އިސްރާއިލުން ފަލަސްތީނުގައި ހިންގަމުންދާ ގަތުލުއާންމު ހުއްޓުވުމަށް އެންމެ ސާބިތު މަސައްކަތެއްކުރައްވާ ވެރިޔަކީ ރައީސް ޑރ. މުޙައްމަދު މުއިއްޒު ކަމަށް ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު ވިދާޅުވެއްޖެއެވެ.
ސަރުކާރަށް އަހަރެއް ފުރުމާ ގުޅިގެން ޑރ. ވަހީދު ދެއްވި ބަސްދީގަތުމެއްގައި ވިދާޅުވީ ފަލަސްތީނުގައި ހިންގަމުންދާ ގަތުލު އާންމު ހުއްޓުވުމަށް ދިވެހި ސަރުކާރުން ކުރަމުންގެންދާ މިންނެތް މަސައްކަތް އުފަލާ އެކުގައި ފާހަގަކުރައްވާ ކަމަށެވެ.
އެ މަނިކުފާނު ވިދާޅުވީ، މިމަހު ސައުދީ އަރަބިއްޔާގެ ރިއާދުގައި އޮތް އަރަބި އަދި އިސްލާމީ ގައުމުތަކުގެ ވެރީންގެ ޖަލްސާގައި ރައީސް ދެއްވި ތަގްރީރަކީ ފަހަކަށް އައިސް ފަލަސްތީނުގެ މައްސަލައިގައި، ގައުމެއްގެ ރައީސަކު ދެއްވި އެންމެ ވަރުގަދަ ތަގުރީރު ކަމަށެވެ.
މީގެ އިތުރުން އިސްރާއީލާ ދެކޮޅަށް ސައުތު އެފްރިކާގެ ފަރާތުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)އަށް ހުށަހަޅާފައިވާ މައްސަލައަަށް ތާއީދުކުރައްވާ ރާއްޖޭގެ ފަރާތުން ވަރުގަދަ ވަކީލުންގެ ޓީމެއް ފޮނުއްވިކަން ވެސް އުފަލާއެކު ފާހަގަކުރައްވާ ކަމަށް އެމަނިކުފާނު ވިދާޅުވިއެވެ.
"އަދި ހުޅަނގުގެ ބައެއް ބޮޑެތި ގައުމުތަކުގެ އެހީއާއެކު އިސްރާއީލުން ފަލަސްތީނުގައި ހިންގާ ނާތަހުޒީބު އަނިޔާވެރި، ލަދެއްނެތް އަމަލުތަކަކީ މި ވޭތުވެދިޔަ 100 އަހަރުގެ ތެރޭގައި ވެސް ހިންގައިފައިވާ އެންމެ ބޮޑު ޖަރީމާ،" ޑރ. ވަހީދު ވިދާޅުވިއެވެ.
އެ މައްސަލައިގައި ދިވެހި ރައްޔިތުންގެ ހިތްތަކުގައި ކެކެމުންދާ އުދާސްތަކާއި ވޭނާއި ހިތްދަތިކަމުގެ އަސަރު ރައީސް އިހުސާސްކުރައްވައި، އެމަނިކުފާނު ދައްކަވާ ކޮންމެ ވާހަކަފުޅެއްގައި ސާބިތުކަމާއެކު ފާޅުކުރައްވަމުން ގެންދަވާ ކަމަށްޓަކައި ވަހީދު ވަނީ ރައީސަށް ޝުކުރު އަދާކުރައްވާފައެވެ.
ރައީސް، މިމަހުގެ 11ގައި އަރަބް އިސްލާމީ ގައުމުތަކުގެ ކުއްލި ބައްދަލުވުމުގައި ބައިވެރިވެވަޑައިގެންވަނީ، ފަލަސްތީނުގެ ރައްޔިތުންނަށް ހައްލު ހޯދައިދިނުމަށް ޓަކައި، ސައުދީ އަރަބިއްޔާގެ ލީޑާޝިޕްގެ ދަށުން މުޅި އިސްލާމީ އުންމަތް އެކުވެ، މަސައްކަތްކުރުމަކީ ކޮންމެހެން ކުރަންޖެހިފައިވާ ކަމެއްކަމަށް ވިދާޅުވެފައެވެ.
މިދިޔަ އަހަރުގެ އޮކްޓޯބަރު މަހުގެ ހަތްވަނަ ދުވަހުން ފެށިގެން އިސްރާއީލުން ޣައްޒާގައި ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު މިހާރު ވަނީ 43,972އަށް އަރައިފައެވެ.
އޭގެތެރޭގައި 17،000އަށް ވުރެ ގިނަ ކުޑަކުދިން ވެސް ހިމެނެއެވެ.