ރައީސް ޑރ. މުހައްމަދު މުއިއްޒަށް ހައްދަވަން ޖެހޭނީ ކުރީގެ ރައީސް މުހައްމަދު އަމީން ދީދީއަށް ހެއްދެވި ގޮތް ކަމަށް ބުނެ އިދިކޮޅު އެމްޑީޕީން ޓެރަރިޒަމްގެ އަމަލެއް ކުރުމަށް ހިތްވަރު ދިނުމުން އެކަން ސަރުކާރުގެ ސަމާލުކަމަށް ގެނެސް މައްސަލަ ބެލުމަށް ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބަލައިގެންފިއެވެ.
މި ކުއްލި މައްސަލަ ހުށަހެޅުއްވީ މިލަންދޫ ދާއިރާގެ ޕީއެންސީ މެންބަރު ހަސަން މުފީދެވެ.
އެ މައްސަލަ ބަލައިގަތުމަށް ނެގި ވޯޓުގައި 44 މެންބަރުން ވޯޓު ދެއްވީ މައްސަލަ ބަލައިގަތުމަށެވެ. ނަމަވެސް އަށް މެންބަރަކު ދެކޮޅަށް ވޯޓު ދެއްވިއިރު، އެއް މެންބަރަކު ވަނީ ވަކި ގޮތަކަށް ވޯޓު ދެއްވުމާ ދެކޮޅަށް ވޯޓު ދެއްވާފައެވެ.
އެ ކުއްލި މައްސަލައިގައި ބުނެފައި ވަނީ ޓެރަރިޒަމްގެ އަމަލެއް ކުރުމަށް ހިތްވަރުދީ އެކިއެކި ޕޯޑިއަމްތަކުގައި އެމްޑީޕީން ވާހަކަދައްކަމުންދާ ކަމަށެވެ.
އަދި ޓެރަރިޒަމްގެ ގާނޫނުގެ ދަށުން ނުސީދާކޮށް ނަމަވެސް، ޓެރަރިޒަމްގެ އަމަލެއް ކުރުމަކީ ކުށެއް ކަމުގައި ބަޔާންކޮށްފައިވާ ކަމަށާއި އަދި އެފަދަ އަމަލެއްކުރުން ގާނޫނުގެ ދަށުން މަނާވާނެކަން އެ މައްސަލާގައި ވަނީ ފާހަގަކޮށްފައެވެ.
އަދި އެފަދަ ވާހަކައެއް ފެތުރުމަކީ ވަކި ސިޔާސީ ފިކުރެއް ކުރިއަރުވަން ކުރާ ކަމެއް ކަމަށް އެ މައްސަލާގައި ވަނީ ފާހަގަކޮށްފައެވެ. ހަމައެއާއެކު އާންމުންގެ ތެރެއިން ބައެއްގެ ހިތްތަކުގައި ބިރުވެރިކަން އުފެއްދުމަށާއި އެހެން މީހެއްގެ ފުރާނައަށް ނުރައްކާވާ ފަދަ އެ އަމަލު، ކުށްވެރިކުރައްވާކަމަށް އެ މައްސަލައިގައިވެއެވެ.
އެއާއެކު އެ މައްސަލަ ސަރުކާރުގެ ސަމާލުކަމަށް ގެނެސް، ކަމާ ގުޅުން ހުރި އިދާރާތަކުން ތަހުގީގުކުރުމަށް މެންބަރު މުފީދު ވަނީ ގޮވައިލައްވައިފައެވެ.
އަމީނަކީ ދިވެހިންގެ ތެރެއިން ބަޔަކު ނިކުމެ އަވަހާރަކޮށްލި ރައީސެކެވެ. އެ މަނިކުފާނު ދުނިޔެ ދޫކުރެއްވީ އެ މަނިކުފާނުގެ ހަށިކޮޅަށް ދެވުނު ވަރަށް ބޮޑެތި އަނިޔާތަކެއްގެ ސަބަބުންނެވެ.