މަގުމަތިން ސަރުކާރު ވައްޓާލުމަށް ޓަކައި އެމްޑީޕީން މަސައްކަތްކުރާ ކަމުގެ ތުހުމަތު، ޕީއެންސީ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު މިއަދު ތުހުމަތުކުރައްވައިފިއެވެ.
ފަލާހު އެފަދައިން ތުހުމަތުކުރެއްވީ ރައީސް ޑރ. މުހައްމަދު މުއިއްޒަށް ހައްދަވަން ޖެހޭނީ ކުރީގެ ރައީސް މުހައްމަދު އަމީން ދީދީއަށް ހެއްދެވި ގޮތް ކަމަށް ބުނެ އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއިލް ދެއްކެވި ވާހަކައާ ގުޅުވައިގެންނެވެ.
އެ މައްސަލަ ހޫނުވެ، މިއަދުގެ މަޖިލީހަށް ވެސް ވަނީ ކުއްލި މައްސަލައެއް ހުށަހަޅާފައެވެ.
އެ މައްސަލައަށް ބަހުސްކުރައްވައި، ފަލާހު ވިދާޅުވީ އެމްޑީޕީގެ ނޫން އެހެން ޕާޓީއެއް ވިޔަސް، އަދި އެ ނޫން ކޮންމެ ރައްޔިތެއް ވިޔަސް އެފަދަ ވާހަކަދެއްކުމަކީ ވަރަށް ނުރައްކާތެރި ކަމެއް ކަމަށެވެ.
އެހެންނަމަވެސް އެމްޑީޕީއަކީ އެ ޕާޓީގެ ތެރެއިން ވެރިކަންކޮށްފައި ހުރި ވެރިއަކު އަވަހާރަކޮށްލަން މަސައްކަތްކުރި ޕާޓީއެއް ކަމަށް ފަލާހު ތުހުމަތުކުރެއްވިއެވެ.
އެ ވާހަކައިގައި ފަލާހު އިޝާރާތްކުރެއްވީ މޭ ހައެއްގެ ހަމަލާއަށެވެ.
"...2023 ވަނަ އަހަރު އޮތް ރިޔާސީ އިންތިޚާބުގައި ރައީސް [މުޙައްމަދު] ނަޝީދު ކުރިމަތިލައްވާނެ ކަމަށް ހީފުޅުކުރައްވައިގެން ކުރެވުނު ބައެއް ތަހުގީގުތަކުން ވެސް ހީވަނީ މި ތުހުމަތު އެޅެނީ އެމްޑީޕީގެ ވެރިންގެ ބޮލުގައިހެން އެމަނިކުފާނު އަވަހާރަކޮށްލަންވެގެން ވެސް ހަމަލާތަކެއް ދީފައި އޮތް ޕާޓީއެއް އެމްޑީޕީއަކީ،" ފަލާހު ވިދާޅުވިއެވެ.
"އެމްޑީޕީއަކީ 2012 ވަނަ އަހަރު ޕޮލިސް ސްޓޭޝަންތަކާއި އެހެނިހެން އިމާރާތްތަކާއި ދައުލަތުގެ މުއައްސަސާތައް އަންދައިލާފައިވާ ބައެއް. އާންމުންގެ އެތައް ކާރުތަކާއި އާންމުންނަށް ވެސް އެތައް ހަމަލާތަކެއް ދީފައި ތިބި ބައެއް. ކިތައް ސަތޭކަ މިލިއަން ރުފިޔާގެ ގެއްލުންތޯ އެއީ ދައުލަތަށް،" ފަލާހު ވިދާޅުވިއެވެ.
ފަލާހު ވިދާޅުވީ އެމްޑީޕީގެ އާންމު ރައްޔިތުން ލައްވާ އެފަދަ ވާހަކަތައް ފެތުރުމަކީ އެމްޑީޕީގެ ލީޑަޝިޕުން ކުރާ ނުބައި އަމަލެއް ކަމަށެވެ. އެކަމުގެ ސަބަބުން އެމްޑީޕީގެ އާންމު ރައްޔިތުން ޖަލަށް ދާންޖެހުން ވެސް އެކަށީގެންވާ ކަމަށް އޭނާ ވިދާޅުވިއެވެ.
"ހަގީގަތުގައި މި އުޅެނީ 2028 މާބޮޑަށް އެމްޑީޕީގެ ބޮލަށް ވަދެގެން ކަމަށް. އޭގެ ތެރޭގައި އެބައުޅޭ ދެތިން ހަތަރު ބޭފުޅުންނެއް ވެސް. ދެން ވެދާނެ ފައްޔާޒަކީ މީގެ ތެރޭގަ ހުރި އެންމެ ބޯ ނުބައި މީހާ ކަމަށް ވެސް. އަބްދުﷲ ޝާހިދު ލަނޑެއް ދިނީ ކަމަށް ވެސް ވެދާނެ،" ފަލާހު ވިދާޅުވިއެވެ.
އެމްޑީޕީގެ ރައީސާއި ޗެއާޕާސަން -- ފޮޓޯ/ އެމްޑީޕީ
ފަލާހު ވަނީ ފައްޔާޒު ދެއްކެވި ވާހަކަ ކަމާބެހޭ އިދާރާތަކުން ބަލާ ތަހުގީގުކުރަންޖެހޭ ކަމަށް ވިދާޅުވެފައެވެ. މިހާ ސީރިއަސް މައްސަލައެއްގައި އެގޮތަށް ކުއްލި މައްސަލައެއް ހުށަހަޅައިގެން ބަހުސްކުރުމުން އަދި ނުފުދޭ ކަމަށް އޭނާ ވިދާޅުވިއެވެ.
އެ މީހަކު ފުލުހަށް ހާޒިރުކޮށް ކީއްވެ ދައްކާ ވާހަކަތަކެއްތޯ ބަލައި ތަހުގީގުކުރަންޖެހޭ ކަމަށް ފަލާހު ވިދާޅުވިއެވެ. އެހެންނޫން ނަމަ އެފަދަ އަމަލުތައް ހިންގަން ފަށައި ގައުމެއްގެ ސިފަ ގެއްލިދާނެ ކަމަށް ފަލާހު ވިދާޅުވިއެވެ.
އަދި އެފަދަ މައްސަލައެއް ބަލަން ޖެހޭނީ މީހަކަށް ބަޑިޖަހައި، މަރާލައި އެ މައްސަލަ ފުލުހުންނަށް ހުށަހެޅީމައިތޯ ވެސް ފަލާހު ވަނީ ސުވާލު އުފައްދަވައިފައެވެ.
"ކަމާ ގުޅުން ހުރި އިދާރާތަކަށް އަޅުގަނޑު ގޮވައިލަން މިއީ ވަރަށް ސީރިއަސް މައްސަލައެއް. މި މައްސަލަ ނުބަލާ ދުކޮށްލައިގެން ނުވާނެ. ދޫކޮށްލާކަމަށްވާނަމަ މިފަދަ ކުށްތައް ތަކުރާރުވެ ގައުމެއް ހަލާކުގެ ތެރެއަށް ވެއްޓިގެން ހިނގައިދާނެ. ގާނޫނު އަސާސީގައި ވަރަށް ސާފު ބަހުން ވެރިއަކު ވެރިކަމުން ފައިބަންޖެހޭނެ ގޮތާއި އަޒުލުކުރާނެ ގޮތް އެބަބުނޭ. މިއީކީ މަގުމަތިން ސަރުކާރު ވައްޓާލާ ދުވަހެއް ނޫން،" ފަލާހު ވިދާޅުވިއެވެ.
އެމްޑީޕީއިން އިއްޔެ ހަވީރު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ފައްޔާޒު ވަނީ "އަނިޔާވެރިވެއްޖެ ނަމަ އަނިޔާވެރިވާނެ" ކަމަށް ވިދާޅުވެފައެވެ.
ފައްޔާޒު އެފަދައިން ވިދާޅުވީ ހދ. ކުޅުދުއްފުށީގައި އެމްޑީޕީއިން މިފަހުން ބޭއްވި ޖަލްސާއެއްގައި ކުރީގެ ރައީސް މުހައްމަދު އަމީނާ ގުޅޭ ގޮތުން މީހަކު ދެއްކި ވާހަކައަކާ ގުޅިގެންނެވެ.
ފައްޔާޒުގެ އެ ވާހަކައާ ގުޅިގެން ޕީއެންސީގެ މެންބަރުން ގެންދަވަނީ ތަކުރާރުކޮށް ފައްޔާޒުގެ ވާހަކަތައް ބަލާ ތަހުގީގުކުރުމަށް ގޮވާލަމުންނެވެ.