ނިމިދިޔަ އެމްޑީޕީގެ ސަރުކާރުގައި ފެށި ބިންވެރިޔާ ސްކީމުން ކުރިން ވެސް ނުހައްގުން ގޯތި ބަހައިފައިވާ ކަމަށާއި، އެ ސްކީމާ ގުޅޭ ގޮތުން މިހާރު ފެންމަތިވެފައިވާ މައްސަލައަކީ އެ ބޭއިންސާފަށް އިތުރުވި ބޮޅެއް ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެެވެ.
ބިންވެރިޔާ ސްކީމުން ޝަރުތު ހަމަނުވާ ބަޔަކަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) މެދުވެރިވެގެން ގޯތިތަކެއް ހަވާލުކޮށްފައިވާ ކަމުގެ ތުހުމަތުވެ، އެ މައްސަލައިގެ ޖިނާއީ ތަހުގީގެއް ފުލުހުން އަންނަނީ ކުރަމުންނެވެ.
ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، އެ މައްސަލައިގައި ވިދާޅުވެވެން އޮތީ މީގެ ކުރިން ވެސް އެ މަނިކުފާނު ފާހަގަކުރައްވައިފައިވާ މައްސަލައެއް ކަމަށެވެ. އެއީ ކުރިން ވެސް ލިސްޓު ހަދައިފައި ވަނީ ބޭއިންސާފުން އެތައް ބަޔަކަށް ގޯތި ލިބޭ ގޮތަށް ކަމަށެވެ.
"އެހެން ނަމަވެސް މިފަހަރު މިވަނީ މި މައްސަލަ ތަހުގީގު ކުރަން ފަށައި އަދި އެޗްޑީސީގެ ވެރިން ބަދަލުކޮށްފައި. އަޅުގަނޑު އުއްމީދުކުރަނީ ފުލުހުން ރަނގަޅު ތަހުގީގެއް ހިންގާނެ ކަމަށް އަދި މައުރޫފް ޖަމީލް އެންމެ ކަންކަން އިސްލާހު ކުރައްވާނެ ކަމަށް،" ނަޝީދު ވިދާޅުވިއެވެ.
މިދިޔަ ހަފުތާގައި އެޗްޑީސީއަށް ތުހުމަތުތައް އަމާޒުވީއިރު މެނޭޖިން ޑިރެކްޓަރުގެ މަގާމުގައި ހުންނެވި އިބްރާހީމް ފަޒުލް ރަޝީދުގެ ބޭބެ، އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދަށް ވެސް ޝަރުތު ހަމަނުވަނީސް ގޯތި ދީފައިވާ ކަމަށް ދޭހަވާ ލިޔެކިޔުން ސޯޝަލް މީޑިއާގައި އާންމުވެފައިވެއެވެ.
އެ މައްސަލަ ތަހުގީގު ކުރަން ފެށުމުން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ވަނީ ފަޒުލްއާއެކު އެޗްޑީސީގެ ބޯޑުގެ ގިނަ މެންބަރުން ސަސްޕެންޑުކޮށްފައެވެ. އޭގެ ފަހުން ފަޒުލް ވަނީ ތުހުމަތުތަކަށް އިންކާރުކުރައްވައި، މަގާމުން އިސްތިއުފާ ދެއްވައިފައެވެ.
އެޗްޑީސީގެ އާ އެމްޑީއަކަށް، ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގެ އިންފްރާސްޓްރަކްޗާ މިނިސްޓަރުކަން ކުރެއްވި މުޙައްމަދު މައުރޫފް ޖަމީލު އައްޔަންކޮށްފައެވެ.
ބިންވެރިޔާ ސްކީމާއި ފުލެޓު ދިނުމަށް ކުރިއަށްގެންދިޔަ ގެދޮރުވެރިޔާ ސްކީމަކީ ކުރީގެ ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި ފެށި ބޯހިޔާވަހިކަމުގެ ސްކީމްތައް ކަމަށްވާއިރު، އެ ސަރުކާރު ގެނައުމުގައި ނަޝީދު އިސް ދައުރެއް އަދާކުރެއްވިއެވެ. ނަމަވެސް އެ ވެރިކަމުގެ ވަކި ހިސާބަކުން ނަޝީދާއި ޞާލިޙްގެ ގުޅުން ގޯސްވެ، ރިޔާސީ ޕްރައިމަރީ ބޭއްވި ހިސާބުން އެމްޑީޕީ ދެބައިވިއެވެ.
އޭގެ ފަހުން ނަޝީދު ފާޅުގައި ސަރުކާރާ ދެކޮޅަށް ނުކުމެވަޑައިގެން، ސަރުކާރަށް ކޮރަޕްޝަނުގެ ތުހުމަތުތައް ވެސް ކުރެއްވިއެވެ.