ބިންވެރިޔާ ސްކީމްގެ ދަށުން ވަގު ލިޔުންތަކެއް ތައްޔާރުކޮށްގެން ގޯތިތަކެއް ދިން މައްސަލައިގައި މިހާތަނަށް ސުވާލުކުރި ފަރާތްތަކުން ބުނީ، އެ ލިޔެކިޔުންތައް ދީފައި އޮތީ މިދިޔަ އެމްޑީޕީ ސަރުކާރުގައި ކަމަށް ފުލުހުން މިރޭ ބުނެފިއެވެ.
މި މައްސަލަ ސަމާލު ކަމަށް އައީ، ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ، އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދުގެ ޝަރުތު ހަމަނުވި ނަމަވެސް، އޭނާއަށް ގޯތި ދީފައިވާ ލިޔެކިޔުމެއް ސޯޝަލް މީޑިއާއަށް ލީކުވުމާ ގުޅިގެންނެވެ.
ބިންވެރިޔާ ސްކީމާ ގުޅޭ ފޯޖަރީގެ މައްސަލަ ސަމާލު ކަމަށް އައުމާ ގުޅިގެން ފުލުހުން ވަނީ އެ މައްސަލައިގެ ޖިނާއީ ތަހުގީގެއް ފަށަފައިފައެވެ.
މި މައްސަލައާ ގުޅޭ މައުލޫމާތު ދިނުމަށް ފުލުހުން މިރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވި ގޮތުގައި، ފުލުހުންގެ ތަހުގީގަށް ސުވާލުކޮށްފައިވާ ހުރިހާ ފަރާތަކުން ބުނެފައިވަނީ، ފޯޖުކޮށްފައިވާ ލިޔެކިޔުންތައް ދިނީ ކުރީ ސަރުކާރުން ކަމަށެވެ.
އެ ގޮތުން މި މައްސަލައިގައި ފަޒީލާ ސުވާލުކުރުމުން، އޭނާ ވެސް ބުނެފައި ވަނީއެފަދައިން ކަމަށް ޝަރީފް ވިދާޅުވިއެވެ. ޝަރީފް ވިދާޅުވި ގޮތުގައި، ގޯތި ނުލިބުމުން ފަޒީލް ވަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާ ވެސް ބައްދަލު ކޮށްފައެވެ.
ފުލުހުން މިރޭ ބުނި ގޮތުގައި މި މައްސަލައިގައި ހިމެނޭ ލިޔުންތަކުގެ ސައްހަކަން ކަށަވަރު ކުރުމާއި، މައްސަލައިގައި ސުވާލުކުރަންޖެހޭ ފަރާތްތަކާ ސުވާލު ކުރުމުގެ މަސައްކަތް ކުރިޔަށް އެބަދެއެވެ. ޝަރީފް ވިދާޅުވީ މިހާތަނަށް ބެލިބެލުމުން ފާހަަގަވެފައިވަނީ މި ފަދަ ތިން ގޯއްޗެއް ކަމަށެވެ. އަދި މައްސަލައިގައިބަޔަކު ގޯހެއް ހަދާފައިވާކަން އަދި ފާހަގަނުވާ ކަމަށް ވެސް އޭނާ ވަނީ ވިދާޅުވިއެވެ.
"އަޅުގަނޑު ނުބުނަން މި ޑޮކިއުމަންޓުތަކަކީ ސައްހަ އެއްޗެކޭ ވެސް. އެކަން ކަށަވަރު ކުރުމަށް އަޅުގަނޑުމެން މަސައްކަތް ކުރަމުން މި ދަނީ. މިއީ އޭރުގެ މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗާގެ ނަމުގައި ހަދާފައިވާ ޑޮކިއުމަންޓުތަކެއް" ޝަރީފް ވިދާޅުވިއެވެ.
ދޮގުލިޔެކިޔުމެއް އުފެއްދުމަކީ ގާނޫނީ ކުށެކެވެ. ގޯތި މައްސަލައިގައި ދޮގު ލިޔުންތަކެއް ހަދާފައިވާކަން ހައުސިން މިނިސްޓްރީގެ އިތުރުން އެޗްޑީސީއަށް ވެސް އެނގުނުތާ ފަސް މަސް ވެގެންދިޔައިރު، ފުލުހުންނަށް އެކަން އަންގާފައިނުވާ ކަމަށް މިރޭ ވަނީ ބުނެފައެވެ. ދޮގު ލިޔުންތަކެއް ހަދައިގެން އުޅޭކަމުގެ މައުލޫމާތު އެނގިހުރެ، އެކަން ސިއްރު ކުރުމުން އެ އިދާރާތައް ކުށްވެރިވާނެތޯ ކުރެވުނު ސުވާލަށް ފުލުހުން ޖަވާބެއް ނުދެއެވެ. ފުލުހުން ބުނި ގޮތުގައި އެ މައްސަލަ ބަލަން ފެށީ، ސޯޝަލް މީޑިއާއިން ފުލުހުންގެ ސަމާލު ކަމަށް އައުމާއެކީގައެވެ.
މިދިޔަ އަހަރުގެ އޮގަސްޓު މަހު ނެރެފައިވާ ބިންވެރިޔާ ސްކީމްގެ ފައިނަލް ލިސްޓުގައި ފަޒީލްގެ ނަން އޮތެވެ. ނަމަވެސް އޭނާއަށް އޮތީ ޝަރުތު ހަމަނުވާ ކަމަށެވެ. އޭގެ ސަބަބެއްގެ ގޮތުގައި ބަޔާންކޮށްފައިވަނީ ސަރުކާރުން ހިންގައިފައިވާ އަސާސީ ބޯހިޔާވަހިކަމުގެ ސްކީމަކުން އޭނާއަށް ކުރިން ގޯއްޗެއް ލިބިފައި އޮތުމެވެ.
ފަޒީލްއަށް ލިބިފައިވާ ގޯއްޗާ ގުޅޭ ލިޔެކިޔުންތަކެއް އިތުބާރު ހުރި މަސްދަރަކުން "ސަން"އަށް ވެސް ލިބިފައިވެއެވެ. އޭގެ ތެރޭގައި، ފަޒީލަށް ދީފައިވާ ގޯތި އެހެން މީހަކަށް ވެސް ލިބިފައިވާ ކަމަށް އެޗްޑީސީއަށް ފާހަގަވުމުން، އެ ކުންފުނިން މިދިޔަ ޖުލައި މަހު ހައުސިން މިނިސްޓްރީ މެދުވެރިކޮށް މައުލޫމާތު ސާފުކުރަން ފޮނުވައިފައިވާ ސިޓީއެއް ހިމެނެއެވެ.
މި މައްސަލަ އެންޓި ކޮރަޕްޝަން ކޮމިޝަން (އޭސީސީ)އާއި ގުޅިގެން ތަހުގީގު ކުރުމަށް ތައްޔާރުވަމުން އަންނައިރު، ފަޒުލް ހިމެނޭހެން އެޗްޑީސީގެ ބޯޑު މެންބަރުންތަކެއް ވަނީ ސަސްޕެންޑުކޮށްފައެވެ. އަދި އޭނާގެ ބޭބެ ފަޒީލް ވެސްވަނީ ސަސްޕެންޑު ކޮށްފައެވެ.