މޯލްޑިވްސް މީޑިއާ ކައުންސިލް (އެމްއެމްސީ) އިން ދޭ އުންމީދީ ނޫސްވެރިޔާގެ އެވޯޑް ހާސިލް ކޮށްފައިވާ, ސަން އޮންލައިންގެ މަލްޓި މީޑިއާ އެޑިޓަރު, މުޙައްމަދު ނާއިލް ޙަފީޒުގެ ފޮތް "ވާނެ" ނައިބު ރައީސް ހުސައިން މުޙައްމަދު ލަތީފް މިއަދު ނެރެދެއްވައިފިއެވެ.
މި ފޮތް ނެރެދެއްވީ ރައީސުލްޖުމްހޫރިއްޔާގެ ނައިބުގެ ރަސްމީ ގެކޮޅުގައި މިއަދު ނައިބުރައީސާއެކު ބޭއްވި ބައްދަލުވުމުގައެވެ.
ޒުވާނުންނަށް ޚާއްސަކޮށް ނާއިލް ނެރުނު މި ފޮތަކީ ޒުވާން އުމުރުގައި، ކާމިޔާބު މީހަކަށް ނުވަތަ ޝަޚުސިއްޔަތަކަށް ވުމަށް ޓަކައި، މަސައްކަތްކުރުމުގެ މުހިންމުކަމާއި، އެ ކަމަށް މަސައްކަތްކުރުމުގައި ޒުވާނުންނަށް ހިތްވަރު ދިނުމެވެ.
މީގެ އިތުރުން ނޫސްވެރިކަމުގެ ދާއިރާއަށް އޭނާ ވަންނަން މެދުވެރިވި ސަބަބާއި، މި ދާއިރާގައި މިހާތަނަށް ކުރެވުނު ތަޖުރިބާ ޒުވާނުންނަށް ކިޔައިދީފައިވާނެކަމަށް ނާއިލް ވަނީ ބުނެފައެވެ.
އުންމީދީ ނޫސްވެރިޔާ މުޙައްމަދު ނާއިލް ޙަފީޒުގެ ފޮތް "ވާނެ" ނައިބު ރައީސް ހުސައިން މުޙައްމަދު ލަތީފް ނެރެދެއްވުން -- ފޮޓޯ: ރައީސް އޮފީސް
"2023ވަނަ އަހަރު އެންމެ އުންމީދީ ނޫސްވެރިޔާކަމުގެ އެވޯޑު އަޅުގަނޑަށް ހާސިލްވި ދުވަހު އަޅުގަނޑު ނިޔަތްގަތް އެންމެ ބޮޑު އެއް ކަމަކީ، އަޅުގަނޑުފަދަ، އަދި މުސްތަގްބަލުގެ ޒުވާނުންނަށް އަޅުގަނޑުގެ ފަރާތުން ހިތްވަރު ލިބޭނެ ފަދަ އުންމީދީ ވާހަކަތަކެއް ގެނެސްދިނުން،" ނާއިލް ބުންޏެވެ.
ނާއިލް ވަނީ މި ފޮތަކީ ޒުވާނުންނަށް ޝައުގުވެރި، އުންމީދީ ވާހަކަތަކެއް ހުރި ފޮތަކަށް ވާނެ ކަމަށް އުންމީދުކުރާ ކަމަށް ބުނެފައެވެ.
"އަޅުގަނޑުގެ އުންމީދަކީ ޒުވާން އުމުރު، ޒުވާންކަމުގެ ހިތްވަރާއި ބުންވަރުގެ ބޭނުން ހިފައި ކާމިޔާބު މީހަކަށް ވުމަށް މަސައްކަތްކުރުމުގެ މުހިންމުކަން ޒުވާނުންނަށް، ކިޔުންތެރިންނަށް މި ފޮތުގެ ތެރެއިން، އެ މެސެޖު ލިބުން،" ނާއިލް ބުންޏެވެ.
މި ފޮތް އޮންލައިންކޮށް ދިވެހި ފޮތް އެޕްގެ ލިންކު މެދުވެރިކޮށް ގަންނަން ލިބެން ހުންނާނެއެވެ. އަދި ފޮތުގެ ކޮޕީއަކަށް 9413302 ނަންބަރަށް ވައިބާ މެސެޖުކޮށްގެން ޕްރީއޯޑަރުކުރެވޭނެއެވެ.
ނާއިލަކީ އުމުރުން އެންމެ 16 އަހަރުގައި ނޫސްވެރިކަމުގެ ދާއިރާގައި މަސައްކަތް ފަށައި، މިއަދު ވެސް މި ދާއިރާގައި މަސައްކަތް ކުރަމުން އަންނަ ޒުވާން ނޫސްވެރިއެކެވެ. ދެހާސް ތޭވީސް ވަނަ އަހަރު މޯލްޑިވްސް މީޑިއާ ކައުންސިލުން ދިން، "2022 ވަނަ އަހަރުގެ އެންމެ އުންމީދީ ނޫސްވެރިޔާ"ގެ އެވޯޑު ހާސިލްކުރުމަށްފަހު މިއަދު ނާއިލްގެ އަމާޒު ހުރީ މި ދާއިރާގައި އިތުރަށް ކުރިއަށް ދިއުމަށެވެ.
އަދި ޒަމާނީ ބަދަލުތަކުގެ ތެރެއިން، ނޫސްވެރިކަމަކީ އާ ޒުވާން ޖީލު ޝައުގުވެރިވާ، ބަލައިގަންނަ މަސައްކަތަކަށް ހެދުމެވެ. އަދި ދާއިރާއަށް ޝައުގުވެރިކަން ހުރި ޒުވާނުންނަށް އެހީތެރިކަން ފޯރުކޮށްދިނުމަށެވެ.