ތިން މިނިސްޓްރީއެއް ރޯވެ ހިނގި އަލިފާނުގެ ބޮޑު ހާދިސާގައި ތަހުގީގަށް ގެނައި އިންޑިއާގެ ޓީމު ފުރީ ހަފުތާއެއް ކުރިން ކަމަށާއި، އެ ޓީމާ ހިއްސާކުރި ސީސީޓީވީ ފުޓެޖު ފަދަ މައުލޫމާތު ދިރާސާކޮށް ހޯދުންތައް ހިއްސާކުރާނެ ކަމަށް ފުލުހުން މިއަދު ބުނެފިއެވެ.
ސަރުކާރުގެ ތިން މިނިސްޓްރީއެއް ހިންގަމުންއައި އިމާރާތުގައި މިމަހުގެ 12 ވަނަ ދުވަހު ހިނގި އަލިފާނުގެ ހާދިސާގެ ތަހުގީގަށް ބޭރުގެ ޓީމެއްގެ އެހީތެރިކަން ހޯދާނެ ކަމަށް ޕޮލިސް ކޮމިޝަނާ އަލީ ޝުޖާއު ވިދާޅުވީ މި މަހުގެ 14 ވަނަ ދުވަހުގައެވެ.
އެއަށްފަހު މި މަހުގެ 20 ވަނަ ދުވަހު މީޑިއާތަކާ ހިއްސާކުރި މެސެޖެއްގައި ފުލުހުންވަނީ އަލިފާނުގެ ހާދިސާއާ ގުޅިގެން ކުރަމުންދާ ތަހުގީގުގައި، އިންޑިއާގެ ތަޖުރިބާކާރުންގެ ޚާއްސަ ޓީމެއް ދިވެހި ފުލުހުންނާއެކު ހަރަކާތްތެރިވަމުން އަންނަ ކަމަށް ބުނެފައެވެ.
"ސަން" އަށް މައުލޫމާތު ދެއްވަމުން ފުލުހުންގެ ތަރުޖަމާނު ހެޑް އޮފް ސާވިސް ޑިވެލޮޕްމެންޓް ޑިރެކްޓްރޭޓް އަހުމަދު ޝިފާން ރޭ ވަނީ ތަހުގީގަށް އައި އިންޑިއާގެ ޓީމު ފުރައިފައިވާކަމަށް ވިދާޅުވެފައެވެ. ޝިފާން ރޭ ވިދާޅުވީ ތަހުގީގަށް އައި އިންޑިއާގެ ޓީމު ފުރީ ހަތަރު ދުވަހު މަސައްކަތް ކުރުމަށްފަހުގައި ކަމަށެވެ.
މިއަދު ފުލުހުން މީޑިއާތަކާއި ހިއްސާކުރި މެސެޖެއްގައި ވަނީ
އިންޑިއާގެ ތަޖުރިބާކާރުންގެ ޓީމުން ހާދިސާ ހިނގި ތަން ބަލައި، ތަހުގީގު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާކޮށްފައި ވާކަމަށެެވެ. އަދި ހާދިސާއާ ގުޅޭ ފޮޓޯއާއި ވީޑިއޯގެ އިތުރުން ސީސީޓީވީ ފުޓޭޖާއި ހާދިސާއާ ގުޅުންހުރި މުހިންމު މައުލޫމާތުތައް ޓީމާ ހިއްސާކޮށްފައިވާ ކަމަށް ފުލުހުން ވަނީ ބުނެފައެވެ.
ފުލުހުން ވަނީ އެ ޓީމަށް ފޯރުކޮށްދިން މައުލޫމާތުތަކާއި ތަކެތި ދިރާސާކުރުމަށްފަހު އެ ޓީމުގެ ހޯދުންތައް ދިވެހި ފުލުހުން ހިއްސާކުރުމަށް ހަމަޖެހިފައި ވާކަމަށް ބުނެފައެވެ.
ފާހަގަކޮށްލެވޭ ގޮތުގައި ބޭރުގެ ތަހުގީގީ ޓީމަކުން ދިވެހި ފުލުހުންނާ ބައިވެރިވެފައިވާއިރު އެ ހާދިސާއާ ގުޅިގެން ބޭނުން ނުކުރެވޭ ވަރަށް އެނދި އިމާރާތް ހުރި ބިން ސާފުކުރުމުގެ މަސައްކަތް މިނިސްޓްރީ އޮފް ސިޓީސް, ލޯކަލް ގަވަމެންޓް ޕަބްލިކް ވޯކްސް އިން ވަނީ ކޮށްފައެވެ.
އެކަމާ ގުޅިގެން ގިނަ ބައެއް، ޚާއްސަކޮށް އިދިކޮޅުން ވަނީ ތަހުގީގެއް ކުރިއަށް ދަނިކޮށް އެ ތަން ސާފުކޮށްގެން ނުވާނެ ކަމަށް ބުނެ ފާޑުކިޔުން އަމާޒުކޮށްފައެވެ. އަދި އެކަން ކުރަނީ ސަރުކާރުން ކަމެއް ފޮރުވަން ވެގެން ކަމަށް ވެސް ތުހުމަތުތައްކޮށްފައިވެއެވެ.
އެ ހާދިސާގައި ގެއްލުން ލިބުނު ތިން މިނިސްޓްރީގެ މަސައްކަތްތައް ވަގުތީގޮތުން ވަނީ ދަރުބާރުގެއަށް ބަދަލުކޮށްފައެވެ. އަދި ސިޓީ ކައުންސިލުން ވެސް ގެއްލުން ލިބުނު ލިޔެކިޔުންތައް ތަރުތީބުކޮށް، ރިކަވާ ކުރުމުގެ މަސައްކަތްތައް މިހާރު ގެންދަނީ ކުރަމުންނެވެ.