އިޒްރޭލު ޕާސްޕޯޓު މަނާކުރުމުގެ ބިލު އަވަސްކުރުމަށް ބާރުއެޅުމަށް ސަރުކާރަށް ގޮވާލައި އިދިކޮޅު އެމްޑީޕީން ހުށަހެޅި ގަރާރު ރައްޔިތުންގެ މަޖިލީހުން ބޭރުކުރީ، އެއީ އެއްވެސް ހެޔޮނިޔަތެއް ނެތި މަޖިލީހަށް ވެއްދި ގަރާރަކަށް ވާތީ ކަމަށް މަޖިލީހުގެ މެޖޯރިޓީ ޕާޓީ، ޕީއެންސީން ބުނެފިއެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް ވަނީ އެ ބިލުގެ މަސައްކަތް އަވަސްކުރަން ސަރުކާރަށް ގޮވާލައި ގަރާރެއް ހުށަހަޅާފައެވެ.
ވެރިކަންކުރާ ޕީއެންސީގެ ގިނަ މެންބަރުން ހިމެނޭހެން 63 މެންބަރުން ވަނީ ގަރާރު ބަލައިނުގަނެ، ބޭރުކޮށްލަން ވޯޓުދެއްވައިފައެވެ. އެއް މެންބަރަކު ވަނީ ވަކި ގޮތަކަށް ވޯޓު ދެއްވަން ބޭނުންފުޅުނުވާ ކަމަށް ވެސް ވޯޓުދެއްވައިފައެވެ.
ޕީއެންސީން މިރޭ ނެެރުނު ބަޔާނެއްގައިވަނީ އިޒްރޭލު ޕާސްޕޯޓު މަނާކުރުމުގެ ބިލުގެ މަަސައްކަތް އަވަސްކުރުމަށް އެމްޑީޕީން މަޖިލީހަށް ހުށަހެޅި ގަރާރަކީ މަޖިލީހުގައި މިއަދު ކުރަންހުރި މަސައްކަތްތަކުގެ ވަގުތު ނަގައިލުމުގެ ބޭނުމުގައި، އެއްވެސް ހެޔޮނިޔަތެއް ނެތި މަޖިލީހަށް ހުށަހެޅި ގަރާރެއް ކަމަށެވެ.
އެހެން ނަމަވެސް ޕާސްޕޯޓް މަނާކުރުމުގެ ބިލުގެ މަސައްކަތް ކަނޑައެޅިފައިވާ ތާވަލާ އެއްގޮތަށް ހުއްޓުމެއް ނެތި ކުރިޔަށްދާނެކަމުގެ ޔަގީންކަން އެ ޕީއެންސީން ވަނީ ދީފައެވެ.
އެ ޕާޓީން ނެރުނު ބަޔާނުގައިވާ ގޮތުން، ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަނިޔާވެރި އަމަލުތައް، ބައިނަލްއަގުވާމީ މަސްރަހުގައި އެންމެ ހަރު އަޑުން ކުށްވެރި ކުރައްވައި، ފަލަސްތީނުގެ ދައުލަތެއް ގާއިމް ކުރުމަށާއި، އިޒްރޭލު ޖަވާބުދާރީ ކުރުވުމަށް އެންމެ ވަރުގަދައަށް ވަކާލާތުކުރައްވާ އެއް ލީޑަރަކީ ރައީސް ޑރ. މުހައްމަދު މުއިއްޒެވެ.
ފަލަސްތީނުގެ ހައްގުގައި ރާއްޖޭގެ އެއްވެސް ސަރުކާރަކުން މީގެ ކުރިން ނުކުރާ މަސައްކަތް، މި ސަރުކާރުން ކުރާކަން މި ގައުމުގެ ކުރީގެ ރައީސްކަން ކުރައްވާފައިވާ ތަޖުރިބާކާރު ބޭފުޅުން ވެސް ފާހަގަ ކުރައްވާފައިވާ ކަމަށް އެ ބަޔާނުގައިވެއެވެ.
މީގެ އިތުރުން ފަލަސްތީނުގެ ރައްޔިތުންނަށް ދިވެހި ސަރުކާރާއި ރައްޔިތުންގެ ފަރާތުން އެންމެ ބޮޑު މާލީ އެހީތެރިކަމެއް ވެސް މިހާތަނަށް ދީފައި އޮތީ ޕީއެންސީގެ ސަރުކާރުން ކަމަށް އެ ޕާޓީން ބުނެއެވެ.
އެ ޕާޓީން ބުނީ ކަމާގުޅޭ މާހިރުންގެ ލަފާއާއި އިރުޝާދާއެކު އިޒްރޭލު ޕާސްޕޯޓު މަނާކުރުމުގެ ބިލުގެ މަސައްކަތް ކުރިޔަށް ގެންގޮސް، ތާވަލާ އެއްގޮތަށް މަސައްކަތައް ނިންމާނެ ކަމާމެދު އެއްވެސް ޝައްކެއް ނެތް ކަމަށެވެ.
އަދި ޕީއެންސީއާއި ރައީސް މުއިއްޒުގެ ސަރުކާރުން އަބަދު ވެސް ދެމި އޮންނާނީ ފަލަސްތީނުގެ ރައްޔިތުންނާ އެކު، އެ ގައުމުގެ ރައްޔިތުންގެ ހައްގުގައި ކުރަން ޖެހުނު ކޮންމެ ކަމެއް ކުރުންމަތީގައި ކަމުގެ ޔަގީންކަން ވަނީ ދީފައެވެ.
ފާހަގަކޮށްލެވޭ ގޮތުގައި ގިނަ ދުވަސްތަކަކަށް ފަހު އިޒްރޭލު ޕާސްޕޯޓު މައްސަލައިގެ ގަރާރަށް މިއަދު ބަހުސްކުރީއިރު ޕީއެންސީއަށް ނިސްބަތްވާ މެންބަރުންގެ ރާގު ވެސް ވަނީ ބަދަލުވެފައެވެ.
އެ ގޮތުން، އެ ޕާޓީގެ ޕީޖީ ގްރޫޕުގެ ޑެޕިއުޓީ ލީޑަރުން ހިމެނޭހެން މެންބަރުން ވަނީ ވަކި ގައުމެއްގެ ޕާސްޕޯޓު މަނާކުރުމުން ފަތުރުވެރިކަމަށް އަސަރުކުރާނެކަން ފާހަގަކުރައްވައިފައެވެ. އެހެންވެ، އިޒްރޭލު ޕާސްޕޯޓު މައްސަލައިގައި ގޮތެއް ނިންމާއިރު، ފުޅާ ދާއިރާއެއްގައި މަޝްވަރާކުރަންޖެހޭ ކަމަށް އެ މެންބަރުން ވިދާޅުވިއެވެ.
އިޒްރޭލު ޕާސްޕޯޓު މައްސަލައިގައި ނުރުހުން ބޮޑުވެފައި އޮއްވައި، މި މަހުގެ 12 ވަނަ ދުވަހު 241 ކޮމިޓީއަށް އެ މައްސަލަ އެޖެންޑާކުރިއެވެ. ނަމަވެސް، އެ ދުވަހު ކޮމިޓީން ނިންމީ އަންނަ އަހަރުގެ ފެބްރުއަރީ މަހާ ހަމައަށް އެ މަސައްކަތް ދަންމާލުމަށެވެ.
ޕީއެންސީން މީގެ ކުރިން ވަނީ މި ބިލުގެ މަސައްކަތް ލަސްވަނީ ދިރާސާކުރާތީ ކަމަށް ބުނެފައެވެ.
ރައީސް ބައިވެރިވެވަޑައިގަންނަވާ ބައިނަލްއަގުވާމީ ބައްދަލުވުންތަކުގައި ފަލަސްތީނުގެ ހައްގުގައި ވާހަކަދައްކަވަމުން ގެންދަވާއިރު، ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު ވަނީ އިސްރާއިލުން ފަލަސްތީނުގައި ހިންގަމުންދާ ގަތުލުއާންމު ހުއްޓުވުމަށް އެންމެ ސާބިތު މަސައްކަތެއްކުރައްވާ ވެރިޔަކީ ރައީސް މުއިއްޒުގެ ގޮތުގައި ސިފަކުރައްވައިފައެވެ.