ގެއްލިގެން ހޯދަމުންދާ "ސީމެކްސް" ދޯނީގެ ފަޅުވެރިޔާ ހޯދުމުގެ މަސައްކަތް މޯލްޑިވްސް ނެޝެނަލް ޑިފެންސް ފޯސް (އެމްއެންޑީއެފް)އިން މެދުކަނޑާލައިފިއެވެ.
މައުލޫމާތު ލިބިިފައިވާގޮތުގައި މިދިޔަ ހޯމަ ދުވަހުގެ ރޭ އެ ބޯޓުން ގެއްލިފައި ވަނީ ނޭޕާލްގެ ރައްޔިތެއް ކަމަށްވާ ރާޖް ކުމާރެވެ.
އެމްއެންޑީއެފްއިން މީޑިއާތަކާއި ހިއްސާކުރި މެސެޖެއްގައި މިއަދު ބުނީ އެ ހާދިސާއާ ގުޅިގެން ގެއްލުނު މީހާ ހޯދުން މިހާރު ވަނީ މެދުކަނޑާލާފައި ކަމަށެވެ.
އެމްއެންޑީއެފުން ބުނީ އޭނާ ހޯދުމަށް މިދިޔަ އަންގާރަ އަދި ބުދަ ދުވަހު 304 ނޯޓިކަލް މޭލުގެ ސަރަހައްދެއް ބަލާފައިވާ ކަމަށެވެ. އަދި އިއްޔެ ފުވައްމުލަކުގެ ވަށައިގެން ބަލައިފައިވާ ކަމަށް ވެސް އެމްއެންޑީއެފުން ބުންޏެވެ.
ކަނޑުމަގުން އޮޕަރޭޝަން ކުރިއަށް ގެންގޮސްފައިވާއިރު އަދިވެސް ގެއްލުނު މީހާ ފެނިފައިވާ ނުވާ ކަމަށް އެމްއެންޑީއެފުން ބުންޏެވެ.
މި ހާދިސާއާ ގުޅިގެން މީގެ ކުރިން ފުލުހުން ބުނެފައި ވަނީ، އޭނާ ބޯޓުގައި ނެތްކަން އެނގިފައި ވަނީ ފުވައްމުލައް ސިޓީއާ އަށް މޭލަށް ކައިރިވެފައި ވަނިކޮށް ކަމަށެވެ.
ފުލުހުން ބުނީ އެ ބޯޓް އެރޭގެ 11:30 ހާއިރު އައްޑޫ ސިޓީއިން ފުރިއިރު ރާޖް ކުމާރު ބޯޓްގައި ހުރި ކަމަށެވެ. އަދި އެރޭގެ 01:15 ހާއިރު ބޯޓްގެ ކެޕްޓަނާ އޭނާ ވާހަކަ ދެއްކިކަމަށް ވެސް ފުލުހުން ވަނީ ބުނެފައެވެ.
އެ މައްސަލަ ފުލުހުން ވެސް ދަނީ ތަހުގީގު ކުރަމުންނެވެ.
ފާހަގަކޮށްލެވޭ ގޮތުގައި މި ދުވަސްވަރަކީ ރާއްޖޭގެ އެކި ހިސާބުތަކަށް މޫސުން ގޯސް ދުވަސްވަރެކެވެ. އެހެންކަމުން ކަމާބެހޭ ފަރާތްތަކުން ގެންދަނީ މޫސުމަށް ސަމާލުވުމަށް ވެސް އިލްތިމާސްކުރަމުންނެވެ.