ބޭންކުތަކަކީ ސަރުކާރުގެ މުވައްޒަފުން އައްޔަން ކުރާ ތަނެއް ނޫންކަމަށާއި އެތަނަކީ ވަރަށް ޒިންމާދާރު، ފަންނުވެރި މީހުން އައްޔަންކުރާ ތަނެއް ނަމަވެސް މިހާރު އެތަންތަނަށް ރައްޔިތުން ކުރާ އިތުބާރު ގެއްލިފައި ވާކަމަށް ކެލާ ދާޢިރާގެ ކުރީގެ މެމްބަރު އިބްރާހިމް ޝަރީފް (ކެލާ އިބުރޭ) މިރޭ ވިދާޅުވެއްޖެއެވެ.
އެސްއެސް ޓީވީގެ ބާރު ހަތަރެއް ޕްރޮގްރާމުގައި ވާހަކަ ދައްކަވަމުން ޝަރީފް ވިދާޅުވީ، ގައުމެއްނަމަ އެ ގައުމަކުން އިތުބާރު ކުރާނޭ މުއައްސަސާތަކެއް ހުންނަން ޖެހޭނެ ކަމަށެވެ.
ޝަރީފް ވިދާޅުވީ ސެންޓްރަލް ބޭންކް ނުވަތަ މޯލްޑިސް މަނިޓަރީ އޮތޯރިޓީ (އެމްއެމްއޭ)އަކީ ރައްޔިތުން އެންމެ އިތުބާރުކުރާ އެއް މުއައްސަސާ ކަމަށެވެ. ނަމަވެސް މިހާރު އެތަނުގެ ހާލު ވަރަށް ދެރަކަމަށް މައުލޫމާތު ލިބޭކަމަށް އޭނާ ވަނީ ވިދާޅުވެފައެވެ.
އެތަނަކީ ސިޔާސީ މަގާމުގަ ބަޔަކު ލާތަނެއް ނޫން އެތަނަކީ. އެތަނަކީ ވަރަށް ޒިންމާދާރު ވަރަށް ފަންނުވެރި ވަރަށް ކަމުގެ މާހިރުން އުޅޭ ސެންޓްރަލް ބޭންކަކީ. މިއަދު އެހެންތޯ އެވަނީ؟ މިއަދު މުޅި ހުސް އެތަނުގަ ސިޔާސީ މީހުން. އެމީހުންނަކަަށް ވެސް ނޭނގެ އެއްބަޔަކު އަނެއް ބަޔަކަށް ވާގޮތް. އެއް ޑިޕާޓްމެންޓަށް ވާގޮތް އަނެއް ޑިޕާޓްމެންޓަށް ނޭނގެ. ކެލާ ދާޢިރާގެ ކުރީގެ މެމްބަރު އިބްރާހިމް ޝަރީފް
ޝަރީފް ވިދާޅުވީ ކަންތައްތައް މިހިސާބައް ދިއުމުން ރައްޔިތުން މި ތަންތަނަށް ކުރާ އިތުބާރު ގެއްލިފައި ވާކަމަށެވެ.
ސަރުކާރުގެ ފަރާތުން ތަނަކަށް އައްޔަންކުރާ ވެރިން ބޭނުންވާ ގޮތަށް، ތަންތަނުގެ ކަންކަން ބައްޓަން ކުރުމުން މުޅިތަން އެއްކޮން ހަލާކުވެގެންދާކަން ޝަރީފް ވަނީ ފާހަގަކޮށްފައެވެ.
އެތާގަ މަސައްކަތް ކުރަންވާ ގޮތްވެސް އެތަނަށް އަންނަ ބޭފުޅަކު ކަނޑައަޅަން ޖެހެނީ، އެ މިނިސްްޓްރީއަކު ނުވަތަ އެ އިންސްޓިޓިއުޝަނަކަށް އަންނަ ބޭފުޅަކު. އެއީ މިނިވަން މުއައްސަސާއެއް ކަމުގަ ވިޔަސް، އެއީ ކޮމިޝަނެއް ކަމުގަވިޔަސް، އެއީ ޑިޕާޓްމެންޓެއް ކަމުގަ ވިޔަސް، މިނިސްޓްރީއެއް ކަމުގަ ވިޔަސް، އަދި އެސްއޯއީއެއް ކަމުގަ ވިޔަސް. މިހެންވުމުގެ ސަބަބުން ހަގީގަތުގަ މިތަންތަން މިދަނީ މުޅިން ހަލާކުވަމުން. ކެލާ ދާޢިރާގެ ކުރީގެ މެމްބަރު އިބްރާހިމް ޝަރީފް
ޝަރީފް ވިދާޅުވީ މިގޮތަށް ކަންތައްތައް ވުމުގެ ސަބަބުން މުވައްޒަފުން ކުރާ މަސައްކަތާއި ކުރަންޖެހޭ މަސައްކަތްތައް އޮޅި، ވެރީން ބޭނުންވާ ކަންތައްތައް އެބޭފުޅުންނަށް ލާބައާއި މަންފާ ލިބޭނެ ގޮތަށް، އެސްއޯއީތަކުން މަސައްކަތް ކުރަންޖެހޭ ކަމަށެވެ.
މިހާރު ދިމާވެގެން އުޅޭ އެންމެ ބޮޑު މައްސަލަތަކަކީ ހަގީގަތިގަ މި އިންސްޓިޓިއުޝަން އަޅުގަނޑު މި ދެންނެވި ތަންތަނަށް މާގިނައިން ސިޔާސީ ބޭފުޅުން ލެވިފަ ތިބީ. ކެލާ ދާއިރާގެ ކުރީގެ މެމްބަރު އިބްރާހިމް ޝަރީފް
ޝަރީފް ވިދާޅުވީ ދައުލަތުގެ ތަންތަނުގައި ސިޔާސީ ބޭފުޅުން ގިނަކަމަށާއި އެބޭފުޅުން ދެކޭ ގޮތުގައި ސިވިލްސާވިސް މުއައްޒަފުނަނަކީ އޭބޭފުޅުން ބުނާކަންކަން ކުރަން ތިބޭ ބައެއް ކަމަށެވެ. މިކަމުގެ ސަބަބުން ގައުމުގެ ހުރިހާ އިދާރާތައް ހަލާކުވެފައި ވާކަމަށް ވެސް އޭނާ ވަނީ ވިދާޅުވެފައެވެ.
ދައުލަތުގެ ތަންތަނަކީ އެތަންތަނަށް އަންނަ ވެރިން ބޭނުންފުޅުވާ ގޮތަކަށް ކަންތައްތައް ކޮށްދީ ކަންތައްތައް ފޮރުންވަން ނުވަތަ، ވެރީންގެ ލާބައާއި މަންފާއަށް ހުންނަ ތަންތަނަށް މުއައްސަސާތައް ވެގެން ގޮސްފައި ވާކަން އޭނާ ވަނީ ފާހަގަކޮށްފައެވެ. އަދި ވެރީން ބޭނުންވާ ފަދައިން ކަންކަން ނުވެއްޖެނަމަ އިންޒާރުދީ ވަޒީފާއިން ވެސް ވަކިކުރާތަން އަންނަކަން އޭނާ ފާހަގަކޮށްފައިވެއެވެ.
ގިނަފަހަރަށް ކަންތައްތައް ކޮށްފަ އާދައިގެ ބަހުން ބުނާނަމަ މުވައްޒަފުންގެ ބޮލަށް ކަނޑާލަނީ. އެކަމު އެ ގޮތަށް އެ މީހަކަށް ސަލާމަތް ވެވޭކަށްވެސް ނޯވޭ. އެމީހުން ދާނެ ތަނެއްވެސް ނޯވޭ ހަގީގަތުގަ ރާއްޖޭގަ. ކެލާ ދާޢިރާގެ ކުރީގެ މެމްބަރު އިބްރާހިމް ޝަރީފް
އޭނާ ވަނީ މުވައްޒަފުންނަށް ކަންތައްތަކާއި މުވައްޒަފުންގެ އަޑު އުފުލައި، އެމީހުންގެ ހައްގުތަކާއި ބެހޭގޮތުން މަސައްކަތް ކުރެވޭނެ އެއްވެސް ވަސީލަތްތަކެއް ނެތް ކަމަށްވެސް ވިދާޅުވެފައެވެ.
އެހެންކަމުން ލިބޭ މުސާރައާ ނުބައްދަލު ދިރިއުޅުން އުޅެމުންދާ މީހުންގެ ކަންކަން ލޯއެންފޯސްމެންޓުން ބަލަން ޖެހޭކަމަށް އޭނާ ވަނީ ވިދާޅުވެފައެވެ.