އަންހެން ނޫސްވެރިން، އެ މީހުން ކުރާ ނޫސްވެރިކަމުގެ މަސައްކަތްތަކާ ވިދިގެން ފުރައްސާރަކޮށް ދިމާކުރުމުގެ އަމަލުތައް ހިންގުން މިދިޔަ ދެތިން މަހެއްހާ ދުވަސްތެރޭ ކަންބޮޑުވާ މިންވަރަކަށް ގިނަވެފައިވާ ކަމަށް މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ)އިން އިއްޔެ ބުނެފިއެވެ.
އެމްޖޭއޭއިން އިއްޔެ ނެރުނު ބަޔާނެއްގައި ބުނީ، ސޯޝަލް މީޑިއާގެ އެކިއެކި ވަސީލަތްތައް މެދުވެރިކޮށް އަންހެން ނޫސްވެރިންނަށް ފުރައްސާރަކޮށް، ދިމާކޮށް، ބިރުދައްކާފައިވާ ހަތަރު މައްސަލައެއް އެ ޖަމިއްޔާގެ ސަމާލުކަމަށް އައިސްފައިވާ ކަމަށެވެ.
އޭގެ ތެރޭގައި، އެކްސްގައި ކާކުކަން ނޭނގޭ ގޮތަށް ހަރަކާތްތެރިވާ އެކައުންޓަކުން ސަންގު ޓީވީގެ ނޫސްވެރިއެއް ކަމަށްވާ ފާތިމަތު މަދަދާއަށް ފުރައްސާރަ ރައްދުވާ ގޮތަށް އޭނާގެ ފޮޓޯއާ އެކު ޕޯސްޓެއް ކޮށްފައިވާކަން އެމްޖޭއޭއިން ފާހަގަކުރިއެވެ.
"އަދި އެ ޕޯސްޓްކޮށްފައިވަނީ މި ފަހުން އޭނާ ރައީސްގެ އެކި އިވެންޓުތައް ކަވަރުކުރާތީ އެކަމާ ގުޅުވައެވެ. އަދި ޕޯސްޓަށް ކޮމެންޓްކުރި އެހެން އާންމު ފަރާތްތަކުން ވެސް އޭނާއަށް ފުރައްސާރަކޮށް ހަދާފައިވާކަން ފާހަގަކުރެވެއެވެ،" އެ ބަޔާނުގައިވެއެވެ.
އޭގެ އިތުރަށް އެމްޖޭއޭއިން ފާހަގަކުރި މައްސަލަތަކަކީ:
- ރިވާޔާ ނޫހުގެ އެޑިޓަރު އާއިދާ އަބްދުލްހަކީމް ވިޔަފާރިވެރިއަކާ ކުރި ސުވާލަކާ ގުޅިގެން، އެ ވިޔަފާރިވެރިޔާ އާއިދާއަށް ފުރައްސާރަކޮށް އެކްސްގައި ޕޯސްޓުތަކެއްކޮށްފައިވާ މައްސަލަ
- އަސްލު ޓީވީގެ އަންހެން ނޫސްވެރިއެއް ކަމަށްވާ ޝާމާ ޝުއައިބު، ފުލުހުން މަގުމަތީ ހިންގި އޮޕަރޭޝަނެއްގެ ފޮޓޯ ނެގުމުން އޭނާއަށް ފުލުހުން މަޖުބޫރުކޮށް އެ ފޮޓޯ އޭނާގެ ފޯނުން ފުހެލި މައްސަލައެއް
- ސަންގު ޓީވީގެ ނޫސްވެރިޔާ ލައިޝާ އަހުމަދު ޒަކީއަށް ސޯޝަލް މީޑިއާގެ އެކި ޕްލެޓްފޯމްތަކުގައި ދިމާކޮށް ފުރައްސާރަކޮށް އިންޒާރު ދިނުން
- މިހާރު ނޫހުގެ ނޫސްވެރިޔާ އަދި މި ޖަމިއްޔާގެ އެކްސްކޯ މެންބަރު އާސިމާ ނިޒާރު ލިޔުނު ލިޔުމަކާ ގުޅިގެން އޭނާއަށް ސޯޝަލް މީޑިއާގައި ފުރައްސާރަކޮށް، ދިމާކޮށް، ބިރުދައްކައި ހެދުން
އެމްޖޭއޭއިން ބުނީ، އަންހެން ނޫސްވެރިންނާ ދިމާކޮށް އެ މީހުންނާ ފުރައްސާރަކޮށް ބިރު ދެއްކުމަށް ކުރާ އަމަލުތައް އެ ޖަމިއްޔާއިން ހަރުކަށި އިބާރާތުން ކުށްވެރިކުރާ ކަމަށެވެ. އެފަދަ އަމަލުތައް އިތުރުވަމުން ދިޔުމަކީ އެ ޖަމިއްޔާއިން ކަންބޮޑުވާ ކަމެއް ކަމަށާއި ނޫސްވެރިން ކުރާ ނޫސްވެރިކަމުގެ މަސއްކަތްތަކާ ގުޅިގެން އެ މީހުންނާ ޒާތީ ގޮތުން ޖައްސާލައި ދިމާކޮށް ބިރުދައްކާ ހެދުމަކީ އެ ޖަމިއްޔާއިން އެއްވެސް މިންވަރަކަށް ގަބޫލުކުރާނެ ކަންކަމެއް ނޫން ކަމަށް އެ އެސޯސިއޭޝަނުން ބުންޏެވެ.
"އަދި މިފަދަ އަމަލުތަކަކީ ނޫސްވެރިން ކުރާ މަސައްކަތަށް ހުރަސްއަޅައި ރޫހާނީ ގޮތުން އެ މީހުން ބަލިކޮށްލައި ފަހަތަށް ޖައްސުވަން ބައެއް ފަރާތްތަކުން ގެންގުޅޭ އުކުޅުތަކެއް ކަމުގައި މި ޖަމިއްޔާއިން ގަބޫލުކުރަމެވެ،" އެމްޖޭއޭގެ ބަޔާނުގައިވެއެވެ.
އެ އެސޯސިއޭޝަނުން ބުނީ، މީޑިއާގެ ދާއިރާއާއި ނޫސްވެރިކަމުގައި އަންހެނުން ހަރަކާތްތެރިވާލެއް މަދުއިރު އަންހެން ނޫސްވެރިންނަށް ސީދާ އަމާޒުކޮށް އެ މީހުންނާ ދިމާކޮށް ފުރައްސާރަކޮށް، ބިރު ދެއްކުން އިތުރުވަމުން ދިއުމަކީ މި ދާއިރާއަށް އަންހެނުން ނުކުންނަން ފަސްޖޭހޭނޭ ކަމެއް ކަމަށެވެ. އަދި މިހާރު ތިބި އަންހެން ނޫސްވެރިންނަށް ވެސް ދާއިރާގައި ކުރިއަށް ދިޔުމަށް އެއީ އެޅޭ ވަރަށް ބޮޑު ހުރަހެއް ކަމަށް އެމްޖޭއޭއިން ބުންޏެވެ.
އެފަދަ ކަންކަން އެއްވެސް ފަރާތަކުން ނުކުރުމަށް އެ ޖަމިއްޔާއިންވަނީ އިލްތިމާސްކޮށްފައެވެ. ފުލުހުން ވެސް އެފަދަ މައްސަލަތައް ސީރިއަސް މައްސަލަތަކުގެ ގޮތުގައި ބަލައި އެކަންކަން ހުއްޓުވަން އެކަށީގެންވާ ފިޔަވަޅު އެޅުމަށް އެ ޖަމިއްޔާއިން ގޮވާލިއެވެ.
ރިޕޯޓާސް ވިތައުޓް ބޯޑާސްއިން ކޮންމެ އަހަރަކު ނެރޭ "ވޯލްޑް ޕްރެސް ފްރީޑަމް އިންޑެކްސް"އިން ދައްކާ ގޮތުގައި ރާއްޖޭގައި ނޫސްވެރިކަމުގެ މިނިވަންކަން ދަނީ ދަށްވަމުންނެވެ. އެގޮތުން، މިދިޔަ އަހަރުގެ ރިޕޯޓުގައިވާ ގޮތުން، ނޫސްވެރިކަމުގެ މިނިވަންކަމުގައި ރާއްޖެ ވަނީ ހަ ދަރަޖަ ފަހަތަށް ޖެހިފައެވެ. އެއީ، 2023ގައި 100 ވަނައިގައި އޮތުމަށް ފަހު މިދިޔަ އަހަރު ރާއްޖެ ވަނީ 106 ވަނައަށް ދަށްވެފައެވެ.
އެ ރިޕޯޓުގައިވަނީ، ނޫސްވެރިންނަށް ދޭ ހަމަލާތަކަށް ރާއްޖޭގައި އަދަބު ނުދޭއިރު، އަންހެން ނޫސްވެރިންނަށް ޖިންސީ ފުރައްސާރަ ކުރުމުގެ މައްސަލަތައް ފެންމަތިވަމުން އަންނަކަން ފާހަގަކޮށްފައެވެ.