އިއްޔެ، 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި ރައްޔިތުންގެ މަޖިލީހަށް ހުށަހެޅި ބިލު ގާނޫނެއްގެ ގޮތުގައި ފާސްވެއްޖެނަމަ، ނޫސްވެރިކަމުގެ ދާއިރާގައި ރާއްޖެ ހާސިލްކޮށްފައިވާ ކުރިއެރުމާއި ކާމިޔާބީތައް އެތައް ގުނައަކުން ފަހަތަށް ޖައްސާލާނެކަމުގެ ކަންބޮޑުވުން އެބަ އޮތްކަމަށް އިދިކޮޅު މައި ޕާޓީ އެމްޑީޕީން މިއަދު ބުނެފިއެވެ.
މަޖިލީހަށް މިއަދު ހުށަހެޅި ބިލުގައި ވަނީ މޯލްޑިވްސް ބްރޮޑްކާސްޓިން ކޮމިޝަން (އެމްބީސީ) އާއި މޯލްޑިވްސް މީޑިއާ ކައުންސިލް (އެމްއެމްސީ) އެއްކޮށްލައި އާ ކޮމިޝަނެއް އުފައްދައި، ވަކިވަކި ނޫސްވެރިން 10،000 ރުފިޔާއާ ހަމައަށް ޖޫރިމަނާކުރެވޭ ގޮތަށެވެ.
މިކަމާ ގުޅުވައި އެމްޑީޕީން މިއަދު ނެރުނު ނޫސްބަޔާނެއްގައި ވަނީ، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)ގެ މެމްބަރުންނާ މިއަދު އެ ޕާޓީން ބައްދަލުކޮށްފައި ވާކަމަށެވެ. އަދި އެ ބައްދަލުވުމުގައި، މި ބިލާ މެދު ނޫސްވެރިންގެ ހުރި ގިނަ ކަންބޮޑުވުންތަކެއް ޕާޓީއާ ހިއްސާކޮށްފައި ވާކަމަށެވެ.
އެގޮތުން، ނޫސްވެރިންގެ ފަރާތުން ހިއްސާކުރި އެންމެ ބޮޑު އެއް ކަންބޮޑުވުމަކީ، މޯލްޑިވްސް މީޑިއާ ކައުންސިލް އުވައިލައި މީޑިއާތައް ރެގިއުލޭޓްކުރުމުގެ ބާރު ސަރުކާރުގެ ކޮންޓްރޯލް އޮންނަ ގޮތަށް އެކުލަވައިލާ މީޑިއާ ކޮމިޝަނަށް ދޭ ގޮތަށް އޮތް އޮތުން ކަމަށް އެންޑީޕީން ބުންޏެވެ.
ބިލުގައި އޮތް ގޮތުންނަމަ، މި ކޮމިޝަނުގައި ހިމެނޭ ހަތް މެމްބަރުންގެ ތެރެއިން ހަތަރު މެމްބަރުންނަކީ ސީދާ ރައީސުލްޖުމްހޫރިއްޔާ އައްޔަނުކުރައްވާ މެމްބަރުންނެވެ. މީގެ އިތުރުން، ކޮމިޝަންގެ ރައީސް އަދި ނާއިބު ރައީސަކު ކަނޑައެޅުމުގެ ބާރު ވެސް ދީފައިވަނީ ރައީސުލްޖުމްހޫރިއްޔާއަށެވެ.
"ނޫސްވެރިކަމުގެ މިނިވަންކަން ކުރިއެރުވުމަކީ، މި ބިލުގެ އިސް އެއް މަގުސަދު ކަމަށް ބަޔާންކޮށްފައިވާއިރު، ބިލުގެ އެންމެހައި މާއްދާތައް ފަރުމާކޮށްފައި ވަނީ، ނޫސްވެރިންގެ މަސައްކަތުގައި އެފަރާތްތަކަށް އޮންނަ އެންމެހައި މިނިވަންކަމެއް ހަނިކުރެވިގެންދާ ގޮތަށް،" ބަޔާނުގައި ވެއެވެ.
ނޫސްވެރިން އަމަލުކުރަންޖެހޭ ސުލޫކީ މިންގަނޑާ ގުޅޭ ގޮތުން ބިލުގައި ހިމަނާފައި ހުރި ކަންކަމުގެ ތެރޭގައި، މީހެއްގެ ހުރުމަތާއި، އިއްޒަތާއި ގަދަރަށް އުނިކަން އަންނަ ބަސްތައް ޝާއިއުނުކުރުމާއި، ވަކި ފަރާތަކަށް ބުރަވުމެއްނެތި ޚަބަރު ގެނެސްދޭން ޖެހޭ ގޮތަށް މާއްދާތައް ހިމަނާފައި ވުމުގެ މަގުސަދަކީ ސަރުކާރުން ކުރާ ނޭދެވޭ ކަންކަމާއި ސަރުކާރަށް ފާޑުކިޔުން އަމާޒުވާ ގޮތަށް ގެނެސްދޭ އެއްވެސް ހަބަރުތައް ފެތުރުނަ ނުދިނުން ކަމުގައި އެމްޑީޕީން ވަނީ ސިފަކޮށްފައެވެ.
އަދި މީޑިއާ ކޮމިޝަނުން ބޭނުންވެއްޖެ ނަމަ، މީޑިއާތަކާއި ނޫސްވެރިން ޖޫރިމަނާ ކުރެވޭ ގޮތަށް ބިލުގައި ހިމަނާފައިވާ މާއްދަތަކަކީ ވެސް، ކަނޑައެޅިގެން، ޚިޔާލުފާޅުކުރުމުގެ މިނިވަންކަމަށް ހުރަސްއަޅާ މާއްދާތަކެއް ކަމަށް އެމްޑީޕީގެ ބަޔާނުގައި ވެއެވެ.
"މި ބިލު ގާނޫނެއްގެ ގޮތުގައި ފާސްވެގެން ގޮސްފިނަމަ، ނޫސްވެރިކަމުގެ ދާއިރާގައި ރާއްޖެ ހާސިލްކޮށްފައިވާ ކުރިއެރުމާއި ކާމިޔާބީތައް އެތަށް ގުނައަކުން ފަހަތަށް ޖައްސާލާނެކަމުގެ ކަންބޮޑުވުން ނޫސްވެރިންގެ މެދުގައި އޮތްކަން ފާހަގަކުރަން،" އެ ބަޔާނުގައި ވެއެވެ.
މީގެ އިތުރުން، މި ބިލު މިހާރު އޮތްގޮތަށް ފާސްކޮށްފި ނަމަ، ނޫސްވެރިކަމުގެ މިނިވަންކަން އިންތިހާ ދަރަޖައަށް ހަނިވެ، ނޫސްވެރިންގެ މަސައްކަތްތަކުގައި ގިނަ ގުނަ ގޮންޖެހުންތަކާ ކުރިމަލާންޖެހޭނެކަން ވެސް ނޫސްވެރިންގެ ވާހަކަތަކުން ފާހަގަވެފައިވާކަމަށް އެ ބަޔާނުގައި ވެއެވެ.
އެހެންކަމުން، ނޫސްވެރިންގެ ހުރި ކަންބޮޑުވުންތަކަށް ހައްލު ހޯދުމަށްޓަކައި އިދިކޮޅު ޕާޓީއެއްގެ ހައިސިއްޔަތުން، ކުރަންޖެހޭ ކަންކަން ކުރަން އެމްޑީޕީން ނިންމާފައި ވާކަން އެ ބަޔާނުގައި ހާމަކޮށްފައި ވެއެވެ. އަދި ޚިޔާލުފާޅުކުރުމާއި، ދުލާއި ގަލަމުގެ މިނިވަންކަމުގެ ދިފާއުގައި އަޅަންޖެހުނު ކޮންމެ ފިޔަވަޅެއް އެޅުމުގައި ވެސް އެމްޑީޕީން ދެމި އޮންނާނެ ކަމަށް އެ ބަޔާނުގައި ވެއެވެ.
އެމްޑީޕީން އިއްޔެ ވަނީ މި ބިލު އަނބުރާ ގެންދިއުމަށް ވެސް ގޮވައިލާފައެވެ.