ނޫސްތަކާއި މީޑިއާތައް ކޮންޓްރޯލް ކުރުމަކީ އެ މަނިކުފާނު ގަބޫލުކުރާ ހަމައެއް ނޫން ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
ނޫސްވެރިން ޖޫރިމަނާ ކުރެވޭ ގޮތަށް ރައްޔިތުންގެ މަޖިލީހަށް މިއަދު ބިލެއް ހުށަހަޅައިފައި ވަނިކޮށް ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ، އިސްލާމްދީނާއި ރާއްޖޭގެ ގާނޫނު އަސާސީއާ ޚިލާފު ނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިނގާ ސަރަހައްދުގައި ކޮންމެ ދިވެއްސަކަށް ވެސް އެމީހެއްގެ އަމިއްލަ މިނިވަންކަމާއެކު އެމީހަކު ބޭނުންކަމެއްކޮށް އުޅުމުގެ ހައްގު އޮންނާނެ ކަމަށެވެ.
މަޖިލީހަށް 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި މިއަދު ބިލެއް ހުށަހެޅުއްވީ އަމިއްލަ ގޮތުން ވާދަކުރައްވައި އިންތިޚާބުވި ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރެވެ.
މި ގާނޫނަށް އަމަލުކުރަން ފަށާ ހިސާބުން ރައީސުލްޖުމްޙޫރިއްޔާ، 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން' އުފައްދަވާނެއެވެ. މި ކޮމިޝަން ވެގެންދާނީ އަމިއްލަ ނަމުގައި ދައުވާކުރުމާއި ދައުވާ ލިބިގަތުމުގެ ބާރު ލިބިފައިވާ، އަދި އަމިއްލަ ނަމުގައި މުއާމަލާތް ކުރުމުގެ ހައިސިއްޔަތު ލިބިފައިވާ މިނިވަން ގާނޫނީ ޝަޚުސަކަށެވެ.
ހަމައެއާއެކު މި ގާނޫނަށް އަމަލުކުރަން ފަށާ ހިސާބުން ނޫސް މަޖައްލާ ފަދަ ތަކެތީގެ ގާނޫނާއި މޯލްޑިވްސް މީޑިއާ ކައުންސިލްގެ ގާނޫނު އުވިގެންދާނެއެވެ. އަދި ބްރޯޑްކާސްޓްކުރުމުގެ ގާނޫނުގެ ތިންވަނަ މާއްދާއިން ފެށިގެން 18 ވަނަ މާއްދާގެ ނިޔަލަށް، 20 ވަނަ މާއްދާއިން ފެށިގެން 37 ވަނަ މާއްދާގެ ނިޔަލަށް އަދި 42 ވަނަ މާއްދާއިން ފެށިގެން 45 ވަނަ މާއްދާގެ ނިޔަލަށް އުވޭނެއެވެ.
އެއާއެކު މޯލްޑިވްސް މީޑިއާ ކައުންސިލާއި، މޯލްޑިވްސް ބްރޯޑްކާސްޓިން ކޮމިޝަން އުވޭނެއެވެ. އެގޮތުން ގާނޫނަށް އަމަލުކުރަން ފަށާ ތާރީޚުން ފެށިގެން އުވިގެންދާނެ މަގާމުތައް:
- އެމްއެމްސީގެ ކައުންސިލް މެންބަރުން
- އެމްއެމްސީގެ ރައީސާއި ނައިބު ރައީސް
- ބްރޮޑްކާސްޓިން ކޮމިޝަންގެ މެންބަރުން
- ބްރޮޑްކާސްޓިން ކޮމިޝަންގެ ރައީސާއި ނައިބު ރައީސް
- ބްރޮޑްކާސްޓިން ކޮމިޝަންގެ ސެކްރެޓަރީ ޖެނެރަލް
މި މަގާމުތައް އުވިގެން ދިޔަ ނަމަވެސް ގާނޫނަށް އަމަލުކުރަން ފަށާ ތާރީޚުން ފެށިގެން އެމްއެމްސީއާއި ބްރޮޑްކާސްޓިން ކޮމިޝަންގައި ޚިދުމަތްކުރަމުންދާ މުވައްޒަފުން، އަލަށް އުފައްދާ ކޮމިޝަނަށް ބަދަލުވާނެއެވެ.
އެ ބިލާ ގުޅޭ ގޮތުން މީޑިއާތަކުންނާއި އިދިކޮޅުން ވަނީ ކަންބޮޑުވުން ފާޅުކޮށްފައެވެ. އެގޮތުން ބިލުގެ ސަބަބުން މީޑިއާތަކަށް ސަރުކާރުގެ ނުފޫޒާއި ބާރު ވަރަށް ބޮޑަށް ވަންނާނެ ކަމަށް މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ)އިން ވަނީ ބުނެފައެވެ.
މީގެ އިތުރުން އެމްޑީޕީން ނެރުނު ބަޔާނެއްގައި ވަނީ، މިއީ މީޑިއާތައް އަމިއްލައަށް ރެގިއުލޭޓް ކުރުމަށް އޮތް މަގު ބަންދުވެ ސަރުކާރުގެ ނުފޫޒު މީޑިއާތަކުގެ މައްޗަށް ހައްދެއް ނެތި ހިންގުމަށް ފަހިކުރާ ފުރުސަތެއް ކަމަށް ބުނެ ފާޑުކިޔައިފައެވެ.