ދުނިޔޭގެ އެތައް މިލިއަން ބަޔަކަށް ރާއްޖެއަކީ ވަރުބަލިކަން ފިލުވާލުމަށް އަންނަ މަންޒިލެކެވެ. ނޫކުލައިގެ ސާފު މޫދާއި، ފަޅުތެރޭގައި ހަދާފައިވާ ވިލާތަކާއި، ހިތްގައިމު ގޮނޑުދޮށްތަކަކީ އާންމު ދިރިއުޅުމުގެ އަޑުގަދަ މާހައުލުން ދުރަށް ޖެހިލަން ލިބޭ ފުރުސަތެކެވެ. ނަމަވެސް، އަބޫދާބީގެ އީގަލް ހިލްސްގެ ޗެއާމަން މުޙައްމަދު އަލައްބާރު ކުރައްވާ ސުވާލު ތަފާތެވެ. އޭނާގެ އަމާޒަކީ ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ ތަނެއްގެ ބަދަލުގައި، މީހުންނަށް ހަގީގަތުގައި ވެސް ދިރިއުޅެވޭނެ ތަނަކަށް ހެއްދެވުމެވެ.
ދިވެހި ސަރުކާރާއެކު އީގަލް ހިލްސްއިން ވެފައިވާ ތާރީޚި އެއްބަސްވުމަށްފަހު މިއަދު ސޯޝަލް މީޑިއާގައި އާންމުކުރެއްވި ވީޑިއޯއެއްގައި އަލައްބާރު ވިދާޅުވި ގޮތުގައި، ދުނިޔޭގައި އޮތީ އެންމެ ރާއްޖެއެކެވެ.
"ވަރުބަލިވުމުން ބުނަނީ، ރާއްޖެއަށް ދާން ބޭނުމޭ. އެންމެ ފުރިހަމަ ޗުއްޓީ، އެންމެ ރީތި ތަން: އެއީ ރާއްޖެ. އެހެންވީމަ، އެއީ ދިރިއުޅެން ވެސް އެންމެ ފުރިހަމަ ތަނަށް ނުވާންވީ ސަބަބެއް ނެތް،" އޭނާ ފާހަގަކުރެއްވިއެވެ.
މިއީ ރަސްމާލެ މަޝްރޫއުގެ ތެރެއިން އީގަލް ހިލްސްއިން ތަރައްގީކުރާ "މޯލްޑިވްސް ވޯޓާފްރަންޓް އެންޑް މަރީނާ" ގެ މައިގަނޑު ތަސައްވުރެވެ.
އަލައްބާރަކީ ބޮޑެތި މަޝްރޫއުތަކަށް އާ މީހެއް ނޫނެވެ. އޭނާއަކީ ދުބާއީގެ މަޝްހޫރު ބުރުޖް ޚަލީފާއާއި ދުބާއީ މޯލް ފަދަ ތަންތަން ތަރައްގީކުރި އެމާރް ޕްރޮޕަޓީސްގެ ބާނީއެވެ. އޭގެ ފަހުން އޭނާ އުފެއްދި އީގަލް ހިލްސްއިން އަންނަނީ އަލްބޭނިއާގެ ދުރެސް ޔޮޓްސް އެންޑް މަރީނާއާއި ޝާރްޖާގެ މަރްޔަމް އައިލެންޑް ފަދަ ބައިނަލްއަގުވާމީ ބޮޑެތި މަޝްރޫއުތައް ހިންގަމުންނެވެ. ނަމަވެސް، އަލައްބާރު ވިދާޅުވާ ގޮތުގައި ރާއްޖޭގެ މަޝްރޫއު ތަފާތުވަނީ ރާއްޖޭގެ ނަމަށް ލިބިފައިވާ ބޮޑު މަގުބޫލުކަމުގެ ސަބަބުންނެވެ. އޭނާގެ އަމާޒަކީ ފަތުރުވެރިކަމުގެ އިންތަކުން ބޭރަށް ގޮސް، ލަގްޒަރީ ޗުއްޓީއެއްގެ ބަދަލުގައި ލަގްޒަރީ ދިރިއުޅުމެއް ތައާރަފުކުރެއްވުމެވެ.
މާލެއިން ފުރައިގެން ސްޕީޑްބޯޓުގައި 17 މިނެޓުން ދެވޭ ރާސްތާގައި އޮތް ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލޭގައި އީގަލް ހިލްސްއިން ގާތްގަނޑަކަށް 500 ހެކްޓަރުގެ ސަރަހައްދެއް ތަރައްގީކުރާނެއެވެ. މިއީ އާންމު ރިސޯޓަކަށް ވުރެ ބޮޑަށް، ފެންވަރު ރަނގަޅު ގެދޮރާއި، ހޮޓާތަކާއި، މަރީނާއަކާއި، ވިޔަފާރިކުރާ ތަންތަނުގެ އިތުރުން ސިއްހީ އަދި ތައުލީމީ ޚިދުމަތްތައް ހިމެނޭ ގޮތަށް ފަރުމާކުރާ ފުރިހަމަ ސަހަރެކެވެ.
"އަހަރެމެން މި ބިނާކުރަނީ މީހުންނަށް މަހަކަށް ނުވަތަ ހަފުތާއަކަށް ވެސް މަޑުކޮށްލެވޭނެ ފަދަ ދިރިއުޅުމުގެ ވައްޓަފާޅިއެއް،" އަލައްބާރު ވިދާޅުވިއެވެ.
ސަރުކާރުގެ އޮފިޝަލުން ސިފަކުރާ ގޮތުގައި، އީގަލް ހިލްސްއިން ތަރައްގީކުރާ ބަޔަކީ އެކި ފެންވަރުގެ އަދި އެކި އަގުތަކުގެ ޕްރޮޕަޓީތައް ހިމެނޭ ގޮތަށް ތަރައްގީކުރާ ފުރިހަމަ ސަހަރެކެވެ. މީގެ ތެރޭގައި ބައިނަލްއަގުވާމީ ސްކޫލްތަކާއި، ހޮސްޕިޓަލްތަކާއި، ކުޑަކުދިން ކުޅޭ ޕާކުތަކާއި، ތީމް ޕާކުތަކުގެ އިތުރުން ފަތުރުވެރިކަމާއި ދިރިއުޅުމަށް ބޭނުންވާ ވަސީލަތްތައް ހިމެނެއެވެ.
މި މަޝްރޫއުގެ މާލީ އަންދާޒާތަކަށް ބަލާއިރު، ދިވެހި ސަރުކާރުން މި މަޝްރޫއު ސިފަކޮށްފައިވަނީ 20 ބިލިއަން ޑޮލަރު (ގާތްގަނޑަކަށް 308 ބިލިއަން ރުފިޔާ) ގެ އިންވެސްޓްމަންޓެއްގެ ގޮތުގައެވެ. ނަމަވެސް އީގަލް ހިލްސްއިން ބުނެފައިވަނީ އެ ކުންފުނިން ތަރައްގީކުރާ ބަޔަށް އެކި ފިޔަވަހިތަކަށް ބަހާލައިގެން 12 ބިލިއަން ޑޮލަރު ހޭދަވާނެ ކަމަށެވެ. ދަ ނޭޝަނަލް ނޫހުގައި ރިޕޯޓުކޮށްފައިވާ ގޮތުން، މި މަޝްރޫއުގެ ސަބަބުން 30 ބިލިއަން ޑޮލަރަށް ވުރެ ގިނަ ގްރޮސް ފޮރިން އިންވެސްޓްމަންޓް ރާއްޖެއަށް ވަންނާނެ ކަމަށް ލަފާކުރެވެއެވެ. އަދި މަޝްރޫއު ފުރިހަމަވުމުން އަހަރަކު އެއް މިލިއަނަށް ވުރެ ގިނަ މީހުން ޒިޔާރަތްކޮށް، ފަތުރުވެރިކަމުގެ އާމްދަނީގެ ގޮތުގައި އަހަރަކު ދެ ބިލިއަން ޑޮލަރު ލިބޭނެ ކަމަށާއި، 54،000 އަށް ވުރެ ގިނަ ވަޒީފާ އުފެދޭނެ ކަމަށް އަންދާޒާކޮށްފައިވެއެވެ.
އަލައްބާރު ވިދާޅުވި ގޮތުގައި، އޭނާއަށް ގަބޫލުކުރެވޭ ގޮތުގައި މި މަޝްރޫއުން ލިބޭ ފައިދާއަކީ ދުނިޔޭގެ ނިސްބަތުން ވެސް އެންމެ ރަނގަޅު އެއް ފައިދާއަށް ވުމަކީ އެކަށީގެންވާ ކަމެކެވެ.
އީގަލް ހިލްސް އާއި ދިވެހި ސަރުކާރާ ދެމެދު ރާއްޖޭގައި 20 ބިލިއަން ޑޮލަރު ނުވަތަ ގާތްގަނޑަކަށް 308 ބިލިއަން ރުފިޔާގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް ސޮއިކުރުން --- ފޮޓޯ: ހައުސިން މިނިސްޓްރީމި މަޝްރޫއުގެ ދަށުން ދޫކުރާ ބިންތަކާއި އިމާރާތްތައް ދޫކުރާނީ ރާއްޖޭގެ ގާނޫނުތަކުގެ ދަށުން 99 އަހަރުގެ މުއްދަތަކަށެވެ. އީގަލް ހިލްސްއިން ބުނި ގޮތުގައި، ސަރުކާރުގެ ހުއްދައާއެކު މި ތަންތަން އެހެން ފަރާތްތަކަށް ބަދަލުކުރުމާއި ވާރުތަވުމުގެ ފުރުސަތު އޮންނާނެއެވެ. ނަމަވެސް، ސަރުކާރުން ސާފުކޮށްދީފައިވާ ގޮތުގައި ރަސްމާލޭގެ ބިމުގެ މިލްކުވެރިކަން އީގަލް ހިލްސްއަށް ދޫކޮށްލާފައެއް ނުވެއެވެ. އަދި ޕްރޮޕަޓީއެއް ގަތުމަކީ ރާއްޖޭގައި ދިރިއުޅުމުގެ ހުއްދަ އޮޓަމެޓިކުން ލިބޭނެ ކަމެއް ނޫން ކަމަށާއި، އިމިގްރޭޝަންގެ ގަވާއިދުތަކަށް އަމަލުކުރަން ޖެހޭނެ ކަމަށްވެސް ސަރުކާރުން ބުނެފައިވެއެވެ.
ތިމާވެށީގެ ގޮތުން ބަލާއިރު، އީގަލް ހިލްސްއިން ބުނެފައިވަނީ އިމާރާތްކުރުމުގެ މަސައްކަތް ކުރިއަށް ގެންދާނީ ހިއްކާފައިވާ ބިމެއްގައި ކަމަށާއި، އެ ކުންފުނިން އިތުރަށް ފަޅު ނުހިއްކާނެ ކަމަށެވެ. އަދި މަސައްކަތް ކުރިއަށްދާއިރު މިނިވަން ފަރާތަކުން ކަނޑުގެ ދިރުންތައް މޮނިޓާކުރާނެ ކަމަށްވެސް އެ ކުންފުނިން ބުނެފައިވެއެވެ.
"އަހަރެމެން ޖެހޭނެ ތެދުވެރިވާން، އަދި މީހުންނާއި ތިމާވެއްޓަށް އިހުތިރާމުކުރަން،" އަލައްބާރު ވިދާޅުވިއެވެ.
ވެލައާއި، މަހާއި، ފަރުތަކަށް ގެއްލުން ނުވާނެހެން ރައްކާތެރިކަމާއެކު މަސައްކަތް ކުރިއަށް ގެންދާނެ ކަމަށް އޭނާ ވައުދުވެވަޑައިގަތެވެ.
މުޅި ރަސްމާލެ މަޝްރޫއަކީ 1،100 އަށް ވުރެ ގިނަ ހެކްޓަރުގެ ބޮޑު ސަރަހައްދެކެވެ. މީގެ ތެރޭގައި 65،000 ބޯހިޔާވަހިކަން ގާއިމުކުރުމަށް ވަނީ ރާވާފައެވެ. މިއީ ތޮއްޖެހިފައިވާ މާލެއަށް އޮތް ބާރު ކުޑަކޮށް، ބޯހިޔާވަހިކަން ފޯރުކޮށްދިނުމުގެ ބޭނުމުގައި ކުރިއަށްގެންދާ މަޝްރޫއެކެވެ.
ކ. ފުށިދިއްގަރުފަޅުގައި ހިއްކަމުން އަންނަ ރަސްމާލެ -- ފޮޓޯ: އެޗްޑީސީއަލައްބާރު ފާހަގަކުރެއްވި ގޮތުގައި، ދިވެހިން ވަނީ އެ މީހުންގެ ތާރީޚުގައި ކުރާ އެންމެ ބޮޑު އިންވެސްޓްމަންޓާއެކު އެ ކުންފުންޏަށް އިތުބާރުކޮށްފައެވެ.
"މިއީ އަހަރެމެންނަށް ލިބޭ ޝަރަފެއް،" އޭނާ ވިދާޅުވިއެވެ.
އަދި ރައްޔިތުންގެ އުންމީދުތަކާ އެއްގޮތަށް މަސައްކަތް ފުރިހަމަކުރުމުގެ ތައުފީގު ﷲ މިންވަރުކުރެއްވުމަށް އެދޭ ކަމަށް ވިދާޅުވަމުން، އެ ކުންފުނިން ކުރާ ކޮންމެ ކަމެއްގައިވެސް ގައުމުގެ ނަމާއި އަބުރަށް އިސްކަންދޭނެ ކަމަށް އޭނާ ފާހަގަކުރެއްވިއެވެ.
މި ބޮޑު މަޝްރޫއާއެކު، ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ ތަނެއްގެ ގޮތުގައި އޮތް އޮތުން ބަދަލުވެގެންދާނެއެވެ. އާއިލާއާއެކު މަހެއްހާ ދުވަހު މަޑުކޮށްލައި، ކުޑަކުދިން ކުޅެ، މީހުންނަށް ވަޒީފާ އަދާކޮށް، ކަސްރަތުކޮށް، އަރާމުކޮށްލެވޭނެ ފުރިހަމަ މާހައުލަކަށް މިތަން ވާނެއެވެ. އަލައްބާރުގެ މި ތަސައްވުރު ހަގީގަތަކަށް ވެއްޖެނަމަ، މިއީ ހަމައެކަނި ރާއްޖެއަށް ޗުއްޓީއަށް އައުމުގެ ބަދަލުގައި، ރާއްޖޭގައި ދިރިއުޅުމަށް އަންނަ ބަދަލެކެވެ.