ރާއްޖޭގެ އެންމެ ބޮޑު އިދިކޮޅު ސިޔާސީ ޕާޓީ، އެމްޑީޕީން ގައުމުގެ ފަތުރުވެރިކަމަށް ގެއްލުންދޭން އުޅޭކަމަށް ގަބޫލުނުކުރާކަމަށް ސަރުކާރު ހިންގާ މައި ޕާޓީ ޕީއެންސީން ބުނެފިއެވެ.
ޕީއެންސީން މިފަދައިން ބުނީ އެ ޕާޓީގެ ޖަގަހަ ޖަލްސާއެއްގައި، ޓޫރިޒަމް މިނިސްޓްރީގެ ސްޓޭޓް މިނިސްޓަރު މުޙައްމަދު ނިހާދު ދެއްކެވި ވާހަކަފުޅުތަކާ ގުޅިގެންނެވެ.
ނިހާދުގެ ވާހަކައިގައި ރޭ ވަނީ ފަތުރުވެރިން ރާއްޖެ އައުމަށް ބިރުވެރިކަން އުފެދޭ ފަދަ މާހައުލެއް އުފެއްދުމަށް އިދިކޮޅު އެމްޑީޕީގެ ވެރިން ކަންތައްތަކެއް ކުރަން އުޅޭ ކަމަށް ތުހުމަތުތަކެއް ކުރައްވައިފައެވެ. އެ ތުހުމަތުތައް އޭނާ ގުޅުވައިލީ އެއީ އިދިކޮޅުން ރާވައިގެން ސަރުކާރުން ދެ މިލިއަން ފަތުރުވެރިން ގެނައުމަށް ކަނޑައެޅި އަމާޒަށް ހުރަސް އަޅަން ކުރާ ކަމެއްގެ ގޮތުގައެވެ.
މި ވާހަކަތަކާ ގުޅިގެން މިއަދު ނިހާދު ވަނީ ސަސްޕެންޑު ކޮށްފައެވެ.
ޕީއެންސީން މިއަދު ނެރުނު ބަޔާނެއްގައި ވަނީ، ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓިއަކުން އަދި މަދަނީ ޖަމިއްޔާއަކުން ރާއްޖޭގެ ފަތުރުވެރިކަމަށް އަދި ޖުމްލަ ގޮތެއްގައި އިގުތިސާދަށް ފޫނުބެއްދޭ ވަރުގެ ނުރައްކާތެރި ގެއްލުމެއް ލިބިދާނެ އަމަލެއް ނުހިންގާނެ ކަމަށެވެ. އަދި ޕާޓީތަކާއި މަދަނީ ޖަމިއްޔާތަށް ހަރަކާތްތެރިވާނީ ގާނޫނީ އިމުގެ ތެރެއިން ކަމަށާއި އެ އިމުން ބޭރުވާނަމަ އެކަމާމެދު އަޅަންޖެހޭ ފިޔަވަޅުތައް ދައުލަތުގެ ކަމާބެހޭ އިދާރާތަކުން އަޅާނެ ކަމަށް ވެސް އެ ބަޔާނުގައި ވެއެވެ.
އެ ބަޔާނުގައި ވަނީ ރާއްޖެއަކީ ފަތުރުވެރިންނަށް ރައްކާތެރި މަންޒިލެއްގެ ގޮތުގައި ދެމެހެއްޓުމަށް ސަރުކާރުން އަބަދުވެސް މަސައްކަތް ކުރަމުން ދާކަމަށެވެ.
"ހަމަ އެހެންމެ ފަތުރުވެރިކަމުގެ ސިނާއަތުގައި އިންވެސްޓުކޮށްފައިވާ ފަރާތްތަކުގެ އިންވެސްޓްމަންޓުތައް ރައްކާތެރި ކޮށްދިނުމުގައި ދިވެހި ދައުލަތުން އަދާކުރަންޖެހޭ ޒިންމާ އެންމެ ފުރިހަމައަށް އަދާކުރާނެ ކަމުގެ އިތުބާރު އެބައޮތެވެ،" އެ ބަޔާނުގައި ވެއެވެ.
ފަތުރުވެރިންނާއި އިންވެސްޓަރުންނަށް ވެސް ރައްކާތެރިކަން އޮތް ސުލްހަވެރި އަމާން މަންޒިލަކަށް ރާއްޖެ ހަދަން މުއައްސަސާތައް ގުޅިގެން ކުރާ މަސައްކަތަށް ވެސް ޕީއެންސީން ވަނީ ޝުކުރު އަދާކޮށްފައެވެ.
މީގެ ކުރިން ވެސް ސަރުކާރުގެ އިސްވެރިންތަކެއް ސޯޝަލް މީޑިއާގައި ދެއްކެވި ވާހަކަތަކަކާ ގުޅިގެން ފަތުރުވެރިކަމަށް ވަރަށް ބޮޑު ހީނަރުކަމެއް އައިސްފައިވެއެވެ.
ނިހާދަކީ އިދިކޮޅު އެމްޑީޕީގެ ޓިކެޓްގައި އައްޑޫ ސިޓީ ފޭދޫ ދާއިރާގެ މެންބަރުކަން މިދިޔަ މަޖީލީހުގައި ކުރެއްވި ބޭފުޅެކެވެ. އޭނާ ޕާޓީ ބަދަލު ކުރައްވައި ޕީއެންސީއާ ގުޅިވަޑައިގަތީ އެމްޑީޕީއަށް ރިޔާސީ އިންތިޚާބު ނާކާމިޔާބުވި ފަހުންނެވެ.