ޓޫރިޒަމް މިނިސްޓްރީގެ ސްޓޭޓް މިނިސްޓަރު މުޙައްމަދު ނިހާދު އެ މަގާމުން މިއަދު ސަސްޕެންޑުކޮށްފިއެވެ.
ނިހާދު ސަސްޕެންޑުކޮށްފައިވާކަން އިތުބާރުހުރި މަސްދަރަކުން "ސަން"އަށް ވަނީ ކަށަވަރުކޮށްދީފައެެވެ.
މައުލޫމާތު ލިބޭ ގޮތުގައި ނިހާދު ސަސްޕެންޑުކުރީ ވެރިކަންކުރާ ޕީއެންސީން ރޭ ބޭއްވި ޖަގަހަ ޖަލްސާގައި ދެއްކެވި ވާހަކައަކާ ގުޅިގެންނެވެ.
އެގޮތުން އޭނާގެ ވާހަކައިގައި ރޭ ވަނީ ފަތުރުވެރިން ރާއްޖެ އައުމަށް ބިރުވެރިކަން އުފެދޭ ފަދަ މާހައުލެއް އުފެދެން މަގުފަހިވާނެހެން އިދިކޮޅު އެމްޑީޕީގެ ވެރިންނަށް ތުހުމަތުތަކެއް ކުރައްވައިފައެވެ. އެ ތުހުމަތުތައް އޭނާ ގުޅުވައިލީ އެއީ އިދިކޮޅުން ރާވައިގެން ސަރުކާރުން ދެ މިލިއަން ފަތުރުވެރިން ގެނައުމަށް ކަނޑައެޅި އަމާޒަށް ހުރަސް އަޅަން ކުރާ ކަމެއްގެ ގޮތުގައެވެ.
މީގެ ކުރިން ވެސް ސަރުކާރުގެ އިސްވެރިންތަކެއް ސޯޝަލް މީޑިއާގައި ދެއްކެވި ވާހަކަތަކަކާ ގުޅިގެން ފަތުރުވެރިކަމަށް ވަރަށް ބޮޑު ހީނަރުކަމެއް އައިސްފައިވެއެވެ.
އެގޮތުން މި ވެރިކަމުގެ ފުރަތަމަކޮޅު އިންޑިއާއަށާއި އެ ގައުމުގެ ބޮޑުވަޒީރު މޯދީއަށް ކުޑައިމީސްވާ ގޮތަށް ވާހަކަދެއްކުމުން ޔޫތުގެ ކުރީގެ ޑެޕިއުޓީ މިނިސްޓަރުން ކަމަށްވާ މަލްޝާ ޝަރީފާއި، މަރިޔަމް ޝިއުނާއާއި، އިތުރު ޑެޕިއުޓީ މިނިސްޓަރެއް ސަސްޕެންޑުކުރިއެވެ.
އެ ޓްވީޓުތައް ކުރީ އިންޑިއާއިން، އެ ގައުމުގެ ލަކްޝަދުވީޕްގެ ފަތުރުވެރިކަން ޕްރޮމޯޓުކުރަން ފެށުމާ އެކު، މީސްމީޑިއާގައި ބައެއް ދިވެހީންނާއި އިންޑިއާ މީހުން އަރައިރުންވަމުން އައި ދަނޑިވަޅެއްގައެވެ.
އެ މައްސަލައާ ގުޅިގެން ދެ ގައުމުގެ ސަރުކާރުގެ މެދުގައި ވެސް ވަރަށް ބޮޑަށް ގުޅުން ހީނަރުވިއެވެ. އަދި ރާއްޖެއަށް އަންނަ ފަތުރުވެރިންގެ އެންމެ ބޮޑު މާކެޓަކީ އިންޑިއާގެ ގޮތުގައި އޮއްވައި ރާއްޖެއަށް އިންޑިއާއިން ފަތުރުވެރިން ނުދިޔުމަށް ގޮވާލައި އެގައުމުގެ މަޝްހޫރު ޝަހުސިއްޔަތުތައް ބައިވެރިވެގެން ކެމްޕެއިނެއް ވެސް ކުރިއަށްގެންދިޔައެވެ. އޭގެ ފަހުން އިންޑިއާ ފަތުރުވެރިން މަދުވެފައިވާކަން ތަފާސްހިސާބުތަކުން ދައްކައެވެ.