މިދިޔަ ސަރުކާރުގެ ބިންވެރިޔާ ސްކީމުން ގޯއްޗަށް ޝަރުތު ހަމަނުވުމުން، އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު، އެ ސަރުކާރުގެ ހައުސިން މިނިސްޓްރީގެ ސްޓޭޓް، އަކްރަމް ކަމާލުއްދީނާ ބައްދަލު ކުރިކަމަށް ފުލުހުން ބުނި ވާހަކަ އަކްރަމް ދޮގު ކުރައްވައިފިއެވެ.
ވަގު ލިޔުން ހަދައިގެން ޝަރުތުހަމަނުވާ ބަޔަކަށް ގޯތިދިން މައްސަލައާ ގުޅިގެން ފުލުހުން ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވި ގޮތުގައި، ތަހުގީގަށް ސުވާލު ކުރެވުނު ފަރާތްތަކުން ބުނެފައިވަނީ ފޯޖުކުރި ލިޔުންތައް ދީފައި އޮތީ ކުރީ ސަރުކާރުން ކަމަށެވެ.
އެ ގޮތުން މި މައްސަލައިގައި ފުލުހުން ފަޒީލާ ސުވާލުކުރުމުން، އޭނާ ވެސް ބުނެފައި ވަނީ އެ ގޮތަށް ކަމަށް ޝަރީފް ވިދާޅުވިއެވެ. ޝަރީފް ވިދާޅުވި ގޮތުގައި، ގޯތި ނުލިބުމުން ފަޒީލް ވަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާ ވެސް ބައްދަލު ކޮށްފައެވެ.
މި ކަމާ ގުޅިގެން އަކްރަމް މިއަދު އެކްސްގައި ކުރެއްވި ޕޯސްޓެއްގައިވަނީ، ފަޒީލްއާ އެއްވެސް މުއާމަލާތެއް ކޮށްފައިނުވާނެ ކަމަށާއި، އަދި ދުވަހަކު ދިމާވެފައި ވެސް ނުވާ ކަމަށެވެ. އަދި އެއްވެސް ކަމެއްގައި އޭނާއާ ބައްދަލުކުރަން ފަޒީލް އެދިފައި ވެސް ނުވާ ކަމަށް އަކްރަމް ވިދާޅުވިއެވެ.
މިދިޔަ ސަރުކާރުގެ ހައުސިން މިނިސްޓްރީން ބިންވެރިޔާ އަދި ގެދޮރުވެރިޔާ ސްކީމްގެ ދަށުން އެއްވެސް ލިޔުމެއް އުސޫލުން ބޭރުން ނުވަތަ ގަވާއިދާ ހިލާފަށް ނުވަތަ ނުރަސްމީކޮށް އެއްވެސް ފަރާތަކަށް ދޫކޮށްފައި ނޯންނާނޭކަމުގެ ޔަގީންކަން އަކްރަމްވަނީ ދެއްވައިފައެވެ.
އޭނާ އަދާކުރެއްވި މަގާމުގެ ހައިސިއްޔަތުން ކުރެއްވި މަސައްކަތްތަކާ ގުޅޭ ގޮތުން ޖަވާބު ނުދެވޭނެ އެއްވެސް ކަމެއް ނޯންނާނެ ކަމަށް ވިދާޅުވިއެވެ.
"ސަރުކާރުގައި އަޅުގަނޑު އަދާކުރި މަގާމުގެ ހައިސިއްޔަތުން ކޮށްފައިވާ މަސައްކަތްތަކާ ގުޅޭގޮތުން އަޅުގަނޑަށް ޖަވާބުދާރީ ނުވެވޭނެ އެއްވެސް ކަމެއް ނޯންނާނެއެވެ. ނޫސްވެރިންގެ އެއްވެސް ސުވާލެއް އޮތްނަމަ ސުވާލުކުރުމަށް ފުރުސަތުދިނުމަށް ހޮނިހިރު ދުވަހު ނޫސްވެރިންނާ ބައްދަލުކުރުމަށް ގަސްތުކުރަމެވެ," އަކްރަމްގެ ޕޯސްޓުގައި ވެއެވެ.
އަކްރަމް ވިދާޅުވި ގޮތުގައި، ފޯޖުކުރި ލިޔުންތަކަކީ ކުރީ ސަރުކާރުން ދޫކުރި ލިޔުންތަކެއްގެ ގޮތުގައި އެ ވާހަކަ ދައްކާފައިވަނީ ރައްޔިތުންނަށް ހަގީގަތް އޮޅުވައިލުމަށެވެ.
ގޯތި ވައްކަމުގެ މައްސަލަ ސަމާލު ކަމަށް އައީ ފަޒީލް ރަޝީދުގެ ޝަރުތު ހަމަނުވި ނަމަވެސް، އޭނާއަށް ގޯތި ދީފައިވާ ލިޔެކިޔުމެއް ސޯޝަލް މީޑިއާއަށް ލީކުވުމާ ގުޅިގެންނެވެ.
ދޮގުލިޔެކިޔުމެއް އުފެއްދުމަކީ ގާނޫނީ ކުށެކެވެ. ގޯތި މައްސަލައިގައި ދޮގު ލިޔުންތަކެއް ހަދާފައިވާކަން ހައުސިން މިނިސްޓްރީގެ އިތުރުން އެޗްޑީސީއަށް ވެސް އެނގުނުތާ ފަސް މަސް ވެގެންދިޔައިރު، ފުލުހުންނަށް އެކަން އަންގާފައިނުވާ ކަމަށް ރޭ ފުލުހުން ބުންޏެވެ.
ދޮގު ލިޔުންތަކެއް ހަދައިގެން އުޅޭކަމުގެ މައުލޫމާތު އެނގިހުރެ، އެ ކަން ސިއްރު ކުރުމުން އެ އިދާރާތައް ކުށްވެރިވާނެތޯ ކުރެވުނު ސުވާލަށް ފުލުހުން ޖަވާބެއް ނުދެއެވެ. ފުލުހުން ބުނި ގޮތުގައި އެ މައްސަލަ ބަލަން ފެށީ، ސޯޝަލް މީޑިއާއިން ފުލުހުންގެ ސަމާލު ކަމަށް އައުމާއެކީގައެވެ.
މި މައްސަލަ އެންޓި ކޮރަޕްޝަން ކޮމިޝަން (އޭސީސީ)އާއި ގުޅިގެން ތަހުގީގު ކުރުމަށް ތައްޔާރުވަމުން އަންނައިރު، ފަޒުލް ހިމެނޭހެން އެޗްޑީސީގެ ބޯޑު މެންބަރުންތަކެއް ވަނީ ސަސްޕެންޑުކޮށްފައެވެ. އަދި އޭނާގެ ބޭބެ ފަޒީލް ވެސްވަނީ ސަސްޕެންޑު ކޮށްފައެވެ.