ސަރުކާރުގެ ތިން މިނިސްޓްރީއެއް ހިންގަމުން އައި އިމާރާތުގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގެ ތަހުގީގަށް ބޭރުގެ ޓީމެއްގެ އެހީ ހޯދާނެ ކަމަށް ޕޮލިސް ކޮމިޝަނަރު (ސީޕީ) އަލީ ޝުޖާއު މިއަދު ވިދާޅުވެއްޖެއެވެ.
އަލިފާނުގެ ހާދިސާ ހިނގީ ހައުސިން މިނިސްޓްރީ، އިންފްރާންސްޓްރަކްޗާ މިނިސްޓްރީ އަދި އެންވަޔަރަމަންޓް މިނިސްޓްރީގެ އިތުރުން މާލޭ ސިޓީ ކައުންސިލުގެ މަސައްކަތްތައް ވެސް ކުރަމުން އައި ދެ އިމާރާތެއްގައެވެ.
އެ ހާދިސާއާ ގޮތުން މައުލޫމާތު ދިނުމަށް ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި ޝުޖާއު ވިދާޅުވީ، މައްސަލައިގެ ތަހުގީގުގައި ބޭރުގެ ތަޖުރިބާކާރުން ހިމެނޭ ޓީމެއް ވީހާވެސް އަވަހަށް ބައިވެރިކުރުމަށް މަސައްކަތް ކުރަމުން އަންނަ ކަމަށެވެ. އޭނާ ވިދާޅުވީ އުއްމީދަކީ ކުރިއަށް އޮތް ދެތިން ދުވަހެއްގެ ތެރޭގައި އެ ޓީމާ ގުޅިގެން މަސައްކަތް ކުރެވޭނެ ގޮތް ވުން ކަމަށެވެ.
"ބޭނުމަކީ މިވަރު ބޮޑު އަލިފާނެއްގެ ހާދިސާއެއް އެ ހިނގި ގޮތް، ރައްޔިތުންނަށް ވެސް އެނގެން ބޭނުންވާނެ. ހަމައެއާ އެއްކޮށް ކުރިއަށް އޮތް ތަނުގައި މިފަދަ ހާދިސާތަކުން ރައްކާތެރިވުމަށް ޓަކައި ވެސް މިގޮތަށް ހިންގޭ ތަހުގީގުތަކުން ލިބޭ މައުލޫމާތަކީ މުހިންމު މައުލޫމާތަކަށް ވާނެތީ އަޅުގަނޑުމެން އެކަން ކުރާނަން،" ސީޕީ ވިދާޅުވިއެވެ.
އޭނާ ވިދާޅުވީ މައްސަލައިގެ ތަހުގީގަށް ފުލުހުންގެ ފޮރެންސިކް ޓީމުން މިހާރު އިމާރާތް ހުރި ތަނުގައި ހަރަކާތްތެރިވަމުން އަންނަ ކަމަށެވެ. އެގޮތުން އެ ސަރަހައްދުގައި ހުރި ސީސީޓީވީ ފުޓެޖް މިހާރު ނަގައި، އެނެލިސިސް ހެދުމުގެ މަސައްކަތާއި އިމާރާތުން ސާމްޕަލްތައް ނެގުމުގެ މަސައްކަތްކުރާކަން އޭނާ ފާހަގަކުރެއްވިއެވެ.
ފުލުސް ކޮމިޝަނަރު އަލީ ޝުޖާއު: އަލިފާނުގެ ހާދިސާގެ ތަހުގީގަށް ބޭރުގެ ޓީމެއްގެ އެހީ ހޯދާނެ ކަމަށް ވިދާޅުވި -- ފޮޓޯ/ މުޙައްމަދު ޝާތިއު އަބްދުﷲ
މީގެ އިތުރުން ރޯވި މަންޒަރު އެންމެ ފުރަތަމަ ދުށް މީހުންގެ ބަޔާންތައް ނެގުމުގެ މަސައްކަތާއި އެ ހާދިސާގެ މައުލޫމާތު އެންމެ ފުރަތަމަ ލިބޭނެ ކަމަށް ބެލެވޭ މީހުން ހޯދައި ސުވާލުކުރުމުގެ މަސައްކަތް ކުރާ ކަމަށް ސީޕީ ވިދާޅުވިއެވެ.
"މި މަސައްކަތްތަކާއެކު ރާއްޖެއިން ބޭރުގެ ކަމާ ބެހޭ ތަޖުރިބާކާރުންގެ ޓީމަކާއެކު މަސައްކަތް އަޅުގަނޑުމެން ކުރަން ފެށީމަ އަޅުގަނޑު ގަބޫލުކުރާ ގޮތުގައި މިކަމުގެ އަދި އިތުރު މައުލޫމާތު މާ ލަސްތަކެއް ރައްޔިތުންނަށް ފޯރުކޮށްދޭވެ ވަރަށް މިކަމުގެ މަސައްކަތްތައް ކުރިއަށްދާނެ ކަމަށް އަޅުގަނޑު މި ގަބޫލުކުރަނީ،" އޭނާ ވިދާޅުވިއެވެ.
ސީޕީ ވިދާޅުވީ އެ ހާދިސާގެ ތަހުގީގު އަދިވެސް ކުރިއަށްދާތީ އެއީ ކިހިނެއް ހިނގި ހާދިސާއެއްކަން ބުނަން މިވަގުތު ދަތި ކަމަށެވެ.
އެމްއެންޑީއެފުން ބުނެފައިވާ ގޮތުގައި، ބުރާސްފަތި ދުވަހު އަލިފާން ރޯވި ކަމުގެ ރިޕޯޓް ލިބުނީ 06:27 ހާއިރެވެ. އަދި އަލިފާންގަނޑު މެންދުރު ކޮންޓްރޯލް ކުރެވި، ހަވީރު އެއްކޮށް ނިއްވާލެވުނު ކަމަށް ބުނެފައިވެއެވެ.
އެ ހާދިސާގެ ސަބަބުން ތިން މިނިސްޓްރީގެ މަސައްކަތްތައް ހުއްޓިފައިވާއިރު، ދަރުބާރުގޭގައި މަސައްކަތްތައް ފެށުމުގެ ތައްޔާރީތައް އަންނަނީ ވަމުންނެވެ.