ބޭރު ފައިސާއާ ބެހޭ ގަވައިދާއި މަނީ ޗޭންޖިން ވިޔަފާރިއާ ބެހޭ ގަވައިދާ ގުޅޭ ގޮތުން, ކަމާ ގުޅުން ހުރި ފަރާތްތަކުން ފާޅުކޮށްފައިވާ ކަންބޮޑުވުންތަކަށް ރިއާޔަތް ކުރުމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ގޮވައިލައްވައިފިއެވެ.
ރާއްޖޭގައި ޑޮލަރު ދައުރުވާ މިންވަރު އިތުރުކުރުމަށް އެމްއެމްއޭއިން ރޭ އައު ދެ ގަވައިދެއް ގެޒެޓުކޮށްފައިވާއިރު، ރާއްޖޭގެ ފަތުރުވެރިކަމުގެ ދާއިރާގެ ބާނީން ހިމެނޭ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ން ވަނީ ގަވައިދުތައް އެކުލަވައިލީ އެ ޖަމިއްޔާގެ ކަންބޮޑުވުންތަކަށް އިޖާބަ ނުދީ ކަމަށް ބުނެފައެވެ.
އެ ބަޔާން ނެރުނު ފަހުން ޝާހިދު އެކްސްގައި ކުރެއްވި ޕޯސްޓެއްގައި ވަނީ، ދެ ގަވައިދަށް ބަދަލުތައް ގެނެސްފައިވަނީ ކަމާ ގުޅުންހުރި ފަރާތްތަކާ މަޝްވަރާނުކޮށް ކަމަށްވާތީ އެކަމާ ކަންބޮޑުވާ ކަމަށެވެ. އަދި އައު ގަވައިދުތަކުން ސީދާ އަސަރުކުރާ އެއް ބަޔަކީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތައް ކަމަށްވާއިރު، ރިސޯޓުތަކާއި ގެސްޓްހައުސްތަކާއި ލިވަބޯޑުގެ މަޝްވަރާ ހޯދައި އެފަރާތްތަކުގެ ކަންބޮޑުވުންތަކަށް ސަރުކާރުން ރިއާޔަތް ކުރުމަކީ މުހިންމު ކަމެއް ކަމަށް އޭނާ ވިދާޅުވިއެވެ.
"ދިމާވެފައިވާ މައްސަލައަށް ޙައްލު ހޯދުމަށް އަޅާ ފިޔަވަޅެއްގެ ސަބަބުން އެންމެ ބޮޑު ސިނާއަތަށް ގެއްލުމެއް ލިބުމަކީ މައްސަލަ ޙައްލުވުމުގެ ބަދަލުގައި މުޅި އިގުތިސާދަށް އިތުރު ގެއްލުން ލިބިދާނެކަމެކެވެ." ޝާހިދު ވިދާޅުވިއެވެ.
އެމްއެމްއޭއިން ގެޒެޓުކުރި ބޭރު ފައިސާއާ ބެހޭ ގަވައިދުގައި ވަނީ ފަތުރުވެރިންނަށް ޚިދުމަތްދޭ ތަންތަނަށް އަންނަ ކޮންމެ ފަތުރުވެރިއަކަށް ވަކި ރޭޓަކުން ރާއްޖޭގެ ބޭންކަކުން ޑޮލަރު މާރުކުރަންޖެހޭ ކަމަށް ބަޔާންކޮށްފައެވެ.
އެ ގަވާއިދުގައި ވާގޮތުން، ރިޒޯޓުތަކަށް ކޮންމެ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެމަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު، އެ މަހަށްފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަން ވާނެއެވެ. ގެސްޓްހައުސްތަކަށް އަންނަ ކޮންމެ ފަތުރުވެރިއަކަށް އެ މުއްދަތުގައި 25 ޑޮލަރު މާރުކުރަން ޖެހޭނެއެވެ.
މީގެ އިތުރުން ފަތުރުވެރިކަމުން ރާއްޖެއަށް ލިބޭ ހުރިހާ ބޭރު ފައިސާއެއް ރާއްޖޭގެ ބޭންކުތަކަށް ޖަމާކުރަންޖެހޭ ކަމަށް ވެސް އެ ގަވައިދުގައިވެއެވެ.
އެމްއެމްއޭއިން ވަނީ މި ގަވާއިދުތަކުގެ ސަބަބުން ރާއްޖޭގެ ބޭންކިން ނިޒާމަށް ވަންނަމުންދާ ބޭރު ފައިސާގެ ނިސްބަތް އިތުރުވެ ބޭންކިން ނިޒާމުން ވިޔަފާރިތަކަށާއި އާންމުންގެ ބޭނުންތަކަށް ފޯރުކޮށްދޭ ބޭރު ފައިސާގެ ނިސްބަތް އިތުރުކުރުމަށް މަގުފަހި ވާނެ ކަމަށް ބުނެފައެވެ.
އެ ގަވައިދުގެ ސަބަބުން ބޭންކަށް ވަންނަ ޑޮލަރު އިތުރުވި ނަމަވެސް، ކޮންމެ ފަތުރުވެރިއަކަށް ޑޮލަރު މާރުކުރަން ޖެހުމަކީ ގެސްޓްހައުސްތައް ފަދަ ވިޔަފާރިތަކަށް ގެއްލުންވާނެ ކަމެއް ކަމަށް ބުނެ ބައެއް ފަރާތްތަކުން ކަންބޮޑުވުން ފާޅުކޮށްފައިވެއެވެ.
ބޭރު ފައިސާ އާ ބެހޭ ގަވައިދާ ގުޅޭ ގޮތުން އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް މީގެ ކުރިން ވިދާޅުވީ، ބޭރު ފައިސާގެ މައްސަލަ ހައްލުކުރަން މި ސަރުކާރުން އެޅީ މުހިންމު ފިޔަވަޅެއް ނަމަވެސް އެކަން ތަންފީޒުކޮށްފައިވަނީ އެންމެ ރަނގަޅު ގޮތަކަށް ނޫން ކަމަށެވެ.