ރައްޔިތުންގެ މަޖިލީހަށް މިހާރު ހުށަހަޅާފައި އޮތް 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު' ގެ ބިލާ ގުޅިގެން ކަންބޮޑުވުން ފާޅުކުރައްވާ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް މިއަދު ހުށަހެޅި ކުއްލި މައްސަލަ ބަލައިނުގަތުމުން، އެ މައްސަލާގައި ގަރާރެއް ހުށަޅައިފިއެވެ.
އެ ގަރާރު ހުށަހަޅާފައި ވަނީ ނޫސްވެރިކަމާއި ޚިޔާލުފާޅުކުރުމުގެ މިނިވަންކަން ފަދަ މަދަނީ އަދި ސިޔާސީ ހައްގުތަކަށް އުނިކަން އަންނަ ގޮތަށް ސަރުކާރުން ހިންގަމުންދާ އަމަލުތަކާ މެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށް ޓަކައެވެ.
މިއަދުގެ ޖަލްސާ ފެށިއިރު މަޖިލީހުގެ ރިޔާސަތުން ވަނީ މެންބަރު މީކާއިލްގެ ކުއްލި މައްސަލައެއް އިއުލާނުކުރައްވާފައެވެ. އެހެންނަމަވެސް ޝަރުތު ހަމަނުވާ ކަމަށް ވިދާޅުވެ، މަޖިލީހުގެ ރައީސް އަބްދުއްރަހީމް އަބްދުﷲ އެ ކުއްލި މައްސަލަ ބަލައެއްނުގަތެވެ.
އެއާއެކު ހަމަ އެ މައްސަލަ ގަރާރެއްގެ ސިފައިގައި މިއަދު މީކާއިލް ވަނީ މަޖިލީހަށް ހުށަހަޅުއްވާފައެވެ.
އެ ގަރާރުގެ ދީބާޖާގައި ބުނެފައި ވަނީ ގާނޫނުއަސާސީން ރައްޔިތުންނަށް ކަށަވަރުކޮށްދޭ ނޫސްވެރިކަމާއި ޚިޔާލުފާޅުކުރުން ފަދަ މަދަނީ އަދި ސިޔާސީ މިނިވަންކަމާއި ހައްގުތައް، ސަރުކާރުގެ އަމަލުތަކުގެ ސަބަބުން ހަނިވަމުންދާ ކަމަށެވެ. އެހެންކަމުން 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށް ޓަކައި އެ ގަރާރު ހުށަހަޅާ ކަމަށެވެ.
މީކާއިލް ހުށަހެޅުއްވި ގަރާރުގައި އޮތީ ނޫސްވެރިކަން ކުރުމާއި މުއާސަލާތީ ވަސީލަތްތައް ބޭނުންކޮށްގެން ޚަބަރާއި، މައުލޫމާތާއި، ފެންނަ ގޮތްތަކާއި، ޚިޔާލުތައް ފާޅުކުރުމާއި، ޝާއިއުކުރުމާއި، މިނިވަންކަމާއެކު ފިކުރުކުރުމާއި، އިސްލާމްދީނުގެ އަސްލަކާ ޚިލާފުނުވާ ގޮތެއްގެ މަތިން އެ މީހެއްގެ ބުއްދިއަށް ފެންނަ ގޮތްތަކާއި، ޚިޔާލުތައް ދުލާއި ގަލަމުން ފާޅުކުރުމުގެ މިނިވަންކަމަކީ ގާނޫނުއަސާސީން ކަށަވަރުކޮށްދީފައިވާ އަސާސީ ހައްގެއް ކަމަށެވެ.
އަދި ސަރުކާރާ ގުޅިފައިވާ މެންބަރެއްގެ ފަރާތުން މަޖިލީހަށް ހުށަހަޅާފައިވާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު ފަރުމަކޮށްފައި ވަނީ ނޫސްވެރިންނާއި މީޑިއާ ހިންގާ ފަރާތްތައް ސަރުކާރުގެ މުށުތެރެއަށްލައި، މީޑިއާތައް ރެގިއުލޭޓްކުރުމުގެ ބާރު، ސަރުކާރުގެ ފުރިހަމަ ކޮންޓްރޯލް އޮންނަ ގޮތަށް ހަދަން ކަމަށް އެ ގަރާރުގައި ބުނެފައިވެއެވެ.
އަދި އެ ބިލަކީ ސީދާ ރައީސް އައްޔަނުކުރާ މެންބަރުންގެ މައްޗަށް އެކުލަވާލެވޭ މީޑިއާ ކޮމިޝަނަކަށް ދިނުމާއެކު، ބޮޑެތި އަދަދުތަކުން ނޫސްވެރިންނާއި މީޑިއާތައް ޖޫރިމަނާކޮށް، ނޫސްތަކާއި މީޑިއާތައް ބަންދުކޮށްލުމުގެ ފުރިހަމަ މިނިވަންކަން ސަރުކާރަށް ލިބިގެންދާ ގޮތަށް އޮތް ބިލެއް ކަމަށް ބުނެފައިވެއެވެ.
މީޑިއާ ބިލަކީ ގާނޫނުއަސާސީއާއި ގާނޫނުތަކުން ރައްޔިތުންނަށް ކަށަވަރުކޮށްދޭ މަދަނީ އަދި ސިޔާސީ ހައްގުތައް ހަނިކޮށް، ރައްޔިތުންގެ މިނިވަންކަން ނަގާލުމުގެ ނިޔަތުގައި ސަރުކާރަށް ލިބިފައިވާ ރައްޔިތުންގެ މަޖިލީހުގެ އަޣުލަބިއްޔަތުގެ ނާޖާއިޒް ބޭނުންކޮށްގެން ހިންގަމުންދާ ޖަރީމާތަކަށް އިތުރުކުރެވޭ ބޮޅެއް ކަމަށް އެ ގަރާރުގައި ބަޔާންކޮށްފައިވެއެވެ.
'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު' ގެ ބިލުގައިވާ ކަންތައްތައް:
އެ ގާނޫނަށް އަމަލުކުރަން ފަށާ ހިސާބުން މޯލްޑިވްސް މީޑިއާ ކައުންސިލާއި، މޯލްޑިވްސް ބްރޯޑްކާސްޓިން ކޮމިޝަން އުވޭނެ ކަމަށެވެ.
ބިލުގައިވާ ގޮތުގައި ހަތް މެމްބަރުންގެ މައްޗަށް އެކުލެވޭ އާ ކޮމިޝަންގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްޙޫރިއްޔާ އައްޔަންކުރާ ހަތަރު މެންބަރަކާއި މީޑިއާތަކުން އައްޔަންކުރާ ތިން މެންބަރެކެވެ.
އޭގެ ތެރެއިން ތިން މެމްބަރުން އިންތިޚާބު ކުރަން ވޯޓުލެވޭނީ، ރަޖިސްޓްރީ ކޮށްގެން ހިންގާތާ ފަސް އަހަރު ވެފައިވާ ބްރޯޑްކާސްޓަރުންނާއި މީޑިއާތަކާއި އެ ތަންތަނުގައި މަސައްކަތް ކުރާ ނޫސްވެރިންނަށެވެ.
އަދި ގާނޫނުގެ ދަށުން އެކުލަވާލެވޭ ސުލޫކީ މިންގަނޑާ ތަކުރާރުކޮށް ޚިލާފުވެއްޖެ މީޑިއާއެއް ނަމަ 5،000 ރުފިޔާއާއި 50،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. އަދި ވަކިވަކި ނޫސްވެރިން ވެސް 5،000 ރުފިޔާއާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.
އެ ބިލާ ގުޅިގެން ވަރަށް ގިނަ ފަރާތްތަކުން ދަނީ ނުރުހުން ފާޅުކުރަމުންނެވެ. ޚާއްސަގޮތެއްގައި އެ ބިލަކީ ނޫސްވެރިކަމާއި މީޑިއާތަކުގެ މިނިވަންކަމަށް ނުފޫޒުފޯރުވުމުގެ ގޮތުގައި ސިފަކުރެއެވެ.