ވިލާގަނޑުގައި ކަނޑު ވަރަށް ގަދަވާނެ ކަމަށާއި ގަޑިއަކު 45 މޭލަށް ވައިގަދަވުން އެކަށީގެންވާ ކަމަށް މެޓް އޮފީހުން ބުނެފިއެވެ.
މެޓުން އޮތީ ރާއްޖޭގެ އެންމެ ދެކުނުން، ފުވައްމުލައް އަދި އައްޑޫ ސިޓީއަށް މިރޭ 19:00އިން 23:00އަށް ޔެލޯ އެލާޓު ވެސް ނެރެފައެވެ.
އެއީ ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހި، ކަނޑުތައް ވަރަށް ގަދަވާނެ ކަމަށް ލަފާކޮށްފައެވެ.
މެޓުން ބުނީ، އެކި ހިސާބަށް ވިއްސާރަ ކުރުމާއެކު، ގުގުރާނެ ކަމަށެވެ. އަދި ބައެއް ރަށްތަކަށް ބޯކޮށް ވާރޭވެހުން ވެސް އެކަށީގެންވާ ކަމަށެވެ. ހުޅަނގުދެކުނާއި ހުޅަނގުން ގަޑިއަކު 17 މޭލާ 27 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކޮށްފައިވާއިރު، 45 މޭލަށް ވައިގަދަވުން އެކަށީގެންވާ ކަމަށް މެޓުން ބުނެއެވެ.
ކަނޑު ގަދަކޮށް އޮތްއިރު، ވިލާގަނޑުގައި އަދި ވަކިން ގަދަވާނެ ކަމަށް ބުނެފައިވާއިރު، ރާޅުގެ އުސްމިން ހުންނާނެ ކަމަށް އަންދާޒާކޮށްފައިވަނީ ފަސް ފޫޓާ އަށް ފޫޓާ ދެމެދުގައެވެ.
މީގެ އިތުރުން ދިޔަވަރު ބޮޑުވާ ގަޑިތަކުގައި އުދައިގެ އަސަރު ކުރުން ވެސް އެކަށީގެންވާތީ، ހުރިހާ ފަރާތްތަކުން ވެސް މޫސުމަށް ސަމާލުވުމަށް އެ އިދާރާއިން އެދެއެވެ.
މި ހަފްތާ ބަންދުގައި ވަރަށް ކަނޑުގަދަވާނެ ކަމަށް މެޓުން އޮތީ ކުރިން ވެސް ބުނެފައެވެ.
ދެވަނަ ޓާމުގެ މިޑް ޓާމް ބްރޭކަށް ސްކޫލްތައް ބަންދުވެފައިވާއިރު، މި ދުވަސްވަރަކީ ކަނޑުމަގުންނާ ވައިގެ މަގުން ވެސް ރާއްޖޭގެ އެކި ސަރަހައްދުތަކުން ގިނަ ދަތުރުތަކެއް ކުރާ ދުވަސްވަރެކެވެ.
އާންމުކޮށް ރާއްޖެއަށް ބޮޑަށް ވިއްސާރަ ކުރަނީ ހުޅަނގު މޫސުމުގައެވެ. އިރުވައި މޫސުމުގައި ކޮންމެވެސް ވަރަކަށް ވިއްސާރަ ކުރިޔަސް މޫސުން ގިނަ ދުވަސްތަކުގައި އޮންނަނީ އާންމުކޮށް ރަނގަޅަށެވެ.
ހުޅަނގު މޫސުން ރާއްޖެއަށް ޢާންމުގޮތެއްގައި ލައިގަންނަނީ މޭމަހު މެދެއްހާތަނުން ފެށިގެން ނޮވެންބަރު މަހުގެ ނިޔަލަށެވެެ. އަދި އިރުވައި މޫސުން ޖެނުއަރީން ފެށިގެން މާޗުގެ ނިޔަލަށް ދެމިގެން ދެއެވެ. ޑިސެމްބަރު އަދި އޭޕްރީލް މަހަކީ އާންމުކޮށް ދެ މޫސުން ބަދަލުވާ ދުވަސްވަރެވެ.