ގެއްލިގެން ހޯދަމުންދާ "ސީމެކްސް" ބޯޓުގެ ފަޅުވެރިޔާ ހޯދުމުގެ މަސައްކަތް ހުއްޓައިނުލާ ކަމަށާއި، ކުރިން ހުއްޓައިލިކަމަށް ބުނެވުނީ އޮޅިގެންކަމަށް އެމްއެންޑީއެފުން މިރޭ ބުނެފިއެވެ.
އެމްއެންޑީއެފުން ބުނީ، ފަޅުވެރިޔާ ހޯދުމުގެ މަސައްކަތް ހުއްޓައިލި ކަމަށް މައުލޫމާތު ދެވިފައިވަނީ ކުށަކުން ކަމަށާއި، އެ ކަމަށް މައާފަށް އެދޭ ކަމަށެވެ.
މައުލޫމާތު ލިބިިފައިވާ ގޮތުގައި މިދިޔަ ހޯމަ ދުވަހުގެ ރޭ އެ ބޯޓުން ގެއްލިފައި ވަނީ ނޭޕާލްގެ ރައްޔިތެއް ކަމަށްވާ ރާޖް ކުމާރެވެ.
އެމްއެންޑީއެފުން ބުނީ ސީމެކްސް ބޯޓުން ގެއްލުނު ފަޅުވެރިޔާ ހޯދުމަށްޓަކައި، އޮޔާއެކު އޭނާ ލައްގާނެކަމަށް ގަބޫލުކުރެވޭ ދިމާތަކުގައި މިއަދު ސާޗް އޮޕަރޭޝަން ކުރިޔަށް ގެންދިޔަ ކަމަށެވެ. އޭގެ އިތުރުން މި ސަރަހައްދުގައި ދަތުރުކުރާ އިންޓަނޭޝަނަލް އުޅަނދުފަހަރާ ވެސް ކޯޑިނޭޓް ކުރަމުންދާ ކަމަށް މައުލޫމާތު ދިނެވެ.
އެމްއެންޑީއެފުން ބުނި ގޮތުގައި، ފަޅުވެރިޔާ ހޯދުމުގެ މަސައްކަތުގައި މިމަހުގެ 17 އަދި 18 ވަނަ ދުވަހު 304 ނޯޓިކަލް މޭލުގެ ސަރަހައްދެއް ވަނީ ބަލައިފައެވެ. އަދި އިއްޔެ، ފުވައްމުލައް ވަށައިގެން ބަލައިފައިވާއިރު ވެސް، މިހާތަނަށް އެ މީހާއެއް ނުފެނެއެވެ.
މި ހާދިސާއާ ގުޅިގެން މީގެ ކުރިން ފުލުހުން ބުނެފައި ވަނީ، އޭނާ ބޯޓުގައި ނެތްކަން އެނގިފައި ވަނީ ފުވައްމުލައް ސިޓީއާ އަށް މޭލަށް ކައިރިވެފައި ވަނިކޮށް ކަމަށެވެ.
ފުލުހުން ބުނީ އެ ބޯޓު މިދިޔަ ހޯމަދުވަހުގެރޭ 11:30 ހާއިރު އައްޑޫ ސިޓީއިން ފުރިއިރު ރާޖް ކުމާރު ބޯޓުގައި ހުރި ކަމަށެވެ. އަދި އެރޭގެ 01:15 ހާއިރު ބޯޓުގެ ކެޕްޓަނާ އޭނާ ވާހަކަ ދެއްކިކަމަށް ވެސް ފުލުހުން ވަނީ ބުނެފައެވެ. މި މައްސަލަ ފުލުހުން ވެސް ދަނީ ތަހުގީގު ކުރަމުންނެވެ.
މި ދުވަސްވަރަކީ ރާއްޖޭގެ އެކި ހިސާބުތަކަށް، އަދި ވަކީން ޚާއްސަކޮށް ރާއްޖޭގެ ދެކުނަށް މޫސުން ގޯސް ދުވަސްވަރެކެވެ. އެ ގޮތުން ފުވައްމުލަކާއި އައްޑޫ ސިޓީ މި ވަގުތު ވެސް އޮތީ ޔެލޯ އެލާޓުގައެވެ. ކަމާބެހޭ ފަރާތްތަކުން ގެންދަނީ މޫސުމަށް ސަމާލުވުމަށް ވެސް އިލްތިމާސްކުރަމުންނެވެ.