އެމްޑީޕީގެ ފަރާތުން ވައިކަރަދޫ ދާއިރާއަށް ދެވަނަ ދައުރަކަށް ވާދަކުރައްވައި، ހޮވިވަޑައިގެންނެވި މެންބަރު ހުސައިން ޒިޔާދު (ފިއްޓޭ) ވެސް އޭނާއަށް ނޭނގި ވެރިކަން ކުރާ ޕީއެންސީއަށް ވައްދައިފައިވާ ކަމަށް އޭނާ މިއަދު ވިދާޅުވެއްޖެއެވެ.
ގިނަ ބަޔަކު، އެ މީހުންނަށް ނޭނގި ޕީއެންސީއަށް ވައްދައިފައިވާކަމުގެ އަޑުތައް ގަދަވެފައިވަނިކޮށް، މިއަދު "ސަން"އާ ވާހަކަދައްކަވަމުން ފިއްޓޭ ވިދާޅުވީ އޭނާ ޕީއެންސީއަށް ވެއްދިކަމަށް ފެންނަން އޮތް ތާރީޚަކީ މިދިޔަ މަހުގެ 23ވަނަ ދުވަސް ކަމަށެވެ.
އެ ކަން ކުރީ އޭނާއަށް އެއްވެސް މިންވަރަކަށް އެނގިގެން ނޫން ކަމަށާއި، އެ ކަން އެނގުނީ ވެސް އެހެން މީހެއްގެ ފަރާތުން މިއަދު ކަމަށް އޭނާ ވިދާޅުވިއެވެ.
މީގެ އިތުރުން ހަމަ އެ ތާރީޚުގައި ވައިކަރަދޫގެ ގިނަ ބަޔަކު ވެސް ޕީއެންސީއަށް ވައްދައިފައި އޮތްކަމަށް ފެންނަން އެބައޮތް ކަމަށާއި، އެއިން ގިނަ މީހުންނަކީ ވެސް އެމްޑީޕީގެ މަސައްކަތްތަކުގައި ވަރަށް ހަރަކާތްތެރި މީހުން ކަމަށް ފިއްޓޭ ވިދާޅުވިއެވެ.
"ވައިކަރަދޫ ވަރަށް ގިނަ މީހުން އެއްފަހަރާ ވައްދައިފައި މި އޮތީ. ދެން އެ އެންމެންގެ އެއްޗެހި [މައުލޫމާތު] މިހާރު ހޯދަން މި އުޅެނީ، ގާތްގަނޑަކަށް މިއޮތީ އޭރު [ރިޔާސީ އިންތިޚާބުގައި] އެމްޑީޕީ ކެމްޕޭނުގައި އުޅުނު އެންމެން އެއްކޮށް ބަދަލުކޮށްފައި،" ފިއްޓޭ ވިދާޅުވިއެވެ.
މެމްބަރަކު، އެ މެމްބަރަކު މަޖިލީހަށް ހޮވޭ ޕާޓީ ބަދަލުކުރުމުން، މެމްބަރުކަމުން އިސްތިއުފާދޭން ޖެހޭ ގޮތަށް ފާސްކުރީ މިދިޔަ 19 ވަނަ މަޖިލީހުގެ ފަހުކޮޅު، މިދިޔަ އޭޕްރިލް މަހުގެ އެކެއްގައެވެ. އަދި ރައީސް ޑރ. މުޙައްމަދު މުއިއްޒު ބިލް ތަސްދީގު ކުރެއްވީ އޭޕްރިލް 16ގައެވެ.
އެ ގާނޫނުގައިވާގޮތުން މައިގަނޑު ތިން ހާލަތެއްގައި މެންބަރުން މަގާމުން އިސްތިއުފާދޭން ޖެހޭނެއެވެ. އެއީ،
- އިންތިޚާބުވި ޕާޓީން އަމިއްލައަށް ވަކިވުން
- އިންތިޚާބުވި ޕާޓީ ނޫން އެހެން ޕާޓީއެއްގެ ދަފުތަރުގައި ޖެހުން [ޕާޓީ ބަދަލުކުރުން]
- އަމިއްލަގޮތުން އިންތިޚާބުވާ މެންބަރަކު ޕާޓީއަކަށް ސޮއިކުރުން
އޭގެ ފަހުން މި ސަރުކާރުން ވަނީ ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީ އިސްލާހުކޮށްފައެވެ.
އެ އިސްލާހުގައި ވަނީ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭނެ ކަމަށެވެ.
ފިއްޓޭ ވިދާޅުވީ މި ގޮތަށް ކަންކަން ހިނގާނަމަ ބައެއް މެންބަރުންގެ ގޮނޑިގެއްލުމާއި އެ ނޫން ވެސް ކަންކަން ހިނގާ މަންޒަރު ދެން ފެންނާނެ ކަމަށެވެ.
"މެމްބަރަކަށް މިހެން ވީމާ ދެން ކޮބާ އާދައިގެ މީހަކަށް ވާނެ ގޮތަކީ،" އޭނާ ސުވާލު އުފެއްދެވިއެވެ.
މި މައްސަލަ އިލެކްޝަންސް ކޮމިޝަނަށް ހުށަހަޅަން ނިންމައިފައިވާ ކަމަށް ވެސް އޭނާ ވަނީ ވިދާޅުވެފައެވެ.
އިދިކޮޅު އެމްޑީޕީން މީގެ ކުރިން ވެސް ވަނީ ޕީއެންސީއަށް އެ ޕާޓީގެ މެންބަރުން "ވަަގަށް" ވައްދާކަމަށް ތުހުމަތުކޮށް މައްސަލަ ޖައްސައިފައެވެ. ނަމަވެސް ޕީއެންސީން އެ ކަން ދޮގުކުރެއެވެ.