މީޑިއާ ކޮންޓްރޯލްކުރަން ރައީސަށް ބާރު ލިބޭ ބިލު އަނބުރާ ގެންގޮސްފި

'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި ސަރުކާރަށް މީޑިއާތަކުގެ ކޮންޓްރޯލް ލިބޭގޮތަށް ރައްޔިތުންގެ މަޖިލީހަށް ހުށަހަޅާފައި އޮތް ބިލު އަނބުރާ ގެންގޮސްފައިވާ ކަމަށް، އެ ބިލު ހުށަހެޅުއްވި ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު މިއަދު ވިދާޅުވެއްޖެއެވެ.

"ސަން"އާ ވާހަކަދައްކަވަމުން މެންބަރު ހަންނާން ވިދާޅުވީ، އެ ބިލު އަނބުރާ މިހާރު ގެންގޮސްފައިވާ ކަމަށެވެ.

'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި އާ ގާނޫނެއް އުފައްދަން މެންބަރު ހަންނާން ހުށަހެޅުއްވި ބިލު މަޖިލީހަށް ތައާރަފުކުރީ 13 ނޮވެމްބަރުގައެވެ.

ބިލުގައި ހިމަނާފައިވާ ކަންތައްތައް

އެ ބިލުގައިވާ ގޮތުން ގާނޫނަކަށްވެ އަމަލުކުރަން ފަށާ ހިސާބުން ރައީސުލްޖުމްޙޫރިއްޔާ، 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން' އުފައްދަވާނެއެވެ. އެއާއެކު މޯލްޑިވްސް މީޑިއާ ކައުންސިލާއި، މޯލްޑިވްސް ބްރޯޑްކާސްޓިން ކޮމިޝަން އުވޭނެއެވެ.

ބިލުގައިވާ ގޮތުގައި ހަތް މެންބަރުންގެ މައްޗަށް އެކުލެވޭ އާ ކޮމިޝަންގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްޙޫރިއްޔާ އައްޔަންކުރާ ހަތަރު މެންބަރަކާއި މީޑިއާތަކުން އައްޔަންކުރާ ތިން މެންބަރެކެވެ. އޭގެ ތެރެއިން ތިން މެންބަރުން އިންތިޚާބުކުރަން ވޯޓުލެވޭނީ، ރަޖިސްޓްރީ ކޮށްގެން ހިންގާތާ ފަސް އަހަރުވެފައިވާ ބްރޯޑްކާސްޓަރުންނާއި މީޑިއާތަކާއި އެ ތަންތަނުގައި މަސައްކަތް ކުރާ ނޫސްވެރިންނަށެވެ.

ހަމައެއާ އެކު ކޮމިޝަނުގެ ރައީސާއި ނައިބު ރައީސް އައްޔަންކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާއަށެވެ.

އާ ކޮމިޝަނާ ގިނަ ޒިންމާތަކެއް ހަވާލުކޮށްފައިވާއިރު، މީޑިއާތަކާއި ނޫސްވެރިންގެ މަޝްވަރާގެ މަތިން، މީޑިއާތަކާއި ނޫސްވެރިން އަމަލުކުރަންޖެހޭ ސުލޫކީ މިންގަނޑެއް އެކުލަވައިލަން ވަނީ ހިމަނާފައެވެ.

ސުލޫކީ މިންގަނޑު އެކުލަވައިލުމުން ތަކުރާރުކޮށް މިންގަނޑާ ޚިލާފުވާ މީޑިއާތައް ޖޫރިމަނާ ކުރުމާއި، ލައިސަންސް ހިފެހެއްޓުމާއި، މާފަށް އެދެން އެންގުން ފަދަ ބާރުތައް ވެސް ކޮމިޝަނަށް ލިބެއެވެ.

ސުލޫކީ މިންގަނޑާ ތަކުރާރުކޮށް ޚިލާފުވެއްޖެ މީޑިއާއެއް ނަމަ 5،000 ރުފިޔާއާއި 50،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. އަދި، ވަކިވަކި ނޫސްވެރިން ވެސް 5،000 ރުފިޔާއާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.

ރައީސްގެ ފުރަތަމަ ރަސްމީ ދަތުރުފުޅަށްފަހު ނޫސްވެރިންނާ ވާހަކަދައްކަވަނީ -- ފޮޓޯ/ ރައީސް އޮފީސް

ބިލާމެދު ބޮޑެތި ކަންބޮޑުވުންތަކެއް

ސަރުކާރަށް މީޑިއާތައް ކޮންޓްރޯލް ކުރެވޭނެ ބާރުތަކެއް ލިބިދޭ ގޮތަށް ހުށަހަޅާފައިވާ އެ ބިލާ ގުޅިގެން މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ)އާއި އިދިކޮޅު ފަރާތްތަކުން ވަނީ ކަންބޮޑުވުން ފާޅުކުރައްވާ ބިލު އަނބުރާ ގެންދިޔުމަށް ގޮވާލާފައެވެ.

ބައެއް ފަރާތްތަކުން ތުހުމަތުކުރާ ގޮތުގައި އެއީ ސަރުކާރުގެ ބިލެކެވެ. އެހެންނަމަވެސް، ސަރުކާރަށް ތާއީދުކުރައްވާ އަމިއްލަ މެންބަރަކު ލައްވާ ބިލު ހުށަހެޅުއްވީ ސަރުކާރަށް އެފަދައިން އިނގިލި ދިށްނުކުރެވޭނެތީ ކަމަށް ތުހުމަތުތައްކޮށްފައިވެއެވެ.

އެމްޖޭއޭއިން ބުނީ، އެ ބިލުގެ ސަބަބުން ގާނޫނުއަސާސީން ލިބިދީފައިވާ ނޫސްވެރިކަމުގެ މިނިވަންކަމުގެ ހައްގު ވަރަށް ބޮޑަށް ހަނިވެ، ނޫސްވެރިންގެ މަސައްކަތަށް ބޮޑެތި ހުރަސްތަކެއް އެޅޭނެ ކަމަށެވެ. އެކަމުގެ ސަބަބުން ސަރުކާރުގެ ނުފޫޒު މީޑިއާތަކަށް ވަދެ، މިހާރު އޮތް މިންވަރަށް ވެސް މީޑިއާގެ ވެށި ގެއްލިގެންދާނެ ކަމަށް ޖާނަލިސްޓްސް އެސޯސިއޭޝަނުން ބުނެފައިވެއެވެ.

ހަމައެއާއެކު ސަރުކާރުގެ ނުފޫޒު މީޑިއާތަކަށް ހައްދެއް ނެތް މިންވަރަށް ހިނގާނެކަމަށް ބުނެ، އެ ބިލު އަނބުރާ ގެންދަން އިދިކޮޅު މައި ޕާޓީ އެމްޑީޕީން ވެސް ގޮވައިލިއެވެ. ސަރުކާރުގެ "މަކަރުވެރި ރޭވުމެއް"ގެ ތެރެއިން ހުށަހަޅާފައިވާ ބިލެއްކަން ފާހަަގަކުރައްވާ އެމްޑީޕީން ބުނީ ސަރުކާރަށް ފާރަވެރިވެ ސަރުކާރު ޖަވާބުދާރީ ކުރުވުމުގެ އެންމެ އިސް ޒިންމާއެއް އަދާކުރަނީ މީޑިއާތަކުންކަމަށް ވީހިނދު، މީޑިއާތަކުގެ މިނިވަންކަން ގެއްލޭ ގޮތަށް ހުށަހަޅާ އެއްވެސް ގާނޫނަކަށް އެމްޑީޕީން ތާއީދު ނުކުރާނެ ކަމަށެވެ.

އެ ބިލާ ގުޅިގެން ކަންބޮޑުވުން ފާޅުކޮށް ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް ކުއްލި މައްސަލައެއް ވެސް މަޖިލީހަށް ހުށަހެޅުއްވިއެވެ. ނަމަވެސް، އެ ކުއްލި މައްސަލައިގައި ޝަރުތު ހަމަނުވާކަމަށް ވިދާޅުވެ ރިޔާސަތުން ބޭރުކޮށްލުމުން ގަރާރެއްގެ ސިފައިގައި އެ މައްސަލަ ވަނީ އަލުން ހުށަހަޅާފައެވެ.

އެ ބިލާ ގުޅިގެން ކަންބޮޑުވުން ފާޅުކޮށް ނޫސްވެރިން އިސްނަގައިގެން ވަނީ 'ހަތަރެއް ހައްގުގައި' ނަމުގައި ކެމްޕެއިނެއް ވެސް ފަށާފައެވެ.

ރައީސް ވިދާޅުވީ މީޑިއާ ކޮންޓްރޯލްކުރުމަކީ ސިޔާސަތެއް ނޫން ކަމަށް

އިދިކޮޅު ފަރާތްތަކުންނާއި ނޫސްވެރިންގެ ޖަމިއްޔާތަކުން ތަކުރާރުކޮށް ބިލާ ދެކޮޅަށް ވަކާލާތުކުރި ނަމަވެސް ސަރުކާރުން ރަސްމީ ސިފައެއްގައި އެކަން ކުށްވެރިކޮށްފައެއް ވެސް ނުވެއެވެ.

އެހެންނަމަވެސް، މިދިޔަ އާދިއްތަ ދުވަހުގެ ރޭ، ސަރުކާރަށް އަހަރެއް ފުރުމާ ގުޅިގެން ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ، ބިލުގައި އޮތީ އެ މަނިކުފާނު ގަބޫލުކުރައްވާ ސިޔާސަތުތަކެއް ނޫން ކަމަށާއި އެ ބިލު މަޖިލީހުން ބޭރުކުރައްވާނެ ކަމަށެވެ.

ރައީސް ވިދާޅުވީ، އެ މަނިކުފާނު ބޭނުންފުޅުވަނީ މިހާރަށް ވުރެ ވެސް ބޮޑަށް މީޑިއާތަކަށް މިނިވަންކަންދީ، މީޑިއާތައް ބާރުވެރި ކުރުވުމަށް ކަމަށެވެ.