މިއަހަރަކީ ބައިނަލްއަގުވާމީ ފުޓްބޯޅައިގައި ރާއްޖޭގެ ޒުވާން ޓީމުތަކުގެ ފެންވަރު ސާބިތު ކޮށްދިނުމަށް ރަނގަޅު ފުރުސަތުތަކެއް ލިބެމުންދާ އަހަރެކެވެ. ދިވެހި ފުޓްބޯޅައިގެ ކުރިމަގު އޮތް ހިސާބު ދައްކާލުމަށް ރަނުގެ ފުރުސަތުތަކެއް ލިބެމުންދާ އަހަރެކެވެ. ނަމަވެސް ހިތާމައަކީ އުންމީދުކުރެވޭ ވަރާ ގާތަށް ވެސް ކަންކަން ނުދާތީއެވެ. ބައިނަލްއަގުވާމީ މުބާރާތްތަކުގައި ރާއްޖޭގެ ޒުވާން ޓީމުތައް މިދަނީ ވަރަށްހިތި ތަޖުރިބާތަކެއް ކުރަމުންނެވެ.
ރާއްޖޭގެ 15 އަހަރުންދަށުގެ ގައުމީ ޓީމު ސާފް ޗެމްޕިއަންޝިޕްގައި ވާދަކޮށްފައިވާއިރު، 16 އަހަރުންދަށުގެ ޓީމު އަދި 18 އަހަރުންދަށުގެ ޓީމު ދަނީ މުބާރާތްތަކުގައި ވާދަކުރަމުންނެވެ. އޭގެ އިތުރުން މިއަހަރުގެ ތެރޭގައި 19 އަހަރުންދަށުގެ މުބާރާތެއްގައި ވެސް ރާއްޖެއިން ވާދަކުރުމަށް ހަމަޖެހިފައިވެއެވެ.
އޭއެފްސީ 16 އަހަރުންދަށުގެ ޗެމްޕިއަންޝިޕްގައި ވާދަކުރާ ރާއްޖޭގެ ޓީމު --- ފޮޓޯ/ އެފްއޭއެމް
ފަނަރަ އަހަރުންދަށުގެ ޓީމުގެ ތަޖުރިބާ ވަރަށް ހިތި!
ނޭޕާލްގައި މިދިޔަ މަހުގެ 18އިން ފެށިގެން 27ގެ ނިޔަލަށް ކުރިއަށްދިޔަ 15 އަހަރުންދަށުގެ ސާފް ޗެމްޕިއަންޝިޕްގެ ގްރޫޕް ސްޓޭޖުގައި ރާއްޖެ ވާދަކުރިއެވެ. އެ މުބާރާތުގައި ރާއްޖެ ލައްވާލާފައިވަނީ އިންޑިއާ އަދި ނޭޕާލާއެކު 'ގްރޫޕް ބީ'ގައެވެ. އެ މުބާރާތުގެ ފުރަތަމަ މެޗުގައި އިންޑިއާ އަތުން 9-0 ލަނޑުގެ ނަތީޖާއަކުން ރާއްޖެ ބަލިވިއިރު، ނޭޕާލް އަތުން ބަލިވީ 6-0 ލަނޑުގެ ނަތީޖާއަކުންނެވެ.
އެ މުބާރާތުގެ ގްރޫޕް ސްޓޭޖު ރާއްޖެ ނިންމާލީ ބޮޑު ލަދަކާއެކުއެވެ. އެ މުބާރާތުގެ ގްރޫޕް ސްޓޭޖުގައި އެންމެ ގިނަ ލަނޑު ވަދެފައިވަނީ ރާއްޖެ ކޮޅަށެވެ. ރާއްޖެ ކޮޅަށް 15 ލަނޑު ވަދެފައިވާއިރު، 'ގްރޫޕް އޭ'ގައި ވާދަކުރި ސްރީ ލަންކާ ކޮޅަށް ވަދެފައިވަނީ 10 ލަނޑެވެ. އެ މުބާރާތުގައި ރާއްޖޭގެ ޓީމަށް ލަނޑެއް ކާމިޔާބު ކުރެވިފައެއް ވެސް ނުވެއެވެ.
16 އަހަރުންދަށް އަދި 18 އަހަރުންދަށުގެ ޓީމުގެ ނަތީޖާތައް ވަރަށް ގޯސްކޮށް!
މިމަހުގެ 18 ވަނަ ދުވަހު ބޫޓާނުގައި ފެށި 18 އަހަރުންދަށުގެ ސާފް ޗެމްޕިއަންޝިޕްގައި ރާއްޖޭން ދަނީ ވާދަކުރަމުންނެވެ. ލީގު އުސޫލުން ކުރިއަށްދާ އެ މުބާރާތުގައި ރާއްޖެއާއެކު ހިމެނެނީ ބޫޓާނާއި ނޭޕާލާއި އިންޑިއާ އަދި ބަނގުލަދޭޝެވެ.
އެ މުބާރާތުގައި މިހާތަނަށް ރާއްޖޭގެ ޓީމު ދެ މެޗު ކުޅެފައިވާއިރު، ފުރަތަމަ މެޗުގައި ބޫޓާން އަތުން ރާއްޖެ ބަލިވީ 1-0 ލަނޑުގެ ނަތީޖާއަކުންނެވެ. ދެވަނަ މެޗުގައި ބަނގުލަދޭޝް އަތުން ރާއްޖެ ބަލިވީ 2-0 ލަނޑުގެ ނަތީޖާއަކުންނެވެ. ރާއްޖެ ވާދަކޮށްފައިވާ ބޫޓާނާއި ނޭޕާލަކީ ފުޓްބޯޅާގައި ރާއްޖެއަށް ވުރެ ފެންވަރުގެ ގޮތުން ދަށް ދެ ގައުމެވެ. އަދި މިއީ ސީނިއަރ ފުޓްބޯޅައަށް ބަލާއިރު ދިވެހި ޓީމު އަތުން ތަފާތު ބޮޑު ނަތީޖާތަކުން މީގެ ކުރީން ބަލިވެފައިވާ ދެ ގައުމުކަންވެސް ފާޙަގަކޮށްލަން ޖެހެއެވެ.
ނޭޕާލަކީ ވެސް ރާއްޖެއަށް ވުރެ ފުޓްބޯޅައިގައި ދަށް ޓީމެކެވެ. އިއްޔެ ރާއްޖޭގެ 18 އަހަރުންދަށުގެ ޓީމު ވަނީ ސާފް ޗެމްޕިއަންޝިޕްގައި ނޭޕާލާ ދެކޮޅަށް ނުކުމެފައެވެ. އެ މެޗުގައި ރާއްޖޭގެ މައްޗަށް ނޭޕާލުން ކުރި ހޯދީ 2-0 ލަނޑުގެ ނަތީޖާއަކުންނެވެ.
އޭއެފްސީ 16 އަހަރުންދަށުގެ ޗެމްޕިއަންޝިޕްގައި ވާދަކުރުމަށް ރާއްޖޭގެ ޓީމު ތަޖިކިސްތާނަށް ފުރުމުގެ ކުރިން އެފްއޭއެމްގެ ބައެއް އިސް ވެރިންނާ ސަލާމްކުރަނީ --- ފޮޓޯ/ އެފްއޭއެމް
އޭއެފްސީ 16 އަހަރުންދަށުގެ ޗެމްޕިއަންޝިޕް ކޮލިފައިންގައި ވެސް ރާއްޖޭން ދަނީ ވާދަކުރަމުންނެވެ. ރާއްޖެ ހިމެނެނީ ކޮލިފައިންގެ 'ގްރޫޕް ބީ'ގައެވެ. އެ ގްރޫޕްގެ މެޗުތައް ތަޖިކިސްތާނުގައި ކުރިއަށްދާއިރު، މެޗުތައް ފެށިފައިވަނީ މިދިޔަ ބުދަ ދުވަހުއެވެ. އެ ގްރޫޕްގައި ރާއްޖޭގެ އިތުރުން ދެން ވާދަކުރަނީ ތަޖިކިސްތާނާއި އޮމާން އަދި ސީރިއާއެވެ.
އެ މުބާރާތުގެ ފުރަތަމަ މެޗުގައި ރާއްޖެ ނުކުންނަން ޖެހުނީ އޮމާނާ ދެކޮޅަށެވެ. މިދިޔަ ބުދަ ދުވަހު ކުޅުނު އެ މެޗުން އޮމާން އަތުން ރާއްޖެ ބަލިވީ 8-0 ލަނޑުގެ ބޮޑު ތަފާތަކުންނެވެ. އެ މެޗުގައި ރާއްޖޭ ޓީމަށް ރަނގަޅު ކުޅުމެއް ދެއްކިފައެއް ވެސް ނުވެއެވެ. އިއްޔެ ކުޅުނު މެޗުގައި ތަޖިކިސްތާނު ވަނީ ރާއްޖޭގެ މައްޗަށް 14-0 ލަނޑުގެ ނަތީޖާއަކުން ކުރި ހޯދައިފައެވެ. އެހެންކަމުން މިހާތަނަށް ރާއްޖެ ކޮޅަށް ވަދެފައިވާ ލަނޑުގެ އަދަދު ވަނީ 22އަށް އަރައިފައެވެ. މިއީ ބައިނަލްއަގްވާމީ ފެންވަރުގައި ދިވެހި ފުޓްބޯޅައިގެ ވާހަކަ ދައްކާނަމަ، މީގެ އެތަކެއް އަހަރު ފަހަތަށް ދިވެހި ފުޓްބޯޅަ ދިއުން ފަދަ ދަށް ނަތީޖާތަކެކެވެ.
ރާއްޖޭގެ 19 އަހަރުންދަށުގެ ތަޖުރިބާ ކިހިނެއް ވާނެބާ؟
ރާއްޖޭގެ 19 އަހަރުންދަށުގެ ޓީމު އަންނަ މަހުގެ 31 ވަނަ ދުވަހު އޭއެފްސީ 19 އަހަރުންދަށުގެ ޗެމްޕިއަންޝިޕް ކޮލިފައިންއާ ކުރިމަތިލާން ޖެހޭނެއެވެ. ރާއްޖެ އޮތީ އުޒްބަކިސްތާނާއި ތަޖިކިސްތާނާއި ބަނގުލަދޭޝް އަދި ސްރީ ލަންކާއާއެކު 'ގްރޫޕް އޭ'ގައެވެ.
ރާއްޖޭގެ ފުރަތަމަ މެޗުގައި އަންނަ މަހުގެ 31 ވަނަ ދުވަހު ނުކުންނަން ޖެހޭނީ ދެކުނު އޭޝިއާގެ ގައުމެއް ކަމަށްވާ ލަންކާއާ ދެކޮޅަށެވެ. ލަންކާއަކީ ވެސް ބޫޓާނާއި ބަނގުލަދޭޝްއެކޭ އެއްގޮތަށް ރާއްޖެއަށްވުރެ ފުޓްބޯޅައިގައި ފެންވަރުގެ ގޮތުން ދަށް ގައުމެކެވެ. އެ މެޗަކީ ކޮލިފައިންގައި ރާއްޖެ ކުޅޭނެ އެންމެ ފަސޭހަ މެޗޭ ބުނުމަކީ ވެސް ދޮގަކަށް ނުވާނެއެވެ. ނަމަވެސް މިހާރު ކުރަމުންދާ ތަޖުރިބާތަކަށް ބަލާނަމަ، އެ މެޗުން ރާއްޖެއަށް މޮޅުވެވިދާނެއޭ ބުނެވޭކަށް ނެތެވެ.
މިހާރު ކުރިއަށްދާ އޭއެފްސީ 16 އަހަރުންދަށުގެ ކޮލިފައިންގައި ރާއްޖޭގެ އިތުރުން ދެކުނު އޭޝިއާގެ ޓީމުތައް ވާދަކުރެއެވެ. ނަމަވެސް އޭގެ ތެރެއިން ގިނަ ޓީމުތައް ރާއްޖެއިން ހޯދާ ނަތީޖާތަކަށްވުރެ ރަނގަޅު ނަތީޖާތައް ނެރެމުންދާކަން ފާހަގަކޮށްލެވެއެވެ.
އޭއެފްސީ 16 އަހަރުންދަށުގެ ކޮލިފައިންއަށް ބަލައިލާއިރު، ދެކުނު އޭޝިއާއަށް ނިސްބަތްވާ އަފްޣާނިސްތާނާއި އިންޑިއާއިން ދަނީ ވަރަށް ރަނގަޅު ނަތީޖާތަކެއް ނެރެމުންނެވެ. ނޭޕާލާއި ބަނގުލަދޭޝްގެ ނަތީޖާތައް ވެސް ރާއްޖޭގެ ނަތީޖާތަކަށްވުރެ ރަނގަޅެވެ.
އެފްއޭއެމްއާއި ރާއްޖޭގެ ފުޓްބޯޅައަށް ގިނަ ފާޑު ކިޔުންތަކެއް!
ސަރުކާރުގެ ބަޖެޓުން ކުޅިވަރު ތަރައްގީ ކުރުމަށް އެންމެ ބޮޑު ހަރަދެއް ކުރަމުންދަނީ ރާއްޖޭގެ އެއްވަނަ ކުޅިވަރު ކަމަށްވާ ފުޓްބޯޅައަށެވެ. އެގޮތުން ފުޓްބޯޅައިގެ ބެލެނިވެރި ފަރާތް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އަށް ސަރުކާރުން ވަރަށް ބޮޑު ހޭދައެއް ކުރެއެވެ. އަދި ޚާއްސަކޮށް އެފްއޭއެމްގެ މި ހިނގާ ދައުރުގައި ފުޓްބޯޅައަށް ވަރަށް ބޮޑު ހޭދައެއް ކުރަމުންދާކަން ފާހަގަކޮށްލެވެއެވެ. އަދި ސަރުކާރުންވެސް މި ކުޅިވަރަށް ކުރާ ހޭދަ އިހަށްވުރެ މިހާރު އިތުރުކަން ފާހަގަކޮށްލަން ޖެހެއެވެ.
ރާއްޖޭގެ ޒުވާން ޓީމުތައް ނުވަތަ މުސްތަގުބަލުގައި ރާއްޖޭގެ ސީނިއާ ޓީމަށް ވެގެންދާނެ ޓީމުތައް ނެރެމުންދާ ނަތީޖާތަކަށް ގިނަ ބަޔަކު އެކި ގޮތްގޮތުން ދަނީ ފާޑު ކިޔަމުންނެވެ. މިހާރު އެފްއޭއެމްއަށް ކިޔަމުންދާ ފާޑު ކިޔުންތައް ދުވަހަކަށްވުރެ ދުވަހެއް ދަނީ އިތުރުވަމުންނެވެ. ވާނީ ވެސް އެހެންތާއެވެ. އެކަމުގެ ޒިންމާ ނަގަން ޖެހޭ ފަރާތަކީ އެފްއޭއެމްއެވެ.
އޭއެފްސީ 16 އަހަރުންދަށުގެ ޗެމްޕިއަންޝިޕްގައި ވާދަކުރުމަށް ރާއްޖޭގެ ޓީމު ތަޖިކިސްތާނަށް ފުރުމުގެ ކުރިން އެފްއޭއެމްގެ ބައެއް އިސް ވެރިންނާ ސަލާމްކުރަނީ --- ފޮޓޯ/ އެފްއޭއެމް
އެ ނަތީޖާތަކާ ގުޅޭގޮތުން ރާއްޖޭގެ އެންމެ ތަޖުރިބާކާރު އެއް ކޯޗު ކަމަށްވާ އަލީ ސުޒޭން ބުނީ، އެއީ އެއްވެސް ބަޔަކު މާ ބޮޑަށް ވިސްނާ ކަމެއް ނޫން ކަމަށާއި ބޫޓާން އަތުން ރާއްޖެ ބަލިވުމަކީ ވިސްނާލަން ޖެހޭ ކަމެއް ކަމަށެވެ. އަދި 16 އަހަރުންދަށުގެ ކޮޅަށް އިންޑިއާ އިން ނުވަ ލަނޑު ޖެހުމުން ވެސް މާ ބޮޑު ކަމަކަށް ނުވި ކަމަށާއި މީގެ 33 އަހަރު ކުރިން ފެށިގެންވެސް ބޫޓާން އަތުން ރާއްޖެ މޮޅުވާ ކަމަށެވެ.
އެކަމާ ގުޅިގެން އެފްއޭއެމް އެގްޒެކެޓިވް ކޮމިޓީގެ މެންބަރު އަލީ އުމަރު ވިދާޅުވީ، ބައެއް މީހުން ބަލަނީ ހަމައެކަނި ނަތީޖާއަށް ކަމަށާއި އެ ކުދިންގެ ހުނަރުވެރި ކަމަށް ނުބަލާ ކަމަށެވެ. އަދި އެ ކުދިންގެ ކުރިމަގު ވަރަށް އުޖާލާ ކަމަށް ވެސް އޭނާ ވިދާޅުވިއެވެ.
އަލީ އުމަރަކީ ފުޓްބޯޅައިގައި ވަރަށް ތަޖުރިބާކާރު ބޭފުޅެކެވެ. ކުޅުންތެރިއެއްގެ ގޮތުގައި ގިނަ ތަޖުރިބާތަކެއް އަލީ އުމަރު ކޮށްފައިވެއެވެ. އަލީ އުމަރު ވިދާޅުވާ ގޮތަށް، އިންތިޒާރު ކޮށްގެން ފަހަރުގައި ރާއްޖޭގެ ފުޓްބޯޅަ ވަރަށް އުޖާލާ ވެގެން ގޮސްދާނެއެވެ. އަހަމަ އެހެންމެ، ޒިންމާ ނަގަންޖެހޭ ފަރާތްތަކުން ޒިންމާދާރު ކަމާއެކު، މިކަންކަމާ މެދު ވިސްނައި ފިޔަވަޅު ނާޅާނަމަ، ދިވެހި ފުޓްބޯޅަ މިއިން ދުވަހަކުވެސް ނުވެއްޓޭފަދަ އަނދަވަޅަކަށް ވެއްޓުން ހަމަ ގާތެވެ.
ރާއްޖެ ސައިޒުން ބޮޑެއް ނޫނެވެ. އެހެން ގައުމުތަކާ ކިޔާނަމަ އާބާދީވެސް ވަރަށް ކުޑައެވެ. އެހެން ނަމަވެސް، ފުޓްބޯޅައަށް ބަލާނަމަ، މީގެ 10 ވަރަކަށް އަހަރު ފަހަތަށް ޖެހިލިއަސް މި ރާއްޖެއަކީ ސަރަހައްދުގެ އެހެނިހެން ބާރުތަށް ޖެހިލުންވާ ގައުމެކެވެ. ވިސްނާލަން ޖެހޭ ކަންކަން ވަރަށް ގިނައެވެ.
ދިވެހި ފުޓްބޯޅަ އުޖާލާކުރާން ބޭނުންވާ ނަމަ، ޒުވާން ކުޅުންތެރިން ބިނާކުރާން ޖެހެއެވެ. ވަސީލަތްތައް ގާއިމު ކުރާން ޖެހެއެވެ. ފުރުސަތުތައް ތަނަވަސްކޮށްދޭން ޖެހެއެވެ. ރަނގަޅު ޕްލޭންތަކެއް ހެދި، އެއަށް އަމަލުުވެސް ކުރެވެން ޖެހެއެވެ. "ހޮޅި ވާހަކަތައް" ދެއްކުމުގެ ބަދަލުގައި އަމަލީގޮތުން ކަންކަން ކުރާން ޖެހެއެވެ. ދިވެހި ފުޓްބޯޅައިގެ މުސްތަގުބަލު އުޖާލާކުރާން ބޭނުންނަމަ، ޒުވާން ކުޅުންތެރީނަށް ގިނަގިނައިން ބައިނަލްއަގުވާމީ ތަޖްރިބާ ވެސް ހޯދައިދޭންވީއެވެ. ދުރުރާސްތާ ތަސައްވުރަކާއެކު ރަނގަޅު ތަމްރީނުތަކެއް ދީ، ޒުވާން ޓީމުތައް މުބާރާތްތަކަށް ފޮނުވައިގެން ސަރަހައްދީ ފެންވަރުގައި ރާއްޖެއަކީ ބަލިނުކުރެވޭ ވަރުގެ ގައުމަކަށް ވެދާނެއެވެ. ނަމަވެސް އެގޮތަށް އެކަން ނުގޮސްފިނަމަ، ކުރިމަގުގައި ރާއްޖޭގެ ސީނިއާ ޓީމުގެ ނަތީޖާތައް ހަމަ މިގޮތަށް ތަކުރާރުވުމަކީ ގާތް ކަމެކެވެ.