެމްޑީޕީގެ މަޖިލިސް މެންބަރުން] މިކަންކޮށްފައޭ އަޅުގަނޑު މި ދެންނެވީ. ފިއްޓޭއަކީ މިތާ އިއްޒަތްތެރި މެންބަރަކީ އާންމުކޮށް މިކަންކޮށްފައި އޮތް މެންބަރެއް،" ފަލާހު ތުުހުމަތުކުރެއްވިއެވެ.
ފާހަގަކޮށްލެވޭ ގޮތުގައި ފިއްޓޭ ޕީއެންސީއަށް ވައްދާފައި އޮތީ އޭނާއަށް އެނގުމަކައިނުލާ ކަމަށް ނިންމައި، އީސީން ވަނީ އޭނާ އަލުން އެމްޑީޕީއަށް ބަދަލުކޮށްފައެވެ. އެ މައްސަލަ ބަލާނެ ކަމަށް ވެސް އީސީން ވަނީ އެ ދުވަހު ބުނެފައެވެ.
މި މައްސަލަ ބޮޑުވެ، ޕީއެންސީން ނެރުނު ބަޔާނެއްގައި އެ ޕާޓީން ވެސް ވަނީ ބައެއް 'ވަގު ފޯމު' ހުށަހެޅުނު ކަމަށް އެއްބަސްވެފައެވެ. އެކަމަކު، އެކަން ހިނގީ ޕާޓީގެ ތެރެއިން ފޯމުތަކުގެ ސައްހަކަން ކަށަވަރުކުރެވެން ނުހުންނާތީ ކަމަށް ބުނެ، އެ ޕާޓީން ވަނީ އެއީ ގަސްތުގައި ކުރި ކަމެއްކަމަށް ކުރާ ސީރިއަސް ތުހުމަތުތައް ދޮގުކޮށްފައެވެ.