ސަރުކާރުގެ ތިން މިނިސްޓްރީއެއް ހިންގަމުން އައި އިމާރާތުގައި މިމަހުގެ 12 ވަނަ ދުވަހު ހިނގި އަލިފާނުގެ ހާދިސާގެ ތަހުގީގާ އިންޑިއާގެ ތަޖުރިބާކާރުންގެ ޚާއްސަ ޓީމަކުން ގުޅިއްޖެއެވެ.
އަލިފާނުގެ ހާދިސާ ހިނގީ ހައުސިން މިނިސްޓްރީ، އިންފްރާންސްޓްރަކްޗާ މިނިސްޓްރީ އަދި އެންވަޔަރަމަންޓް މިނިސްޓްރީގެ އިތުރުން މާލޭ ސިޓީ ކައުންސިލުގެ މަސައްކަތްތައް ވެސް ކުރަމުން އައި ދެ އިމާރާތެއްގައެވެ.
ކޮމިޝަަނާ އޮފް ޕޮލިސް، އަލީ ޝުޖާއު މީޑިއާތަކަށް ފޮނުއްވި މެސެޖެއްގައި މިއަދު ވިދާޅުވީ، މ. ގްރީން ބިލްޑިންގައި ހިނގި އަލިފާނުގެ ހާދިސާއާ ގުޅިގެން ކުރެވެމުންދާ ތަހުގީގުގައި، އިންޑިއާގެ ތަޖުރިބާކާރުންގެ ޚާއްސަ ޓީމެއް މިހާރު ދިވެހި ފުލުހުންނާއެކު ހަރަކާތްތެރިވަމުން އަންނަ ކަމަށެވެ.
މީގެ ކުރިން ވެސް އެ ހާދިސާގެ ތަހުގީގަށް ބޭރުގެ ޓީމެއްގެ އެހީ ހޯދާނެ ކަމަށް ޝުޖާއު ވިދާޅުވެފައިވެއެވެ.
މިހާތަނަށް ވެސް އެ ހާދިސާ ހިނގަން މެދުވެރިވި ސަބަބެއް ސާފުވެފައެއް ނުވެއެވެ. އަދި ސީޕީ މީގެ ކުރިން ވިދާޅުވީ އެ ހާދިސާގެ ތަހުގީގު އަދިވެސް ކުރިއަށްދާތީ އެއީ ކިހިނެއް ހިނގި ހާދިސާއެއްކަން ބުނަން މިވަގުތު ދަތި ކަމަށެވެ.
އަލިފާން ރޯވި އިމާރާތް އަނދާ ހުލިވެފައި -- ސަން ފޮޓޯ/ ނާއިޝް ނާހިދު
ފާހަގަކޮށްލެވޭ ގޮތުގައި ބޭރުގެ ތަހުގީގީ ޓީމަކުން ދިވެހި ފުލުހުންނާ ބައިވެރިވެފައިވާއިރު އެ ހާދިސާއާ ގުޅިގެން ބޭނުން ނުކުރެވޭ ވަރަށް އެނދި އިމާރާތް ހުރި ބިން ސާފުކުރުމުގެ މަސައްކަތް މިނިސްޓްރީ އޮފް ސިޓީސް, ލޯކަލް ގަވަމެންޓް ޕަބްލިކް ވޯކްސް އިން ވަނީ ކޮށްފައެވެ.
އެކަމާ ގުޅިގެން ގިނަ ބައެއްގެ، ވަކިން ޚާއްސަކޮށް އިދިކޮޅު ބޭބޭފުޅުންގެ ފާޑުކިޔުންތައް ވަނީ އަމާޒުވެފައެވެ. ސަބަބަކީ ތަހުގީގެއް ހިންގުމަށްޓަކައި ބޭނުންވާ ތަނެއް ސާފުކުރުމުގެ މާނައެއް ނެތް ކަމަށް ބުނެއެވެ. އަދި އެކަން ކުރަނީ ސަރުކާރުން ކަމެއް ފޮރުވަން ވެގެން ކަމަށް ވެސް ތުހުމަތުތައްކޮށްފައިވެއެވެ.
ފުލުހުން ގެންދަނީ ރޯވި މަންޒަރު އެންމެ ފުރަތަމަ ދުށް މީހުންގެ ބަޔާންތައް ނެގުމުގެ މަސައްކަތާއި އެ ހާދިސާގެ މައުލޫމާތު އެންމެ ފުރަތަމަ ލިބޭނެ ކަމަށް ބެލެވޭ މީހުން ހޯދައި ސުވާލުކުރުމުގެ މަސައްކަތް ކުރަމުންނެވެ. އަދި ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ ހިއްސާކުރުމަށް ވެސް ފުލުހުން ވަނީ އެދިފައެވެ.
އެ ހާދިސާގައި ގެއްލުން ލިބުނު ތިން މިނިސްޓްރީގެ މަސައްކަތްތައް ވަގުތީގޮތުން ވަނީ ދަރުބާރުގެއަށް ބަދަލުކޮށްފައެވެ. އަދި ސިޓީ ކައުންސިލުން ވެސް ގެއްލުން ލިބުނު ލިޔެކިޔުންތައް ތަރުތީބުކޮށް، ރިކަވާ ކުރުމުގެ މަސައްކަތްތައް މިހާރު ގެންދަނީ ކުރަމުންނެވެ.