ރައްޔިތުންގެ މަޖިލީހުގައި އެމްޑީޕީގެ ފަރާތުން ވައިކަރަދޫ ދާއިރާ ތަމްސީލުކުރައްވައި މެންބަރު ހުސައިން ޒިޔާދު (ފިއްޓޭ)އަށް ނޭނގި ވެރިކަން ކުރާ ޕާޓީ ޕީއެންސީއަށް އޭނާ ވައްދައިފައިވާ މައްސަލަ ކުށްވެރިކޮށް، އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގުކުރަން އެމްޑީޕީން ގޮވާލައިފިއެވެ.
މިއަދު "ސަން"އާ ވާހަކަދައްކަވަމުން ޒިޔާދު ވިދާޅުވީ އޭނާ ޕީއެންސީއަށް ވެއްދިކަމަށް ފެންނަން އޮތް ތާރީޚަކީ މިދިޔަ މަހުގެ 23ވަނަ ދުވަސް ކަމަށެވެ. އެކަން ކުރީ އޭނާއަށް އެއްވެސް މިންވަރަކަށް އެނގިގެން ނޫން ކަމަށާއި، އެ ކަން އެނގުނީ ވެސް އެހެން މީހެއްގެ ފަރާތުން، މިއަދު ކަމަށް އޭނާ ވިދާޅުވިއެވެ.
އެކަމާ ގުޅިގެން އެމްޑީޕީން ނެރުނު ބަޔާނުގައި ބުނީ މެމްބަރު ޒިޔާދުގެ ނަންމަތީގައި ވަގު ފޯމެއް ފުރައި ޕީއެންސީއަށް ވެއްދުން އެންމެ ހަރުކަށި އިބާރާތުން ކުށްވެރިކޮށް އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށް ކަމާ ގުޅުންހުރި އިދާރާތަކަށް އެ ޕާޓީން ގޮވައިލާ ކަމަށެވެ.
އަދި ޕީއެންސީއަށް ވަނުމަށް ފޯމު ފުރާފައި ނުވާ އެ ޕާޓީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފުތަރުން އުނިކޮށް ޕީއެންސީގައި ހިމަނާފައިވާތީ އެ މައްސަލަ އިލެކްޝަންސް ކޮމިޝަން (އީސީ)ގެ ސަމާލުކަމަށް އެކި ފަހަރު މަތިން ގެނެސްފައި ވާނެ ކަމަށް ވެސް އެ ޕާޓީން ބުންޏެވެ.
ގާނޫނުއަސާސީއަށް މިފަހުން ގެނައި ބަދަލާއެކު ވަގު ފޯމެއް ހުށަހަޅައިގެން މަޖިލިސް މެމްބަރެއްގެ ޕާޓީ ބަދަލުކޮށްފިނަމަ އެ މެމްބަރެއްގެ ގޮނޑި ގެއްލުމުގެ ފުރުސަތު އޮތްކަމުގެ ކަންބޮޑުވުން އީސީއާއެކު ބޭއްވި ބައްދަލުވުމުގައި ވެސް ފާހަގަކޮށްފައި ވާނެކަމަށް އެމްޑީޕީން ބުންޏެވެ.
ހަމައެއާއެކު ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތަށް ޕީއެންސީއަށް އެއް ލައްކަ މެމްބަރުން ހަމަކުރަން ކަމަށް ބުނެ މީހުންގެ ސޮއި ފޯޖުކޮށްގެން ހުށަހަޅަމުންދާ ފޯމުތައް ޕްރޮސެސް ކުރުން ހުއްޓާލުމަށް ވެސް އެ ޕާޓީން އީސީގައި އެދިފައިވާނެކަމަށް އެ ބަޔާނުގައި ވެއެވެ.
އެ ހުރިހާ ކަންބޮޑުވުންތަކެއް ހިއްސާކޮށްފައި ވަނިކޮށް މަޖިލިސް މެމްބަރެއްގެ ނަމުގައި ހުށަހެޅި ވަގު ފޯމެއް އީސީގެ ތެރެއިން އެޕްރޫވް ވުމަކީ ބަލައިގަނެވޭނެ ކަމެއް ނޫން ކަމަށާއި އެ މައްސަލައިގައި މެމްބަރު ޒިޔާދުގެ ނަމުގައި ހުށަހެޅި ވަގު ފޯމުގެ ކޮޕީއެއް ހޯދުމަށް މިއަދު މެންދުރު 14:00ގައި އެ ޕާޓީން އީސީއަށް ދިޔުމަށް ނިންމާފައިވާ ކަމަށް ވެސް އެމްޑީޕީން ބުންޏެވެ.
ޑިޕާޓްމަންޓު އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ޑޭޓާބޭސްއިން ވެރިކަން ކުރާ ޕާޓީން ކުރަމުންދާ ވައްކަންތައް ހުއްޓުވައި ދައުލަތުގެ އިދާރާތަކަށް ނުފޫޒު ފޯރުވައި ޕާޓީއަށް މެމްބަރުން އިތުރުކުރުމަށް ކުރަމުންދާ މަސައްކަތްތައް ތަހުގީގުކޮށް ފިޔަވަޅު އެޅުމަށް ކަމާ ގުޅުންހުރި އިދާރާތަކަށް އެމްޑީޕީން ގޮވާލަން، އެމްޑީޕީގެ ބަޔާން
މީގެ އިތުރުން ހަމަ އެ ތާރީޚުގައި ވައިކަރަދޫގެ ގިނަ ބަޔަކު ވެސް ޕީއެންސީއަށް ވައްދައިފައި އޮތްކަމަށް ފެންނަން އެބައޮތް ކަމަށާއި، އެއިން ގިނަ މީހުންނަކީ ވެސް އެމްޑީޕީގެ މަސައްކަތްތަކުގައި ވަރަށް ހަރަކާތްތެރި މީހުން ކަމަށް ފިއްޓޭ ވިދާޅުވިއެވެ.
ޒިޔާދު ވިދާޅުވި ގޮތުގައި އޭނާގެ އިތުރުން މިދިޔަ މަހުގެ 23ވަނަ ދުވަހު ވައިކަރަދޫގެ ގިނަ ބަޔަކު ވެސް ޕީއެންސީއަށް ވައްދައިފައި އޮތްކަމަށް ފެންނަން އެބައޮތެވެ. އޭގެތެރެއިން ގިނަ މީހުންނަކީ ވެސް އެމްޑީޕީގެ މަސައްކަތްތަކުގައި ވަރަށް ހަރަކާތްތެރި މީހުން ކަމަށް އޭނާ ވިދާޅުވިއެވެ.
ޒިޔާދު ޕީއެންސީއަށް ވައްދާފައިވާއިރު، ެމމްބަރުން މަޖިލީހުގައި ތަމްސީލުކުރާ ޕާޓީ ބަދަލުކުރުމުން، މެމްބަރުކަމުން އިސްތިއުފާދޭން ޖެހޭ ގޮތަށް އެންޓި ޑިފެކްޝަން ގާނޫނު ވަނީ މިދިޔަ އޭޕްރިލް މަހުގެ އެކެއްގައި ފާސް ވެސް ކޮށްފައެވެ. ރައީސް ޑރ. މުޙައްމަދު މުއިއްޒު އެ ބިލް ތަސްދީގު ކުރެއްވީ އޭޕްރިލް 16ގައެވެ.
އޭގެ ފަހުން މި ސަރުކާރުން ވަނީ ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީ އިސްލާހުކޮށްފައެވެ.
އެ އިސްލާހުގައި ވަނީ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭނެ ކަމަށެވެ.