ނުހައްގުން ގޯތިތަކެއް ދިންކަމަށް ތުހުމަތުކުރެވޭ މައްސަލައިގައި ސަސްޕެންޝަނުގައި ހުންނެވި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިއަދު އިސްތިއުފާ ދެއްވައިފިއެވެ.
ފަޒުލް އިސްތިއުފާ ދެއްވިކަން ހާމަކުރައްވައި ރައީސް ޑރ. މުޙައްމަދު މުއިއްޒަށް ފޮނުވި ސިޓީ ސޯޝަލް މީޑިއާގައި އޭނާވަނީ މިރޭ ހިއްސާކުރައްވައިިފައެވެ.
އެ ސިޓީގައި ފަޒުލްވަނީ އެޗްޑީސީގެ މެނޭޖިން ޑިރެކްޓަރުކަމުގައި ހުންނެވި މުއްދަތުގައި އޭނާ ކުރި ކަމަށްބުނެ އެކި ޕްލެޓްފޯމްގައި ކުރާ ހުރިހާ ތުހުމަތުތަކަކަށް އިންކާރު ކުރައްވައި ކަމަށް ވިދާޅުވެފައެވެ.
އޭނާ ވިދާޅުވީ، އޭނާ މަގާމަށް އައްޔަންކުރެއްވި ފަހުން ކުންފުނީގެ ފަރާތުން މިހާތަނަށް ކުރެއްްވި ހުރިހާ މުއާމަލާތެއް ކުރެއްވީ، ބޯޑުން ނިންމައި، ކުންފުނީގެ ޕޮލިސީތަކާއި އިންތަކުގެ ތެރެއިން ކުންފުނީގެ މަސްލަހަތު އިސްކުރައްވައިގެން ކަމަށެވެ.
ހަމައެއާއެކު ބިންވެރިޔާ ސްކީމާ ގުޅިގެން ކުރާ ތުހުމަތުތަކަކީ އެޗްޑީސީއާ އެއްވެސް ގުޅުމެއް ހުރި ކަމެއް ނޫންކަމަށް އޭނާ ވަނީ އެ ސިޓީގައި ވެސް ތަކުރާރުކުރައްވައިފައެވެ. އަދި އޭނާ އެދެނީ އެ ކަމުގެ ހަގީގަތް ވީ އެންމެ އަވަހަށް ރައްޔިތުންނަށް ހާމަވުމަށް ކަމަށް ވިދާޅުވިއެވެ.
"އަދި މި ކަމުގެ ސަބަބުން ކުންފުންޏާއި ސަރުކާރުގެ ސިޔާސަތުތައް ހުއްޓިފައި އޮންނާކަށް އަޅުގަނޑު ނޭދެމެވެ،" އޭނާ ވިދާޅުވިއެވެ.
އެެހެންވެ، އިދާރާތަކުން ގޯތި މައްސަލައިގައި ކުރިއަށް ގެންދާ ތަހުގީގަށް ފުރުސަތު ދިނުމަށާއި، ސިޔާސަތުތައް ނުހުއްޓި ކުރިއަށް ގެންދަން ފުރުސަތު ދިނުމަށް އިސްތިއުފާ ދެއްވާކަމަށް އޭނާ ވިދާޅުވިއެވެ.
ފަޒުލް މިއަދު އިސްތިއުފާ ދެއްވިއިރު، އެޗްޑީސީގެ ޗެއާމަން އަހުމަދު ނާސިފް ފިޔަވައި ފަޒުލް ހިމެނޭހެން ޑިރެކްޓަރުންގެ ބޯޑުގެ ހުރިހާ މެންބަރުން ބުރާސްފަތި ދުވަހު ވަނީ ސަސްޕެންޑުކޮށްފައެވެ. ހަމައެއާއެކު އެ މީހުންގެ ޕާސްޕޯޓު ވެސް ވަނީ ހިފަހައްޓައިފައެވެ.
ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ވަނީ އާންމުވެފައެވެ. އެ ގޯތީގައި ވަށައިފާރު ވެސް ވަނީ ރާނާފައެވެ.
އެ މައްސަލައާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމެއްގައި ފަޒުލް ވިދާޅުވީ އެކަމުގައި އޭނާގެ މަސްލަހަތެއް ނެތް ކަމަށާއި، އެފަދަ މައްސަލައެއް ފެންމަތިވީ އޭނާގެ ބޭބެއާ ގުޅޭ ގޮތުން ކަމަށް ވުމަކީ އިއްތިފާގެއް ކަމަށެވެ.
ގޯތީގެ މައްސަލަ ފުލުހުންނާއި، އެންޓި ކޮރަޕްޝަން ކޮމިޝަން (އޭސީސީ)އިން އަންނަނީ ބަލަމުންނެވެ.
މި މައްސަަލަ ފެންމަތިވެފައި އޮއްވައި ރައީސް މުއިއްޒުވަނީ ސަރުކާރުގެ އެއްވެސް ވެރިއަކު، ނުވަތަ އިސް މަގާމެއްގައި ހުންނަވާ ބޭފުޅަކު ވިޔަސް ގަވާއިދާ ޚިލާފަށް، ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރިކަމުގެ މައުލޫމާތު ލިބިވަޑައިގެންފިނަމަ އެ ބޭފުޅަކާ މެދު ވަގުތުން ފިޔަވަޅު އަޅުއްވާނެ ކަމަށް ވިދާޅުވެ އިންޒާރު ދެއްވައިފައެވެ.
ނުހައްގުން ގޯތިތަކެއް ދިން މައްސަލަ ފެންމަތިވެފައި އޮއްވައި މިއަދު ވަނީ މިއަދު ވަނީ ފްލެޓު އެޅުމުގެ ނަމުގައި ސީލައިފް ގްލޯބަލްއިން ހިންގި ސްކޭމްގައި ގެއްލުންވި މީހުންނަށް ވިނަރެސް ފުލެޓުތަކެއް ދޭން އެންގުމުން، ސީލައިފަށް ފައިސާ ދެއްކި ކަމުގެ ފޭކު ލިޔުންތަކެއް ހަދައިގެން ވިނަރެސް ފުލެޓުތަކެއް ދީފައިވާކަން ވެސް ހާމަވެފައެވެ.