'ބިރުވެރިކަން އުފެދޭ ގޮތަށް' ޓްވީޓެއް ކުރި ކަމުގެ ތުހުމަތުގައި ފުލުހަށް ހާޒިރުކުރި އެމްޑީޕީގެ އެކްޓިވިސްޓް ހުސެއިން ޝާފިއު (ތުއްތު)، އެ ޓްވީޓް ކުރީ ވަކި މީހަކަށް ނިސްބަތްކޮށްފައެއް ނޫން ކަމަށް ބުނެ، ހަނުހުރެއްޖެއެވެ.
މި ސަރުކާރުން ސިނގިރޭޓުން ނަގާ ޑިއުޓީ ބޮޑުކުރުމާ ގުޅިގެން، ސިނގިރޭޓު ފޮއްޓެއްގެ އަގު ވަނީ 250 ރުފިޔާއަށް ވުރެ މައްޗަށް އުފުލިފައެވެ. އެކަމާ ނުރުހުން ފާޅުކޮށް ޝާފިއު އެކްސްގައި ކުރި ޕޯސްޓެއްގައި ވަނީ 'މަށަށް ކަލޭ މަގެއްމަތިން ނުފެއްނާތި!' އެހެން ލިޔެފައެވެ.
އެ ޕޯސްޓާ ގުޅިގެން ފުލުހަށް ހާޒިރުވާން އަންގައި އޭނާއަށް ޗިޓު ފޮނުވައިފައިވަނީ އިއްޔެއެވެ.
އެހެންވެ، ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް މިއަދު މެންދުރު 13:30އަށް ޝާފިއު ވަނީ ހާޒިރުވެފައެވެ.
އެމްޑީޕީގެ އެކްޓިވިސްޓް ހުސެއިން ޝާފިއު (ތުއްތު) ފުލުހަށް ހާޒިރުވަނީ -- ފޮޓޯ/ އެމްޑީޕީ
އެކަމުގައި އެމްޑީޕީގެ ލީޑަޝިޕްގައި ހިމެނޭ ބޭބޭފުޅުންނާއި، އާއްމު މެންބަރުންނާއި، ޕާޓީގެ ސަޕޯޓަރުން މިއަދު ވަނީ މަގުމައްޗަށް އެއްވެ އިހުތިޖާޖުވެސް ކޮށްފައެވެ. އެ ޕާޓީން ވަނީ އާއްމުންގެ ޚިޔާލުފާޅުކުރުމަށް މި ސަރުކާރުން ހުރަސްއަޅާކަމަށް ބުނެ ނުރުހުންފާޅުކޮށްފައެވެ.
ފުލުހުންނަށް ޝާފިއު ދީފައިވާ ބަޔާނުގައި ބުނެފައި ވަނީ އޭނާގެ ޓްވީޓްގައި ދައްކާފައިވާ ވާހަކައަކީ އެއްވެސް މީހަކަށް ނިސްބަތްކޮށް ދައްކާފައިވާ ވާހަކައެއް ނޫން ކަމަށެވެ. އަދި އެ ޓްވީޓްގައި ހަޑިހުތުރު ބަހެއް ވެސް ބޭނުންކޮށްފައި ނުވާނެ ކަމަށާއި އެއްވެސް މީހަކަށް އިންޒާރެއް ވެސް ދީފައި ނުވާނެ ކަމަށް އޭނާ ބުންޏެވެ. އޭގެ އިތުރުން މީހެއްގެ ހިތުގައި ބިރުވެރިކަމެއް އުފެދޭނެ ފަދަ އެއްވެސް ވާހަކައެއް ވެސް ނޯންނާނެ ކަމަށް އޭނާ ބުންޏެވެ.
މީގެ އިތުރުން އޭނާ ލިޔެފައިވާ އިބާރާތަށް "ރާގެއް ދީގެން އުޅެނީ" ފުލުހުން ކަމަށް ވެސް އޭނާ ވަނީ ބުނެފައެވެ. އޭގެ އިތުރަށް އެ ޓްވީޓާ ގުޅިގެން އޭނާ ދައްކާނެ ވާހަކައެއް ނެތް ކަމަށް ބުނެ "ހަނު" ހުންނަން ގަސްތުކުރީ ކަމަށް ވަނީ ބުނެފައެވެ.
ޚިޔާލު ފާޅުކުރުމުގެ މިނިވަންކަމަށް ހުރަސް އަޅައި، ޓްވީޓުކޮށްގެން ފުލުހަށް ހާޒިރުކުރާތީ އެމްޑީޕީން މިއަދު ބޭއްވި އެއްވުން -- ފޮޓޯ/ އެމްޑީޕީ
ޝާފިއު، ފުލުހަށް ހާޒިރުކުރުމާ ގުޅިގެން އެމްޑީޕީގެ ގާނޫނީ ވަކީލުންގެ ޓީމުގައި ހިމެނޭ އައިކު އަހުމަދު އީސާ ވިދާޅުވީ މިއަދު ފެނުނީ ފުލުސް އޮފީހުގެ ތެރެއަށް ސިޔާސީ ނުފޫޒު ވެއްދިތަން ކަމަށެވެ. އަދި އާންމު ރައްޔިތަކު ޚިޔާލުފާޅުކުރުމަކީ ނުވަތަ ބަސް ބުނުމުގެ މިނިވަންކަމަކީ ސީދާ ގާނޫނުއަސާސީން ލިބިދޭ ހައްގެއް ކަމަށް އައިކު ވިދާޅުވިއެވެ.
"އަޅުގަނޑުމެން އެ ޓްވީޓް ވެސް ބަލާލިން. އެ އަމުރުގައި އެބައޮތް ކޮން ޓްވީޓެއްކަން ސާފުކޮށްދީފަ. އެ ޓްވީޓްގައެއް މީހަކު ބިރުގަންނަންޖެހޭ ވަރު ކަމެއް ނެތް. ރައްޔިތުންގެ ހިތް ނުތަނަވަސްކަން ފާޅުކޮށްފައި އެހުރީ،" ޓްވީޓާ ގުޅޭގޮތުން އޭނާ ވިދާޅުވިއެވެ.
"ބަސް ބުނުމާ ގަލަމުގެ މިނިވަންކަމަށް އަރައިގަންނަތަން ފެނިގެންމިދިޔައީ. މިއަދު އަޅުގަނޑުމެންގެ ފުރަތަމަ އެކްޓިވިސްޓް މި ގެނައީ. އެބޭފުޅުން ހީކުރަނީ ކަންނޭނގެ އަޅުގަނޑުމެން ފަހަތަށް ޖެހޭނެއޭ ބިރުގަންނާނެއޭ. އެމްޑީޕީއަކީ އެއްވެސް އިރެއްގައި މިކަހަލަ ކަންތައްތަކުގައި ފަހަތަށް ވެސް ޖެހުނު ބައެއް ނޫން،" އޭނާ އިތުރަށް ވިދާޅުވިއެވެ.
ޝާފިއުއަށް އިއްޔެ ޗިޓު ފޮނުވުމާ ގުޅިގެން ހިތްހަމަނުޖެހުން ފާޅުކުރައްވައި އެމްޑީޕީގެ ޗެއާޕާސަން ފައްޔާޒު އިސްމާއިލް ވަނީ ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށް ވިދާޅުވެފައެވެ.
މީގެ ކުރިން، ރައީސް ޑރ. މުޙައްމަދު މުއިއްޒުގެ އަބުރުފުޅަށް ހުތުރުވާ ގޮތަށް، ގދ. ގައްދޫ ކައުންސިލްގެ ރައީސް މުޙައްމަދު އަހުމަދު ވާހަކަދެއްކެވި މައްސަލައެއް ބަލައި، ފިޔަވަޅު އަޅަން ލޯކަލް ގަވަމަންޓް އޮތޯރިޓީ (އެލްޖީއޭ)އިން އަންގައިފައިވެއެވެ.
އެ މައްސަލައިގައި ވެސް އެމްޑީޕީން ނުރުހުން ފާޅުކޮށް، ސަރުކާރަށް ފާޑުކިޔައިފައިވެއެވެ.