'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި މަޖިލީހަށް ހުށަހަޅާފައި އޮތް ބިލުގައި އޮތީ އެ މަނިކުފާނު ގަބޫލުކުރައްވާ ސިޔާސަތުތަކެއް ނޫން ކަމަށައި އެ ބިލު މަޖިލީހުން ބޭރުކުރައްވާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ރައީސް މިހެން ވިދާޅުވީ ސަރުކާރަށް އަހަރެއް ފުރުން ފާހަގަކުރުމަށް މިރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ޖަލްސާއަށް ފަހު ރައީސް ވަޑައިގެން މަގުމަތީ ނޫސްވެރިންގެ ޖަމިއްޔާގެ ހިންގާ ކޮމިޓީގެ މެންބަރަކު ވަނީ، މި ބިލު މަޖިލީހުން ބޭރު ކުރާނެތޯ ސުވާލު ކުރައްވައިފައެވެ. އެ ސުވާލަށް ޖަވާބު ދެއްވަމުން ރައީސް ވިދާޅުވީ، ބިލު މަޖިލީހުން ބޭރު ކުރާނެ ކަަމަށެވެ.
ރައީސުލްޖުމްހޫރިއްޔާގެ ކޮންޓްރޯލް އޮންނަ ކޮމިޝަނަކުން މީޑިއާތަކާއި ނޫސްވެރިން ޖޫރިމަނާކުރެވޭ ގޮތަށް ބަދަލު ކުރަން، މަޖިލީހުގެ އަމިއްލަ މެންބަރެއް ކަމަށްވާ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ވަނީ ބިލެއް ހުށަހަޅާފައެވެ.
މި ކަމާ ގުޅިގެން ބައެއް ޖަމިއްޔާތަކުން ވަނީ ކަންބޮޑުވުން ފާޅުކޮށް، އައު ބިލެއް ޑްރާފްޓު ކުރުމަށް ގޮވާލައިފައެވެ. އަދި އިދިކޮޅުން ވެސް ވަނީ މި ބިލު އަނބުރާ ނެގުމަށް ވެސް ގޮވައިލައިފައެވެ.
"މިހާރު ހުށަހަޅާފައި އޮތް މީޑިއާ ބިލަކީ އަޅުގަނޑު ގަބޫލުކުރާ ސިޔާސަތުތަކެއް ހުރި ބިލެއް ނޫން. އަޅުގަނޑެއް ނޫޅެން މީޑިއާތައް ކޮންޓްރޯލްކުރާ ހިތަކުންނެއް. އަޅުގަނޑަކީ މީޑިއާތައް ކޮންޓްރޯލް ކުރަން އުޅޭ މީހެއް ނޫން" ރައީސް ވިދާޅުވިއެވެ.
ރައީސް ވިދާޅުވީ އެ މަނިކުފާނު ބޭނުންފުޅުވަނީ މިހާރަށްވުރެން ވެސް ބޮޑަށް މީޑިއާތަކަށް މިނިވަންކަންދީ، މީޑިއާތައް ބާރުވެރި ކުރުވުމަށް ކަމަށެވެ. އެ ގޮތުން އަންނަ އަހަރަށް ކަނޑައަޅާފައިވާ ބަޖެޓުގައި ފުރަތަމަ ފަހަރަށް، މީޑިއާތަކަށް ފައިސާ ކަނޑައަޅާފައިވާކަން ރައީސްގެ ވާހަކަފުޅުފައި ފާހަގަ ކުރެއްވިއެވެ.
މީޑިއާތައް ހިންގާނެ ޖާގަ ހެޔޮ އަގުގައި ހަމަޖައްސައިދިނުމަކީ ވެސް ރައީސް މުއިއްޒުގެ ރިޔާސީ ވައުދެކެވެ. އެ މަނިކުފާނުގެ ވާހަކަފުޅުގައި މި ކަމަށް ވެސް މިރޭ އަލިއަޅުއްވާލެއްވިއެވެ.
އެ ގޮތުން ހުޅުމާލޭގައި އެސްޓީއޯއިން މީގެ ކުރިން އަޅަން ފަށާފައިހުރި އިމާރާތުގެ ބައެއް ފްލޯތައް ރާއްޖޭގައި ހިންގަމުންދާ ޓީވީ އަދި އޮންލައިން މީޑިއާތަކަށް ދިނުމަށް ނިންމާފައިވާކަން ރައީސް ހާމަ ކުރެއްވިއެވެ. މި ފެށޭ 2025ވަނަ އަހަރު އެ ތަނުގެ ފިނިޝިން މަސައްކަތް ފަށައި، 2026ވަނަ އަހަރަށް ކޮންމެ މީޑިއާއަކަށް ވެސް، ވަރަށް ލުއި އަގެއްގައި އެ ތަނުން ޖާގަ ލިބޭނެ ކަމަށް އުންމީދު ކުރައްވާ ކަމަށް ރައީސް ވިދާޅުވިއެވެ.
ރައީސް ވިދާޅުވާ ގޮތުގައި ދުވަހަކު ވެސް ރާއްޖޭގައި މައުލޫމާތު ހާމަނުކުރާ ވަރަށް މި ސަރުކާރުން މި ދަނީ މައުލޫމާތު ހާމަކުރަމުންނެވެ.
ރައީސް މިރޭ ހާމަކުރެއްވި އަދަދުތަކުގައިވާ ގޮތުން، ސަރުކާރަށް އަހަރެއް ފުރުން އިރު، އެކިއެކި މިނިސްޓްރީތަކުން މައުލޫމާތު ދިނުމަށް ޓަކައި 73 ނޫސްވެރިންގެ ބައްދަލުވުން ވަނީ ބާއްވައިފައެވެ. މީގެ އިތުރުން 791 ފަހަރު މިނިސްޓަރުން މައުލޫމާތު ހިއްސާ ކުރެއްވުމަށް އެކިއެކި މީޑިއާތަކަށް ވެސް ވަޑައިގެންފައިވެއެވެ.