'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި ރައްޔިތުންގެ މަޖިލީހަށް ހުށަހެޅި ބިލުގެ ސަބަބުން މީޑިއާތަކަށް ސަރުކާރުގެ ނުފޫޒާއި ބާރު ވަރަށް ބޮޑަށް ވަންނާނެ ކަމަށް ބުނެ، މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ)އިން މިއަދު ކަންބޮޑުވުން ފާޅުކޮށްފިއެވެ.
މި ބިލު އެކުލަވައިލައިފައިވަނީ މޯލްޑިވްސް ބްރޮޑްކާސްޓިން ކޮމިޝަން (އެމްބީސީ) އާއި މޯލްޑިވްސް މީޑިއާ ކައުންސިލް (އެމްއެމްސީ) އެއްކޮށްލައި އާ ކޮމިޝަނެއް އުފައްދައި، ވަކިވަކި ނޫސްވެރިން 10،000 ރުފިޔާއާ ހަމައަށް ޖޫރިމަނާކުރެވޭ ގޮތަށެވެ.
އެ ބިލު ހުށަހެޅުއްވީ އަމިއްލަ ގޮތުން ވާދަކުރައްވައިގެން އިންތިޚާބުވި ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރެވެ.
އެކަމާ ގުޅުވައި އެ އެސޯސިއޭޝަނުން ނެރުނު ބަޔާނެއްގައި ބުނީ، އެ ބިލުގެ ސަބަބުން ގާނޫނު އަސާސީން ލިބިދީފައިވާ ނޫސްވެރިކަމުގެ މިނިވަންކަމުގެ ހައްގު ވަރަށް ބޮޑަށް ހަނިވެ، ނޫސްވެރިންގެ މަސައްކަތަށް ބޮޑެތި ހުރަސްތަކެއް އެޅޭނެ ކަމަށެވެ.
މީޑިއާތައް އަމިއްލަށް ރެގިއުލޭޓު ކުރުމަށް މިހާރު އޮތް ބާރު ގެއްލި، ސަރުކާރުގެ ނުފޫޒާއި ބާރު މީޑިއާއަށް ވަރަށް ބޮޑަށް ވަންނާނެ ކަމަށާއި މީޑިއާގެ މިނިވަންކަން އެތައް އަހަރެއް ފަހަތަށް ސޮއްސައިލާނެ ކަމަށް އެ ޖަމިއްޔާއިން ބުނެފައިވެއެވެ.
މޯލްޑިވްސް ޖާނަލިސްޓް އެސޯސިއޭޝަންގެ މެންބަރުން: މިއަދު ހުށަހެޅި ބިލުގެ ސަބަބުން މީޑިއާތަކަށް ސަރުކާރުގެ ނުފޫޒާއި ބާރު ވަންނާނެ ކަމަށް އެ ޖަމިއްޔާއިން ވަނީ ބުނެފައި --- ފޮޓޯ/ މޯލްޑިވްސް ޖާނަލިސްޓް އެސޯސިއޭޝަން
ބިލާ ގުޅުވައި އެ ޖަމިއްޔާގެ އިތުރު ކަންބޮޑުވުންތައް:
- ކޮމިޝަން ހިންގުމުގެ ހުރިހާ ބާރެއް ރައީސަށް ދީފައިވާއިރު، އެމަގާމާއި ކޮމިޝަންގެ ނައިބު ރައީސްގެ މަގާމަކީ ރައީސުލްޖުމްހޫރިއްޔާ އައްޔަންކުރައްވާ މަގާމަކަށް ވުން
- ކަނޑައަޅާފައިވާ ސުލޫކީ މިންގަނޑުތަކާ ޚިލާފުވާ މީޑީއާތައް ޖޫރިމަނާކުރުމާއި ލައިސަންސް ހިފެހެއްޓޭނެ ކަމަށް ބިލުގައި ބަޔާންކޮށްފައިވުން
- ވަކިވަކި ނޫސްވެރިންނަށް ބޮޑެތި ޖޫރިމަނާކުރެވޭނެ ގޮތަށް ބިލު އެކުލަވާލާފައިވުން
އެ ބިލުގައިވާ ގޮތުން އަލަށް އެކުލަވައިލާ ކޮމިޝަނުގެ މެންބަރުންގެ ތެރެއިން ހަތަރު މެންބަރުން އައްޔަން ކުރާނީ ރައީސުލްޖުމްހޫރިއްޔާ ރައްޔިތުންގެ މަޖިލީހަށް ނަން ފޮނުއްވައިގެނެވެ. ބާކީ ތިން މެންބަރުން އިންތިޚާބު ކުރަން ޖެހެނީ މީޑިއާތަކަށެވެ.
އެކަމުގެ ސަބަބުން ސަރުކާރުގެ ނުފޫޒު މީޑިއާތަކަށް ވަދެ، މިހާރު އޮތް މިންވަރަށް ވެސް މީޑިއާގެ ވެށި ގެއްލިގެންދާނެ ކަމަށް ޖާނަލިސްޓްސް އެސޯސިއޭޝަނުން ބުނެފައިވެއެވެ.
އެ ޖަމިއްޔާއިން ބުނީ، ނޫސްވެެރިކަމާއި މީޑިއާތައް ރެޖިއުލޭޓު ކުރުން ސަރުކާރުގެ ބާރުގެ ދަށަށް ގެނައުމަކީ ބަލައިގަނެވޭނެ ކަމެއް ނޫން ކަމަށާއި އެކަމާ ދެކޮޅަށް މަސައްކަތް ކުރާނެ ކަމަށެވެ.
މިހާރު އޮތް މީޑިއާގެ ސެލްފް ރެގިއުލޭޓަރީ ނިޒާމުގައި މައްސަލަތަކެއް އުޅޭނަމަ އެކަން ހައްލުކުރަން ވާނީ އެ ނިޒާމު އެކީ ނުގެއްލޭ ގޮތަށް ކަމަށާއި ނިޒާމުގައި ހުރި މައްސަލަތައް ހައްލުވާނެ ވަށާ ޖެހޭ ގޮތަކަށް ކަމަށް ވެސް އެމްޖޭއޭއިން ބުންޏެވެ. މިގޮތުން، މީޑިއާ ރެގިއުލޭޓު ކުރަން އުފައްދާ އާ ކޮމިޝަންގެ ތިން ބައި ކުޅަ އެއްބައި އޮންނަން ވާނީ މީޑިއާތަކާއި މަދަނީ ޖަމިއްޔާތައް ތަމްސީލުވާ ގޮތަށް ކަމަށް ގަބޫލުކުރާ ކަމަށް އެ ޖަމިއްޔާއިން ބުނެފައިވެއެވެ.