ބިންވެރިޔާ ސްކީމްގެ ދަށުން ހުޅުމާލެއިން ގޯތި ލިބުނު މީހުންގެ ލިސްޓުގައި ނުހިމެނޭ ބަޔަކަށް، ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ން ގޯތިދިން ކަމަށް ތުހުމަތު ކުރެވޭ މައްސަލައިގައި ސުވާލު ކުރުމަށް ހައުސިން މިނިސްޓަރު، ޑރ. އަލީ ހައިދަރު ރައްޔިތުންގެ މަޖިލީހަށް ހާޒިރުކުރުމަށް ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް މިއަދު ހުށަހަޅުއްވައިފިއެވެ.
ބިންވެރިޔާ ސްކީމުން ބިން ލިބިފައި ނުވަނީސް, އެޗްޑީސީގެ މެނޭޖިން ޑިރެކްޓަރު، އިބްރާހިމް ފަޒުލް ރަޝީދުގެ ބޭބެ, އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު, މުޙައްމަދު ފަޒީލް ރަޝީދަށް ހުޅުމާލެއިން ބިން ދީފައިވާ ކަމަށް ބުނާ މައްސަލައެއް އިއްޔެ ވަނީ ފެންމަތި ވެފައެވެ.
މީކާއީލް ސާފުކުރަން އެދިވަޑައިގަތީ، ގަވާއިދާ ޚިލާފަށް ގޯތިދޭން އުޅުނު ކަމަށް ތުހުމަތު ކުރެވޭ މި މައްސަލައިގެ ތަހުގީގަށް ބޭނުންވާ އެއްވެސް ލިޔެކިޔުމެއް ހައުސިން މިނިސްޓްރީ އަނދައިދިއުމުގެ ހާދިސާގައި ނެތިގޮސްފައިވޭތޯއެވެ.
ފަޒީލަށް ލިބިފައިވާ ގޯއްޗާ ގުޅޭ ލިޔެކިޔުންތަކެއް އިތުބާރު ހުރި މަސްދަރަކުން "ސަން"އަށް ވެސް ލިބިފައިވެއެވެ. އޭގެ ތެރޭގައި، ފަޒީލަށް ދީފައިވާ ގޯތި އެހެން މީހަކަށް ވެސް ލިބިފައިވާ ކަމަށް އެޗްޑީސީއަށް ފާހަގަވުމުން، އެ ކުންފުނިން މިދިޔަ ޖުލައި މަހު ހައުސިން މިނިސްޓްރީ މެދުވެރިކޮށް މައުލޫމާތު ސާފުކުރަން ފޮނުވައިފައިވާ ސިޓީއެއް ހިމެނެއެވެ.
އެ ސިޓީގެ ޖަވާބުގައި ހައުސިން މިނިސްޓްރީން ފޮނުވައިފައިވާ ސިޓީއެއްގައި ވަނީ ފަޒީލަށް ދޫކުރި ކަމަށް ބަޔާންކޮށްފައިވާ ގޯއްޗަކީ މިނިސްޓްރީން އެހާތަނަށް އެއްވެސް ފަރާތަކާ ހަވާލުކޮށްފައިނުވާ ގޯއްޗެއް ކަމަށް ބުނެފައެވެ.
މި މައްސަލަ ފެންމަތިވުމާއެކު އެޗްޑީސީގެ ފަރާތުން ފަޒުލް ރޭ ބޭއްވި ނޫސްވެރިންގެ ބައްދަލުވުމުގައި ވަނީ ތުހުމަތުތަކަށް އިންކާރު ކުރައްވައިފައެވެ. އަދި މި މައްސަލައިގައި އޭނާގެ "ކޮންފްލިކްޓް އޮފް އިންޓަރަސް" ނުހިމެނޭ ކަމަށް ވިދާޅުވިއެވެ.
މި މައްސަލައިގައި ފުލުހުން ޖިނާއީ ތަހުގީގެއް ހިންގަމުން އަންނައިރު، ފަޒުލްގެ އިތުރުން އެޗްޑީސީގެ ބޯޑު މެންބަރުންތަކެއް ވަނީ ސަސްޕެންޑު ވެސް ކޮށްފައެވެ.
ހައުސިން މިނިސްޓްރީގެ އިތުރުން ދެ މިނިސްޓްރީއެއް ހިންގަމުންދިޔަ ގްރީން ބިލްޑިންގައި މިދިޔަ ހަފުތާގެ ބުރާސްފަތި ދުވަހު ރޯވެ، މުޅި އިމާރާތް ވަނީ އެއްކޮށް އަނދައި ހުލިވެފައެވެ. އެހެން ނަމަވެސް ބޯހިޔާވަހިކަމާއި ގެދޮރުވެރިކަމާ ގުޅުންހުރި އެއްވެސް ލިޔެކިޔުމެއް ނުގެއްލޭކަމަށް އިންފްރާންސްޓްރަކްޗާ މިނިސްޓަރު މީގެ ކުރިން ވިދާޅުވެފައިވެއެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.
އޭގެ ތެރެއިން ހުޅުމާލޭ ދެވަނަ ފިޔަވަހިން ދިނުމަށް ހަމަޖެހިފައިވާ ގޯތިތައް އެތަންތަނުގެ ވެރިންނާ ހަވާލުކޮށް ނިމިފައިވާ ކަމަށް މިދިޔަ އޮކްޓޯބަރު މަހު ހައުސިން މިނިސްޓްރީން ވަނީ ބުނެފައެވެ