ވެރިކަން ކުރާ މައި ޕާޓީ ޕީއެންސީން ސައްހަ ނޫން ފޯމުތަކެއް ހުށަހެޅި މައްސަލަ ބޮޑުވެފައި ވަނިކޮށް، އިލެކްޝަންސް ކޮމިޝަން (އީސީ)އިން މިއަދު އާއްމުކުރި ސިޔާސީ ޕާޓީތަކުގެ ދަފުތަރާ މެދު ޝަކުވާ ހުށަހެޅުމަށް ހުޅުވާލައިފިއެވެ.
އީސީން ވަނީ ސިޔާސީ ޕާޓީތަކުގެ ދަފުތަރު މިދިޔަ ޑިސެންބަރު 31ގެ ނިޔަލަށް އަދާހަމަކޮށްފައެވެ.
އީސީން ކުރި އިއުލާނުގައި ވަނީ އަންނަ މަހުގެ 10ގެ ކުރިން ސިޔާސީ ޕާޓީތަކުގެ ދަފުތަރާ ގުޅިގެން ޝަކުވާތައް ހުށަހެޅުމަށް ހުޅުވާލާފައި ވާކަމަށެވެ. އެގޮތުން އީސީގެ ޕޯޓަލް މެދުވެރިކޮށް ޝަކުވާތައް ހުށަހެޅޭނެ ކަމަށް އެ ކޮމިޝަނުން ބުންޏެވެ.
ސިޔާސީ ޕާޓީތަކަށް ވަގަށް މީހުން ވައްދާ މައްސަލަ މި ފަހުން ފެންމަތިވިއިރު، އެއީ ޕާޓީތަކަށް ލިބޭ ފައިސާގެ އަދަދު އިތުރުކުރުމަށް ކުރާ ކަމެއް ކަމަށް ވަނީ ތުހުމަތުކޮށްފައެވެ. އެ މައްސަލައިގައި ސަރުކާރު ހިންގާ ޕީއެންސީއަށް ތުހުމަތުކުރެވޭއިރު، އެހެން ބައެއް ޕާޓީތަކުންނާއި ބައެއް ޖަމިއްޔާތަކުން ވެސް ވަނީ އެކަން ކުށްވެރިކޮށް، ފިޔަވަޅު އެޅުމަށް ސަރުކާރަށް ގޮވައިލައިފައެވެ.
ޕީއެންސީން ގިނަ އަދަދެއްގެ 'ވަގު ފޯމު' ފުރިކަމަށް ތުހުމަތުކޮށް، އިދިކޮޅު ފަރާތްތަކުން ވަނީ އެ މައްސަލަ ތަހުގީގު ކޮށްދޭން އެދި ފުލުހަށް ވެސް ހުށަހަޅާފައެވެ.
އެ މައްސަލަ ބޮޑުވެފައި އޮއްވައި އައިޑީކާޑުތަކާއި ރައްޔިތުންގެ ލިޔެކިޔުން ބަލަހައްޓާ ޑީއެންއާރުގެ އޮފީސް އިމާރާތް ތެރޭގައި ޕީއެންސީއަށް ފޯމުފުރި މައްސަލައެއް ވެސް ފެންމަތިވިއެވެ. އެކަންކުރާ ފޮޓޯތަކެއް ވެސް ވަނީ މީސްމީޑިއާގައި ލީކުވެފައެވެ.
ޕީއެންސީން ވެސް ވަނީ ބައެއް ސައްހަކަން ކަށަވަރުނުކުރެވޭ ފޯމުތަކެއް އީސީއަށް ހުށަހެޅި ކަމަށް އިއުތިރާފުވެފައެވެ. އެކަމަކު، އެއީ ގަސްތުގައި ކުރި ކަމެއް ނޫން ކަމަށާއި އެއީ ފޯމުގެ ސައްހަކަން ކަށަވަރުކުރެވޭނެ ގޮތެއް ނެތުމުން ހިނގި ކަމެއް ކަމަށް ޕީއެންސީން ވަނީ ބުނެފައެވެ.
އެ މައްސަލައިގައި އިދިކޮޅު އެމްޑީޕީން ވަނީ ޕީއެންސީން މި ފަހުން ހުށަހެޅި ހުރިހާ ފޯމެއް ބާތިލުކުރަން ވެސް އީސީއަށް ގޮވާލައިފައެވެ. އީސީން ވަނީ އެ މައްސަލަ ބޮޑުވެ، އީ-ފާސް މެދުވެރިކޮށް އެކަނި ޕާޓީތަކަށް މީހުންނަށް ވަދެވޭ ގޮތަށް އުސޫލު ބަދަލުކުރަން ނިންމައިފައެވެ.
އެ މައްސަލަތައް އެގޮތަށް އޮއްވައި މިއަދު އާއްމުކުރި ސިޔާސީ ޕާޓީތަކުގެ ދަފުތަރުން އެނގޭ ގޮތުގައި ޕީއެންސީން 68،000 އަށްވުރެ ގިނަ މެންބަރުން ހަމަކޮށް، ރާއްޖޭގައި މިހާރު އޮތް އެންމެ ބޮޑު ސިޔާސީ ޕާޓީއަށް ވަނީ ވެފައެވެ. މިދިޔަ ސެޕްޓެންބަރުގައި ވެސް އީސީން ސިޔާސީ ޕާޓީތަކުގެ ދަފުތަރު އަދާހަމަކޮށްފައިވެއެވެ.
އޭރު ޕީއެންސީގައި ތިބީ 28،000 އެއްހައި މެންބަރުންނެވެ. އެހެންކަމުން ކުޑަ ދުވަސްކޮޅެއްގެ ތެރޭގައި އެ ޕާޓީއަށް އެވަނީ ގާތްގަނޑަކަށް 40،000 މެންބަރުން އިތުރުކޮށްފައެވެ.