ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން މެންބަރުކަން ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ދެކޮޅުވުމުން ގޮނޑި ގެއްލިއްޖެ ނަމަ އެ މެންބަރަކު އަލުން ހޮވަން އެމްޑީޕީން އެހީވާނެ ކަމަށް ބުނެ، އެ ޕާޓީގެ ގައުމީ މަޖިލީހުން ގަރާރެއް ފާސްކޮށްފިއެވެ.
އެމްޑީޕީން މިރޭ 'ގާނޫނު އަސާސީގެ ދިފާއުގައި'ގެ ނަމުގައި ޖަލްސާ ބޭއްވުމުގެ ކުރިން ވަނީ، ގައުމީ މަޖިލީހުގެ ޖަލްސާއެއް ބާއްވައިފައެވެ.
އެ ޖަލްސާގައި ވަނީ ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ވެސް މެންބަރުކަން ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ދެކޮޅަށް ގަރާރަކާއި ޕެޓިޝަނެއް ފާސްކޮށްފައެވެ.
އެ ގަރާރުގައި ގާނޫނު އަސާސީއަށް ގެނައި އިސްލާހު ކުރިން އޮތް ގޮތަށް ބަދަލު ކުރުމަށް ގޮވާލައި، އެ ބަދަލު ގެންނަންދެން އިސްލާހާ ދެކޮޅަށް ރާއްޖޭގެ އެކި ސަރަހައްދުތަކުގައި އިހުތިޖާޖު ކުރުމަށާއި އެ އިސްލާހުގެ ސަބަބުން އަންނަ ބަދަލުތަކަށް މީހުން ހޭލުންތެރިކުރުމަށް ހިމަނައިފައިވެއެވެ.
އެމްޑީޕީގެ ގައުމީ މަޖިލީހުގެ ޖަލްސާ: ގާނޫނު އަސާސީގެ އިސްލާހާ ދެކޮޅުވުމުން ގޮނޑި ގެއްލިއްޖެ ނަމަ އެ މެންބަރަކު އަލުން ހޮވަން އެމްޑީޕީން އެހީވާނެ ކަމަށް ބުނާ ގަރާރެއް ވަނީ ފާސްކޮށްފައި -- ސަން ފޮޓޯ/ މޫސާ ނަދީމް
އެ ހަރަކާތްތަކުގައި ބައިވެރިވުމަށް ސިޔާސީ ޕާޓީތަކާއި މަދަނީ ޖަމިއްޔާތަކާއި ފަންނީ މީހުންނަށް ދައުވަތުދީ، ގުޅިގެން މަސައްކަތް ކުރުމަށް ގަރާރުގައިވެއެވެ. އެގޮތުން އެމްޑީޕީއާ ގުޅިގެން މަސައްކަތް ކުރާ މަޖިލިސް މެންބަރުންނަށް ވެސް އެހީވާނެ ކަމަށް އެ ގަރާރުގައި ބުނެފައިވެއެވެ. އެއީ:
- ރައްޔިތުންގެ ހައްގުގައި ވަކާލާތު ކުރުމުގެ ގޮތުން ބުނި ބަހެއްގެ ސަބަބުން ނުވަތަ ވޯޓު ދިނުމުގައި އަމަލު ކުރި ގޮތެއްގެ ސަބަބުން އެ މެންބަރަކު ނިސްބަތްވާ ސިޔާސީ ޕާޓީން ވަކިކުރުން
- ރައްޔިތުންގެ މަސްލަހަތުގައި މި ޕާޓީން ކުރަމުންގެންދާ މަސައްކަތުގައި ބައިވެރިވުމުގެ ގޮތުން އެ މެންބަރަކު ނިސްބަތްވާ ޕާޓީއަކުން ވަކިވެ އެމްޑީޕީގެ މެންބަރަކަށް ވުމުގެ ސަބަބުން އެ މެންބަރަކު ރައްޔިތުންގެ މަޖިލީހުގެ މެންބަރުކަމުން ވަކިވުން
އެ ހާލަތްތަކުގައި އެ މެންބަރަކަށް އެމްޑީޕީން އެހީތެރިވާނެ ކަމަށް ގަރާރުގައިވެއެވެ.
"އެ މެންބަރަކު ތަމްސީލު ކުރި ދާއިރާއިން ރައްޔިތުންގެ މަޖިލީހަށް އެ މެންބަރަކު އިންތިޚާބު ކުރުމަށް ބާއްވާ ބައި އިލެކްޝަންގައި ރައްޔިތުންގެ މަޖިލީހުން ވަކިކުރި މެންބަރު ވާދަކުރާނަމަ މި ޕާޓީން އެ މެންބަރަކަށް ތާއިދު ކުރުމަށާއި އެ މެންބަރަކު އަލުން ރައްޔިތުންގެ މަޖިލީހަށް އިންތިޚާބު ކުރުމަށް ދިވެހި ރައްޔިތުންގެ ޑިމޮކްރެޓިކް ޕާޓީގެ ފަރާތުން މަސައްކަތް ކޮށްދިނުމަށް އެއްބަސްވެ މަތީގައި ބުނެވުނު އެންމެހާ ކަންކަމެއް ކުރުމަށް ދިވެހި ރައްޔިތުންގެ ޑިމޮކްރެޓިކް ޕާޓީގެ ގައުމީ މަޖިލިސް އިގުރާރުވަމެވެ." އެ ގަރާރުގައިވެއެވެ.
މީގެ އިތުރުން ގައުމީ މަޖިލީހަށް ހުށަހެޅި ޕެޓިޝަނުގައި ވަނީ އެ އިސްލާހު ބާތިލުކުރުމަށް މަޖިލީހަށާއި ރައީސް ޑރ. މުޙައްމަދު މުއިއްޒަށް ގޮވާލައިފައެވެ.
އެ ގަރާރާއި ޕެޓިޝަނަށް ވޯޓަށް އެހުމުން، ގައުމީ މަޖިލީހުގައި މިއަދު ބައިވެރިވެވަޑައިގެންނެވި 89 މެންބަރުންގެ އިއްތިފާގުން ވަނީ ފާސްކޮށްފައެވެ.
ގާނޫނުއަސާސީއަށް އިސްލާހުތަކެއް ސަރުކާރުގެ ފަރާތުން ހުށަހެޅީ މިދިޔަ މަހުގެ 20ގައެވެ. ހަމަ އެ ދުވަހު އެ ބިލު މުޅި މަޖިލީހުގެ ކޮމިޓީން ފާސްކޮށް، ހަވީރު ވަނީ ތަޅުމުން ފާސްކޮށްފައެވެ. އެއަށްފަހު އިރުއްސުނު ވަގުތު ރައީސް ވަނީ އެ ބިލު ތަސްދީގުކުރައްވައިފައެވެ.
އެ އިސްލާހުގައި ވަނީ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭނެ ކަމަށެވެ.
އެ އިސްލާހާ ދެކޮޅަށް އިދިކޮޅު ސިޔާސީ ފިކުރުތަކަށް ނިސްބަތްވާ ބޭފުޅުންނާއި ގާނޫނީ ދާއިރާގެ ބޭފުޅުން ވެސް ކަންބޮޑުވުން ފާޅުކުރެއްވިއެވެ.
އެ އިސްލާހާ ދެކޮޅަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު، ގާނޫނީ ވަކީލު އަލީ ހުސައިން ވަނީ ސުޕްރީމް ކޯޓަށް މައްސަލައެއް ހުށަހަޅައިފައެވެ. އަދި އެ ކޯޓުން ވަނީ މައްސަލަ ބަލައިގެންފައެވެ.