ތިން މިނިސްޓްރީއެއް ރޯވެ ހިނގި އަލިފާނުގެ ބޮޑު ހާދިސާގައި ތަހުގީގަށް ގެނައި އިންޑިއާގެ ޓީމުން ފުރާފައި ވާކަމަށް ފުލުހުން މިއަދު ބުނެފިއެވެ.
ސަރުކާރުގެ ތިން މިނިސްޓްރީއެއް ހިންގަމުންއައި އިމާރާތުގައި މިމަހުގެ 12 ވަނަ ދުވަހު ހިނގި އަލިފާނުގެ ހާދިސާގެ ތަހުގީގަށް ބޭރުގެ ޓީމެއްގެ އެހީތެރިކަން ހޯދާނެ ކަމަށް ޕޮލިސް ކޮމިޝަނާ އަލީ ޝުޖާއު ވިދާޅުވީ މި މަހުގެ 14 ވަނަ ދުވަހުގައެވެ.
އެއަށްފަހު މި މަހުގެ 20 ވަނަ ދުވަހު މީޑިއާތަކާ ހިއްސާކުރި މެސެޖެއްގައި ފުލުހުންވަނީ އަލިފާނުގެ ހާދިސާއާ ގުޅިގެން ކުރެވެމުންދާ ތަހުގީގުގައި، އިންޑިއާގެ ތަޖުރިބާކާރުންގެ ޚާއްސަ ޓީމެއް ދިވެހި ފުލުހުންނާއެކު ހަރަކާތްތެރިވަމުން އަންނަ ކަމަށް ބުނެފައެވެ.
މިއަދު "ސަން" އަށް މައުލޫމާތު ދެއްވަމުން ފުލުހުންގެ ތަރުޖަމާނު ހެޑް އޮފް ސާވިސް ޑިވެލޮޕްމެންޓް ޑިރެކްޓްރޭޓް އަހުމަދު ޝިފާން ވަނީ ތަހުގީގަށް އައި އިންޑިއާގެ ޓީމް މިހާރު ފުރައިފައިވާކަމަށް ވިދާޅުވިއެވެ.
ޝިފާން ވިދާޅުވީ ތަހުގީގަށް އައި އިންޑިއާގެ ޓީމު ފުރީ ހަތަރު ދުވަހު މަސައްކަތް ކުރުމަށްފަހު ކަމަށެވެ. ނަމަވެސް މި މައްސަލައިގެ އިތުރު މައުލޫމާތެއް ޝިފާން ހިއްސާނުކުރައްވައެވެ.
ފާހަގަކޮށްލެވޭ ގޮތުގައި ބޭރުގެ ތަހުގީގީ ޓީމަކުން ދިވެހި ފުލުހުންނާ ބައިވެރިވެފައިވާއިރު އެ ހާދިސާއާ ގުޅިގެން ބޭނުން ނުކުރެވޭ ވަރަށް އެނދި އިމާރާތް ހުރި ބިން ސާފުކުރުމުގެ މަސައްކަތް މިނިސްޓްރީ އޮފް ސިޓީސް, ލޯކަލް ގަވަމެންޓް ޕަބްލިކް ވޯކްސް އިން ވަނީ ކޮށްފައެވެ.
އެކަމާ ގުޅިގެން ގިނަ ބައެއް، ޚާއްސަކޮށް އިދިކޮޅު ބޭފުޅުން ވަނީ ތަހުގީގެއް ކުރިއަށް ދަނިކޮށް އެ ތަން ސާފުކޮށްގެން ނުވާނެ ކަމަށް ބުނެ ފާޑުކިޔުން އަމާޒުކޮށްފައެވެ. އަދި އެކަން ކުރަނީ ސަރުކާރުން ކަމެއް ފޮރުވަން ވެގެން ކަމަށް ވެސް ތުހުމަތުތައްކޮށްފައިވެއެވެ.
އެ ހާދިސާގައި ގެއްލުން ލިބުނު ތިން މިނިސްޓްރީގެ މަސައްކަތްތައް ވަގުތީގޮތުން ވަނީ ދަރުބާރުގެއަށް ބަދަލުކޮށްފައެވެ. އަދި ސިޓީ ކައުންސިލުން ވެސް ގެއްލުން ލިބުނު ލިޔެކިޔުންތައް ތަރުތީބުކޮށް، ރިކަވާ ކުރުމުގެ މަސައްކަތްތައް މިހާރު ގެންދަނީ ކުރަމުންނެވެ.