'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި މަޖިލީހަށް ހުށަހަޅާފައި އޮތް ބިލު ބޭރުކޮށް، ދާއިރާގެ ފަރާތްތަކާ ފުޅާ ދާއިރާއެއްގައި މަޝްވަރާކޮށްގެން އާ ބިލެއް ޑްރާފުޓްކުރަން ބައެއް ޖަމިއްޔާތަކުން ގޮވާލައިފިއެވެ.
ރައީސުލްޖުމްހޫރިއްޔާގެ ކޮންޓްރޯލް އޮންނަ ކޮމިޝަނަކުން މީޑިއާތަކާއި ނޫސްވެރިން ޖޫރިމަނާކުރެވޭ ގޮތަށް ބަދަލު ކުރަން، މަޖިލީހުގެ އަމިއްލަ މެންބަރެއް ކަމަށްވާ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ވަނީ ބިލެއް ހުށަހަޅާފައެވެ.
މި ގާނޫނަށް އަމަލުކުރަން ފަށާ ހިސާބުން ރައީސުލްޖުމްޙޫރިއްޔާ، 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން' އުފައްދަވާނެއެވެ.
އެ ބިލާ ގުޅިގެން ކަންބޮޑުވުން ފާޅުކޮށް ނޫސްވެރިން އިސްނަގައިގެން ވަނީ 'ހަތަރެއް ހައްގުގައި' ނަމުގައި ކެންޕެއިނެއް ފަށާފައެވެ.
އެ ކެންޕޭންގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ގެ ސެކެޓްރީ ޖެނެރަލް އަޙުމަދު ނާއިފް ވިދާޅުވީ، މި ބިލަކީ މީޑިއާގެ ހައްގުތައް ކުރިއަށް އޮތްތަނުގައި އެކީގައި ހަނިވެގެން ގޮސް މީޑިއާތައް ހިންގުމާއި މިނިވަން ނޫސްވެރިކަމުގެ ވެށި ނެތި ހިނގައިދާނެ ފަދަ ބިލެއް ކަމަށެވެ.
މީޑިއާތަކުގެ ހައްގުގައި މަސައްކަތް ކުރާ ޖަމިއްޔާތަކުގެ ޑިމާންޑަކީ ސަރުކާރާއި ރައްޔިތުންގެ މަޖިލީހުގެ މެޖޯރިޓީ ޕާޓީ، ޕީއެންސީގެ ފަރާތުން ވެސް މި ބިލާ ދެކޮޅަށް ވޯޓު ދެއްވައި، ބިލު ބޭރުކޮށްލުން ކަމަށް ނާއިފް ވިދާޅުވިއެވެ.
މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ގެ ސެކެޓްރީ ޖެނެރަލް އަޙުމަދު ނާއިފް ---- ސަން ފޮޓޯ/ އަމަން ލަތީފް
ދެން ސަރުކާރުގެ ފަރާތުން ވެސް ޕީއެންސީގެ ފަރާތުން ވެސް ރައްޔިތުންގެ މަޖިލީހުގެ އެހެން މެންބަރުން ވެސް މީޑިއާ ރެގިއުލޭޓު ކުރުމާއި މީޑިއާގެ ހައްގުތަކާ ގުޅޭ ބިލެއް ހުށަހަޅުއްވާނަމަ، މިކަމާ ގުޅުން ހުރި ނޫސްވެރިންނާ މީޑިއާތަކާއި ޖަމިއްޔާ ޖަމިއްޔާތަކާއި މި ހުރިހާ ފަރާތްތަކާ މަޝްވަރާކޮށްގެން ރަނގަޅު ބިލެއް ޑްރާފްޓު ކުރައްވާފައި ހުށަހަޅުއްވާށޭ. އެއީ އަޅުގަނޑުމެންގެ މައިގަނޑު ގޮވާލުމަކީ ސަރުކާރަށް ވެސް، އަޅުގަނޑުމެނަކަށް ގަބޫލެއް ނުކުރެވޭ މި ބިލު އިސްލާހު ކުރެވިދާނެ ކަމަކަށް
މީގެ އިތުރުން، އެ ބިލު އޮތީ 90 ޕަސެންޓު ގޯސް ކޮށް ކަމަށް ޖަމިއްޔާތަކުން ވަނީ ސިފަކޮށްފައެވެ.
އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކުރަން އެ ކެންޕޭނުގައި އިސްކޮށް ހަރަކާތްތެރިވާ ނޫސްވެރިން ވަނީ އޭޖީ އުޝާމްއާއި ޔޫތު މިނިސްޓަރު އިބްރާހީމް ވަހީދުގެ އިތުރުން ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހީމް ޚަލީލާ މިއަދު ބައްދަލުކޮށްފައެވެ.
އެ ބައްދަލުވުމުގައި އޭޖީ ދެއްވި ޔަގީންކަމަކީ ނޫސްވެރިކަން ހަނިވާފަދަ ކަމެއް ނުކުރައްވާނެ ކަމެވެ.