ސިޔާސީ ޕާޓީތަކަށް މެންބަރުން ވެއްދުން މެދުކަނޑާލުމަށް އިލެކްޝަންސް ކޮމިޝަން (އީސީ)އިން ނިންމާފައިވާ ނިންމުން ބަދަލުކޮށް، ވަގު ފޯމު ފުރާ ޕާޓީތަކަށް އެކަނި މެމްބަރުން ވެއްދުން މެދުކަނޑައިލުމަށް އިދިކޮޅު އެމްޑީޕީން މިއަދު ގޮވާލައިފިއެވެ.
އެމްޑީޕީން އެހެން ގޮވާލާފައި ވަނީ ސިޔާސީ ޕާޓީތަކަށް މެމްބަރުން ވެއްދުމުގެ ނިޒާމު ހަރުދަނާކޮށް ޑިޖިޓަލް ނިޒާމަކަށް ބަދަލުކުރުމަށް، މިހާރު ބޭނުންކުރަމުން އަންނަ "ސިމެދަ" ޕޯޓަލް މެދުވެރިކޮށް ފޯމު ހުށަހެޅުން މި މަހުގެ 30ވަނަ ދުވަހުގެ ނިޔަލަށް ހުއްޓާލުމަށް އެ ކޮމިޝަނުން ނިންމާފައި ވަނިކޮށެވެ.
ސަރުކާރު ހިއްސާވާ މައި ޕާޓީ ޕީއެންސީއަށް މެމްބަރުން އިތުރުކުރުމަށް ވަގު ފޯމު ހުށަހެޅި މައްސަލަ ވެސް މިފަހުން ވަނީ ފެންމަތިވެފައެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި އެޕާޓީގެ ގާނޫނީ ވަކީލުންގެ ޓީމުގައި ހިމެނޭ މަހްފޫޒް ސައީދު ވިދާޅުވީ، ސިޔާސީ ޕާޓީތަކަށް ވަނުމުގެ ހައްގު ނުހިފެއްޓޭނެ ކަމަށެވެ.
މި މައްސަލައިގެ ތަހުގީގު ފުރިހަމަ ކުރެވެން ދެން އީސީއަށް ޕީއެންސީން ހުށަހަޅާފައި ހުރި ފޯމުތައް ޕްރޮސެސްނުކޮށް މަޑުކުރުމަށް މަހުފޫޒް ވަނީ ގޮވާލައްވާފައެވެ.
31 ޖެނުއަރީގެ ފަހުން އެއްވެސް ސިޔާސީ ޕާޓީއެއްގެ ފޯމު ޕްރޮސެސް ނުކުރައްވާނެ ކަމަށް އިލެކްޝަންސް ކޮމިޝަނުން މިހާރު ވިދާޅުވެފައި އޮތް ގޮތަށް ބަދަލު ގެންނަވައި، ހަމައެކަނި ވަގު ފޯމު ހުށަހަޅާފައި އޮތް ޕާޓީން ހުށަހަޅާފައި ހުރި ފޯމުތައް ބަލަނުގަތުމަށް ގޮވާލަން
އިތުރަށް ވާހަކަދައްކަވަމުން މަހުފޫޒް ވިދާޅުވީ، މި މައްސަލަ ތަހުގީގު ކުރާއިރު މެންބަރަކަށް ވުމަށް އެދޭ މީހާގެ ބައިގަ އެއް ފޯނު ނަންބަރެއް ޖާހަފައި ހުރިތޯ ފުލުހުން ބަލަން ޖެހޭ ކަމަށާއި ހެކިންގެ ގޮތުގައި އެއް ފަރާތެއް ސޮއިކޮށްފައި ހުރީ ކިތައް ފޯމުގައިކަން ބަލަން ޖެހޭ ކަމަށެވެ.
ސޮއިކުރި ކޮންމެ ފޯމަކީ ޖިނާއީ ކުށުގެ އަމަލެއް ކަމަށާއި ކޮންމެ ފޯމެއް ވަކިން ތަހުގީގުކޮށް، ކޮންމެ ފޯމަކާ މެދު ވަކިން ފިޔަވަޅު އަޅަން އޭނާ ވަނީ ގޮވާލައްވާފައެވެ.
އޮޅުވާލައިގެން ޕީއެންސީއަށް މީހުން ވެއްދި މައްސަލައިގައި އެމްޑީޕީއަށް ނިސްބަތްވާ 3،000އަށްވުރެ ގިނަ މީހުންގެ ފަރާތުން ޝަކުވާ ލިބިފައިވާ ކަމަށް ވެސް އެމްޑީޕީން ބުނެފައިވެއެވެ.
އަދި، އެމްޑީޕީ ތަމްސީލުކުރާ 12 މެންބަރުގެ ސޮޔާ އެއްކޮށް، އިހުސާންގެ އިތުބާރު ނެތް މައްސަލަ މިދިޔަ ހުކުރު ދުވަހު ވަނީ މަޖިލީހަށް ވައްދައިފައެވެ.